КОДІ БУРА ОЛӦ

Коді бура олӧ?
Кодлӧн кыпыд лов?
Кодысь уджыс полӧ,
Уджысь код оз пов.

Абу мортыс китӧм,
Ылӧсас оз ныр.
Ытшкас — быттьӧ бритас,
Чӧвтас — войт оз пыр.

Ворсӧ-йӧктӧ киас
Пурт, и чер, и струж.
Мыйсӧ сӧмын сійӧ
Вӧчавны оз куж!

Вомгорулас сьылӧ,
Лолыс радліс мед.
Мисьтӧм кывйыд сылӧн
Некорсӧ оз пет.

Шогмӧ пызан вылыс,
Видлы — кӧсъян мый.
Абу, гашкӧ, сылӧн
Сӧмын сэн сизь вый.

Кӧсъян да он юктав,
Веськодь сылы дзик.
Ставсьыс пыдди пуктӧ
Сійӧс чужан сикт.

Кӧні татшӧм мортыс?
Збыль-ӧ сійӧ эм?
Эжва йылын гортыс,
Тані вуджӧ нэм.