1947-ӧд ВО

Ме сэки джоджын гызмасьысь на вӧлі,
Кор ӧтчыд пырис миян ордӧ пред
Да крапкис мамлы: «Узян керка пӧлад?
Вай аски зіля тшӧтш жӧ гӧрны пет!»

Мам сылы воча: «Кага век на висьӧ,
И некод сійӧс видзысьыс оз сюр...»
А предыд скӧрмис: «Гӧрны колӧ, мися...
Законсӧ тӧдан? Сыкӧд тэ эн дур.

Эг ме, тэ ачыд чурка питӧ вайин,
Эн чайт, мый таысь кокньӧд вичмас тэд.
Со керка срубйыс, аддзан, потшӧс сайын?
Лэдз пытшкас питӧ. Майбыр, сэсь оз пет».

Пред шлапкис ӧдзӧс. Мамӧ бӧрдан коли...
Мӧд луннас срубъяд эз жӧ менӧ ну.
Ме лунтыр борйын аслым бӧрді-доли,
А мамӧ гӧрис предӧн индӧм му.

Эз вӧв на сэки сёрнитнысӧ сямӧй,
И медым йӧзсӧ пӧрйӧдлӧм эз ло,
Ме гижи сідз, кыдз висьтавліс мен мамӧ,
А вӧлӧм сэк нелямын сизимӧд во.