* * *

Нянь тор абу — вот и дивӧ!
Ог тӧд, кодлы тайӧ кивыв?
Уджалан да сэсся мед
удждон вылӧ нянь эз шед!
Ачым ачымӧс ог верд...
Таысь скӧрман сэсся, дерт!
Гортад нянь тор абу кор,
он мӧй сэсся властьсӧ ёр?
Регыд кутам сёйны кач,
кыдзи позьӧ сэсся тадз?
Сэсся пӧ тай кыдзкӧ ов...
Татшӧм олӧмыд оз ков!
Уджтӧ мыйта кӧть эн берт,
оз кӧ сійӧ тэнӧ верд,
водзӧ сы помысь он во,
тадзи озырнад он ло.
Слабог, эм на тшак да пув,
медым тшыгла эг жӧ кув.
Слабог, видза ыж и мӧс.
Слабог, эм на лэч и чӧс.
Аслам — чери, яй и вый.
Эз кӧ вӧв, сэк сэсся мый?
Майбыр, ачым верма, том.
Эг кӧ вермы — сэки пом!
Сэки сэсся кыдз кӧть ов,
кулан — йӧзыдлы он ков.
Ӧні мортыд дзик нин мӧд,
ассьыс кындзи нем оз тӧд.
Аслас тырмӧ тӧжд и мог,
оз ков йӧзлӧн — гаж ни шог.
Тадзи-й олам. Тадзсӧ — кивыв.
Мӧвпыштан да, аслыд дивӧ!