ӦТИ ВИСЬТАСЬӦМ

1
Абу статя, абу мича, чукля кока, латшкӧс, ичӧт, винёв, наян, топыд вома, ӧти кывйӧн — ас морт, коми. Вӧрын чужис. Челядьдырсянь коми парма-вӧрын кыйсьӧ. Лыйсьӧ бура — урлы синмас ӧти дрӧбйӧн мортыд инмӧ. Майбыр, асьсӧ оз на янӧд! Ковмас — сувтас ошлы паныд, друг кӧ быттьӧ варгыль ошкыс ачыс кыйсьысь вылӧ вошъяс. Оз кӧ вошйы — оз и вӧрӧд, майбыр, паськыд коми вӧрыд. Шаньджык торйӧдчыны бурӧн, бурджык кольны ловъя юрӧн. Помтӧм-дортӧм вӧрын сыкӧд найӧ сулыштасны кыкӧн... Сэсся коркӧ-й — чуша-чоша — водзлань довгас варгыль ошкыд. ...Овлӧ, ошкыс збыльысь вошйӧ. Овлӧ, кыйсьысь шӧйӧвошлӧ, но оз пышйы ошсьыд сійӧ, кӧть и увтор лоас киас. Оз на, гашкӧ, асьсӧ янӧд! Сувтас скӧрмӧм ошлы паныд. Оз кӧ вермы ярмӧм ошсӧ, сідзкӧ, аслас юрыс вошӧ… Сідзкӧ, ошкыс сійӧс личкас... Паськыд парма-вӧрыс, сідзкӧ, нӧшта ӧти коми мортлы лоас потаннас дай гортнас. Гашкӧ, гашкӧ, парма зонмӧс ошсьыс доръяс кыйсян понйыс: абу медводдзаысь вӧрас — ӧшъяс ошлы коклябӧрас. Абу урӧс — здук кӧ сюрӧ, ошкӧс бӧрвывсяньыс пурӧ. Кыйсьысь вылӧ пыдди ошкыс увтчысь лайка вылӧ вошъяс. Кыйсьысь, ошсьыс мездмас мыйӧн, вӧлись сэсся шковгас-лыяс. Слабог, вермас сэсся оштӧ, да ӧд кыйсян понсӧ воштас… Кӧть и понйыс абу урӧс, ошлӧн гыжъяс улас сюрас. Понйыс лоас кулан выйын. Понсӧ аслыс ковмас лыйны...
2
Сиктӧ лэччӧм бӧрын зонмыс ньӧбас водка ош ку доныс. Оз ло юӧмыслы помыс — оз ло ош куыс ни понйыс… Сэсся, дзикӧдз коддзӧм бӧрын, вичкодорса луд выв шӧрын гора сьылас «Шондібанӧй», сэсся «Доли-шели» панас… Сэсся усяс потшӧс дорӧ. Коркӧ, коркӧ асъядорыс палялас да гортас мӧдас аслас дона гӧтыр ордас… Гортас гӧтырыслы шуас: «Талун кушӧдз ставсӧ юи, но ӧд, кӧть и понйӧс вошті, коркӧ кыя на ӧд оштӧ… Аски, палялышта мыйӧн, тэныд, шӧвктуг, ручӧс кыя. Тэ ӧд, гӧтыр, менӧ тӧдан: кыя гӧрд ручӧс дай сьӧдӧс… Кӧть и дышӧн менӧ шулан, кыя тэныд низь да тулан... Ог на тэ водзын ме янав, кӧсъян — кыя наян санӧс… Шыдтӧ пуны вая гоз-мӧд сьӧла-тар да чукчи-дозмӧр. Нывлы-пилы аски вӧрысь сус пу кольяс вая сьӧрысь. Помтӧм-дортӧм парма вӧрсӧ видзысь енмыс — зумыш Вӧрса — муӧдз копыртчывлӧм бӧрын, гашкӧ, лэдзас парма шӧрас… Оз