ПРОКӦ ДА ВАССА

Вай жӧ, турӧбӧй, эн лёкав —
Лампа вылӧ сувтіс морт. —
Лэччӧ кыйсянінсянь Прокӧ,
Туйсӧ кутӧ, кӧні горт.

Сьӧлӧм вылас вель на-й долыд,
Шалсйӧ, сьылышталігтыр.
Эз на прӧстӧ вӧрас волы,
Нопйыс абу кӧть дзик тыр.

Аттӧ мича руч ӧд шедіс —
Медся мичасьыс нин дзик.
Лоас гӧтырыслы медым
Пельпом вылас воротник.

Либӧ шапка медым вурас,
Оз кӧ мыйкӧ ещӧ пет.
Ӧтчыд пасьтасьлас кӧть бура
Сылӧн Вассушкаыс мед.

Нэмсӧ шабурӧн и оліс,
Кӧть и водзті вӧлі том.
Медым барыня кодь лолас,
Красуйтчыштас бӧръяпом.

Моньыс дзайгыны кӧ мӧдас, —
Ручсӧ сетӧмыс оз ло.
Яндзим неуна мед тӧдас —
Кыкӧс нуліс кольӧм во.

Вермас волыны и нылыс,
Кывсяс кӧ нин татшӧмтор.
Но оз вичмы жӧ и сылы,
Кӧть мед кыдзикӧн оз кор.

Лэччӧ кыйсянінсянь Прокӧ,
Туйсӧ кутӧ, кӧні горт.
Сэні сылы керӧс бокын
Пывсян ломтіс дона морт.

Горсӧ талун донӧдз вӧчас —
Мудзыд корӧсьтӧг оз пет.
Сылы веськодь руч и кӧчыс,
Сӧмын ачыс локтіс мед.