КЫК ТУЙ

Ӧтикыс тырӧма лӧптӧн.
Кыссьӧ лёк нюр вомӧн
Полігтыр, кытшолӧн... 
Мунны сэт — бӧрдігтыр... ӧткӧн.

Мӧд туйыс письтӧма гырдӧн,
Синваӧн. Паськыда
Шыльквидзӧ. Веськыда
Камгӧма укладӧн-кӧртӧн.

Позьӧ и мунны сэт. Долыд.
Майбырӧй, водзӧ пыр 
Чукӧрӧн сьылігтыр
Лэбзьыны, мыйта эм лолыд.

Чукӧрӧн! Абу тай ӧткӧн.
Бӧрдігтыр чукыльӧн.
А веськыда путкыльӧс 
Тшын бус моз, йиркӧдны кӧртӧн.

Кӧрт туйӧд шывгӧны том йӧз...
Нюр вомӧн кыссьӧны,
Ӧткӧн сэн пессьӧны
Полысьяс, важ йӧз.