кӧ скӧрав парма енмыс, сідзкӧ, вӧрас лэдзас менӧ. Скӧрмӧда кӧ — сэки Вӧрса оз лэдз вӧрсьыс некор бӧрсӧ. Шуас — ёра пӧ ме тэнӧ. Он пӧ пыдди пукты менӧ. Вӧрас тэнӧ пӧ ме йӧрта. Сэсся мортсьыс ошкӧ пӧрта. Мед пӧ парма шӧрын, гутӧм ош моз, тӧвбыд шӧйтны кутан. Эн кӧ ачыд повлы меысь, йӧзыс полӧны мед тэысь… Коркӧ, тэ моз бура лыйсьысь, менӧ пыдди пуктысь кыйсьысь, казялас да суас мыйӧн, шӧйтысь ошкӧс моз и лыяс… Верма пӧртны тэнӧ кӧчӧ либӧ шырӧн тэнӧ вӧчны... Шуа — лоан конда пуӧн. Вына Вӧрса, мися, энлы, — вочавидза парма енлы. Мися, пыдди пукта тэнӧ... Мыйысь ошкас пӧртан менӧ? Мися, кывзысьлі ме тэнсьыд, а эг Храпӧн вайлӧм енсьыс. Мыйла менӧ, доймӧм пыдди, тэысь ӧтдортчысьӧн лыддян… Тэнад тшӧктытӧг и кортӧг вӧрын кыйсьывлі мӧй коркӧ? Гашкӧ, вуджлі тэнсьыд кывтӧ? Гашкӧ, кыпӧдчывлі вывті? Висьтав, мися, вӧрсьыс коркӧ мыйкӧ дзуги али торки?.. Гашкӧ, мися, коркӧ вии позйысь усьӧм сьӧлапиӧс? Гашкӧ, кыйси парма-вӧрын кадысь водзджык, гожӧм шӧрын? Век на, мися, мортӧн шуси... Мися, мыйӧн лёкӧ уси?.. Тэнад паськыд парма-вӧрын низь да тулан кыйӧм бӧрын, мися, лэдз вай менӧ гортӧ муса гӧтыр-челядь ордӧ… Кылан, гӧтыр, зумыш Вӧрса вӧлись лэдзас менӧ бӧрсӧ. Жаль жӧ сэсся лоа сылы... Муса гӧтыр, кылан? Аски, кӧть и дышӧн шулан, вая тэныд низь да тулан, наян санӧс, ручӧс, гоз-мӧд сьӧла-тар да чукчи-дозмӧр...»
3
Тадзи, гортас воӧм бӧрас, дыр на гӧтырыслы сӧрас. Коддзӧм юрнас варов вома, оз ло сёрниыслы помыс. Огӧ видӧй — мед кӧ сӧрӧ, кыдзи кыйсьӧ парма-вӧрас. Кӧть и асьсӧ вывті ошкӧ, сійӧ збыль ӧд кыяс оштӧ. Кыдзи шуӧ, парма-вӧрсӧ, гашкӧ, збыльысь видзӧ Вӧрса. Гашкӧ, збыльысь эм и Ёма — дзӧрысь-вӧрысь, пиньтӧм вома. Овлӧ — гыма-чарда лунтыр... Гашкӧ, гашкӧ, тайӧ гундыр — ӧти бӧжа, сизим юра — биӧн сьӧласьӧ да дурӧ. Гашкӧ, эм и сюра мути, горзысь шева, мисьтӧм куття? Коді тӧдӧ, збыль-ӧ тайӧ? Колӧкӧ, и эмӧсь найӧ. Со тай эм на сэтшӧм мортыс, коді вӧрын, йӧзын, гортас сьӧлӧм-ловнас эскӧ талы, век на копыр вӧчӧ налы. Тадзи-й олӧ. Челядьдырсянь коми парма-вӧрын кыйсьӧ. Енмӧс тӧдысь. Абу полысь. Коми. Аслыспӧлӧс олысь.
Гижӧд
Ӧти висьтасьӧм
Жанр: 

lkejrlkelkrgner klrjnelknfrkl ekjnrjkenfrej

1