ВЕРӦСПУЛЫ ПИСЬМӦ

«Синмӧй лӧз, а нырӧй веськыд,
Юрси менам руд.
Сюрас верӧспу кӧ эськӧ,
Позяс дорны шуд.

Вурся, пӧжася и пуся,
Сӧстӧм гортын жыр.
Здук-мӧд шойччыны кӧ усьӧ,
Легӧдча жӧ пыр.

Челядь менам кык на сӧмын,
Верӧс эз и вӧв.
Овны меным тырмӧ сьӧмыд,
Сӧмын колӧ пӧв.

Сэтшӧм эськӧ колӧ мортыс,
Медым грамм эз ю.
Медым быдтор вайис гортӧ,
А эз гортысь ну.

Кага эськӧ вайи сылы,
Кыпӧдіс кӧ лов.
Сідзи эськӧ олім-вылім —
Бурджыкыс эз ков.

Шыась, верӧспуӧй менам,
Ӧткӧн гажтӧм, шог.
Ставсӧ тэкӧд вуджам-венам,
Сӧмын лок вай, лок».