КЕРӦС

Вотчыны ветла керӧсӧ.
Джуджыд кӧть каян кыр.
Козъя да кыддза керасын
Быдсяма тшакыс — тыр.

Ягсеръяс гӧгӧр йӧктӧны,
Ельдӧгыс — быттьӧ гӧч.
Татшӧмсӧ татысь ӧктыліс
Важӧн нин кувсьӧм пӧч.

Мамӧ тшӧтш татчӧ кежалӧ,
Ёнджыксӧ асъядор.
Позьӧ и сылы вежавны,
Пестерсӧ восьтас кор.

Керӧсас тані олӧ пӧ
Важӧн нин вошлӧм ныв.
Сюрас на сійӧ, колӧкӧ,
Эз жӧ ӧд дзикӧдз сыв.

Сійӧ и, гашкӧ, нылыс да,
Коді мен колӧ зэв...
Гылӧдӧ вӧрыс, гылӧдӧ
Зарниӧн эжӧм вевт.