АВТОБУС ВИЧЧЫСЯН КЕРКАЫН

Ветлысь-мунысьлы керкаыс ныма,
Кӧть и дзескыдджык неуна жыр.
Он нин тӧвъяснас ывлаас кынмав,
Кодыр виччысьны лоӧ вель дыр.

Сӧмын пырнысӧ зывӧк нин босьтӧ —
Куим букваа гӧгӧр тан кыв.
Нӧйтны кӧсйӧма кодӧскӧ Костя...
Тані сетлӧма кодлыкӧ ныв...

Медся лёкыс мый свет вывсьыс сюрӧ,
Тані стенъясас буретш и эм.
Дзикӧдз тшыксьӧма томъяслӧн юрыс,
Абу кольӧма ньӧти нин вем.

Эз жӧ та вылӧ велӧдны писӧ,
Чайта, быдтігас батьыс ли мам?
Не жӧ быдӧнлысь чегъявны кисӧ,
Мый нӧ вӧчнысӧ, вӧлі мед сям?..