ТИМА ВЕНЬ

І
Меным чайтсьӧ: тайӧ вӧлі Коркӧ мича лунӧ: Тима Венькӧд пыжӧ сӧлім, Чери кыйны мунім. Кыйим сэки уна комӧс, Нӧгыль юква пуим. Панясим да, бӧръяпомыс Сэтӧра чай юим. Шуис долыда сэк ёртӧй: «Мича жӧ нин нэмыс! Кутшӧм лӧсьыд овны гортад, Кӧні ставыс эмышт. Шорыд тёльгӧ, лэбач сьылӧ, Тӧвру кыськӧ волӧ. Ставсӧ аддзан, ставсӧ кылан, Вылын ветлӧ лолыд. Жаль, мый этша сӧмын олан Гажа вӧльнӧй светас. Тэтӧг тшака зэрыс волас, Тэтӧг шонді петас». Збыльысь этша оліс-выліс Ыджыд мортыс тайӧ, Куліс чужан мусянь ылын Креста ӧшинь сайын.
ІІ
Ме кывлі талун: Тима Вень пӧ гортас, Тюрмаӧ абу веськавлӧма мортыс, А лэччылӧма сійӧ Сыктывкарӧ, Мед Виттор ёрткӧд аддзысьлыны бара Да сёрнитыштны, кыдзи олӧ-вылӧ, Мый сійӧ гижӧ, мый нин ӧні сьылӧ, Мый выльыс ёртъяс перӧ улысь петӧ, Мый кывсьӧ бурыс-лёкыс вӧльнӧй светас. И висьтасьӧма, кыдзи ачыс олӧ, Да кыкнанныслы лоӧма зэв долыд. Издательствоӧ ветлӧм бӧръявылыс, Выль книга лэдзны кӧсйӧмаӧсь сылысь. Ме кывлі талун: Тима Вень пӧ гортас, Тюрмаын абу кувсьылӧма ортыс. Бӧр сійӧ аслас муса Помӧсдінас, И гӧтырыс, и челядьыс пӧ дінас. И сылы пӧ нелямын ӧкмыс арӧс — Сы мында буретш, кыдзи мунліс карас.
ІІІ
Ыджыд керка гажа нӧрыс йылын Тима Веньлӧн Эжва йылын эм. Юлӧн гыяс, тӧвлӧн бордъяс вылын Кӧсйис вуджны тані мича нэм. Ӧти мӧвпӧн важӧн сійӧ оліс, Кӧсйис югыд сьӧлӧма поэт, Медым карса гижысь котыр воліс, Тані шойччис Эжва дорас мед. Медым вӧлі челядь керка тырыс, Медым юргис налӧн серам гор. Медым, коді кӧсйӧ, быдӧн пырис, Сыкӧд сёрни паніс водз ли сёр. Кутшӧм гажа сэки эськӧ вӧлі, Мыйта эськӧ йӧзлы вӧчис бур. Но поэтӧс кынтіс кӧдзыд тӧлыс, Шоныд сетысь некоді эз сюр. Ыджыд керка гажа нӧрыс йылын Тима Веньлӧн Эжва йылын эм. Юлӧн гыяс, тӧвлӧн бордъяс вылын Сійӧ олӧ тані мича нэм.
Гижӧд
Тима Вень (Меным чайтсьӧ: тайӧ вӧлі...)
Жанр: 
Пасйӧд: 

* Виттор — коми поэт да писатель Виктор Алексеевич Савин.

lkejrlkelkrgner klrjnelknfrkl ekjnrjkenfrej

1