ВИЧКО

Быттьӧ енэжӧ кыпӧдчысь юсь,
Тані, кыр йылас, сулаліс вичко.
Ӧні некодлӧн синва оз усь,
Ӧні пытшкӧсас тӧв сӧмын швичкӧ.

Коркӧ вичкоас вӧчлісны склад,
Ӧні гожӧмнас узьлӧны ыжъяс.
Ставлы — аслыс пӧ места да кад...
Сӧмын мыйысь нӧ вичкоыс мыжа?

Ӧні некодлы сійӧ оз ков
А ӧд пӧльяслы-пӧчьяслы коліс:
Мыйта йӧзыс, мед ышӧдны лов,
Татчӧ радпырысь коркӧсӧ воліс.

Ӧні клубын ми кольмӧдам юр,
Веськодь миянлы енмыс и чӧртыс.
Луныс мунас кӧ, сійӧ и бур,
Сэсся лешакыс коляс кӧть бӧрти.

Курыд мӧвпъясысь жугалӧ юр.
Изйӧн быттьӧкӧ сьӧлӧмӧс личкӧ.
Вӧчам олӧмас уна ми бур,
Но и лёкыс оз этшаджык сюр,
Прӧстит, верман кӧ, миянӧс, вичко.