ПРАВИТЕЛЬСТВЕННӦЙ ДАЧА

Тан чӧскыд вина кывтіс коркӧ шорӧн,
Тан баба чукӧр небзьӧдліс быд вой.
Дзик ставыс вӧлі, сьӧлӧмыд мый корӧ,
Но войт мында эз вӧвлы шог ни дой.

Дзик веськодь вӧлі, кыдзи йӧзыс олӧ,
Нянь-сов кӧ эм, оз кувны найӧ дзик.
Но овліс сідзи — бырліс весиг солыс,
А мыйта бырис чужан муын сикт?!

А кыдзи йӧзыс, кыдзи йӧзыс тшыксис!
А мыйта пежыс гусьыс петіс друг!
А мыйта лоис ковтӧм веныс-зыкыс!
И миян олӧм кутшӧм лоис дзуг.

Тан ӧні кылӧ челядьлӧн ключ гӧлӧс,
И пожӧм ягыс нюмдыштӧма со.
Мый тані коркӧ, неважӧн на, вӧлі,
Ме чайта, некор, некор нин оз ло.