* * *

Менам анделӧй
		лэбалӧ муыс да енэжыс костын.
Менам анделӧй дзирдалӧ,
		анделӧй — дзирдалысь востым.
Менам анделӧй чардалӧ, гымалӧ,
		бӧрдӧ да сьылӧ.
Менам анделӧй качӧма,
		качӧма вылісьыс вылӧ.

Менам анделӧй усьӧма,
		усьӧма улісьыс улӧ.
Менам анделӧй! Анделӧй!
		Анделӧй — кулӧ.
Менам анделӧй бӧрдӧ —
		да зэрӧ тай медбӧръя зэрӧн.
Менам анделӧй бӧрдӧ —
		да зэрыс тай лоӧма шерӧн.

Войыс, пемыдыс
		лунсӧ да югыдсӧ венӧ —
менам анделӧй,
		анделӧй эновтӧ менӧ.
Кадыс кольӧма, лымъялӧ —
		воӧма тӧлыс.
Воліс анделӧй,
		лымйыс кодь сӧстӧмӧн воліс!

Вӧліс анделӧй, вӧліс
		да абу тай орччӧн —
сэсся мыйта кӧть юрбит
		да мыйта кӧть ёрччы!
Пемыд вой шӧрын садьма да,
		садьма да — ӧтнам.
Югыд анделӧс аддзывла,
		аддзывла вӧтнам.