КЫДЗИ ВӦЧНЫ СКВОРЕЧНИК

Колӧ вӧчны ябыр поз!
Да вот артмас али оз?
Да вот кужам али огӧ
Вӧчны сійӧс колан ногӧн,
Медым мортӧн вӧчӧм позйӧ
Овмӧдчасны ябыр гозъя?

Колӧ вӧчны ябыр поз!
Да вот артмас али оз?
Сюся серпас вылӧ видзӧд!
Муса ёртӧй, вӧчам сідзи,
Кыдзи петкӧдлӧма сэн!
Аддзан?
		Гӧгӧрвоин?
				Эн?

Колӧ вӧчны ябыр поз!
Пӧвйыс сюрас?
			Али оз?
Кӧрт тувъясыс кутшӧм?
			Татшӧм?
Абу гырысь?
			Бура сатшӧ?

Колӧ вӧчны ябыр поз!
Да вот артмас али оз?
Вӧчам!
Гашкӧ, артмас миян!
Гашкӧ, коркӧ ябыр пиян
Сэні чужасны да, сэсся
Аттьӧ шуасны на весиг!