РОЧ ВАНЬ

Воліс Коми муӧ томӧн,
Нэмыс тані олӧ.
Ачыс — роч, а гӧтыр — коми,
Лӧсялісны лолӧн.

Челядь ӧні керка тырыс,
Дышӧдчӧны шоча.
Сяркӧдӧны вӧляпырысь
Комиӧн и рочӧн.

Батьныс мукӧд коми дорысь
Тӧдӧ кывсӧ шаня,
Кӧть и сійӧс таладорын
Шуӧны Роч Ваньӧн.

Ставсӧ сяммӧ, ставсӧ кужӧ
Бокысь локтӧм мортыс,
Быттьӧ Комиын и чужис,
Тані вӧлі гортыс.

Ставным Коми муӧ тӧрам,
Шань кӧ миян ловным.
Шуасны мед миян бӧрын:
Кужлісны пӧ овны.