ВӦРАЛЫСЬЛӦН СЬЫЛАНКЫВ

Вӧлӧма на кӧнкӧ Ен,
Менӧ кыліс.
Сійӧ ыстіс тӧндзи мен
Мича нылӧс.

Петіс нылыс шондіӧн
Чӧс туй помӧ —
Небыд, мыла сёрниа,
Чӧскыд вома.

Тырис гажӧн сьӧлӧмӧй,
Шудӧн тырис.
Вӧлӧма на, вӧлӧма
Оландырыс.

Талун бара петалас
Чӧс туй вылам.
Морӧс бердам сывъяла,
Тадзи сьыла:

«Дитяӧй дай дзолюкӧй,
Шабді юрӧй.
Лэбачӧй дай колипӧй,
Тэрыб урӧй.
Чӧскыд озйӧй-вотӧсӧй,
Маръямольӧй.
Пожӧм яглӧн ковтысын
Варов ёльӧй.

Сьӧла-тарӧн чӧсмӧдла,
Озйӧн-маӧн.
Тӧвнас весиг юктала
Зараваӧн.

Низьӧн-ручӧн пасьтӧда
Тэнӧ, нылӧс.
Шоныд вольӧс паськӧда
Пӧлать вылӧ».

Вӧлӧма на кӧнкӧ Ен,
Менӧ кыліс.
Сійӧ ыстіс тӧндзи мен
Мича нылӧс.

Регыд воас зарниӧй,
Регыд воас.
Мед и муса гӧтырӧн
Меным лоас.