ИВАН КУРАТОВ НИМСЯНЬ

Чужан муысь, гортысь
тӧдтӧм муӧ мӧда.
Мый сэн мекӧд лоас —
ӧтнас енмыс тӧдӧ.
Ог тӧд, гашкӧ, сэні
шогсьӧмӧйла дзорма.
Ог тӧд, гашкӧ, ковмас
милӧстина корны.
Ог тӧд, гашкӧ, менӧ
аслас пиӧн шуас
ичинь туйӧ видзӧм
сэтчӧс ылі муыс.
Вояс кольӧм мысти
тӧдтӧм муас сэні,
гашкӧ, бӧръя туйӧ
мӧдӧдасны менӧ.
Войвыв Коми муӧ
ог кӧ сэсся волы,
бӧрдысь тури чукӧр
ваяс менсьым лолӧс.
Коми войтыр, кывзӧй
налысь сьылан горсӧ:
менам шогсьысь лолын
сигудӧклысь ворсӧм.
Лунвыв мусянь пӧльтысь
шоныд, небыд тӧлыс
сё во мысти ваяс
менсьым вошлӧм гӧлӧс.
Чужан муӧ ваяс
аслас шоныд сывъяс
ылі муын гижӧм
бӧръя сьыланкывйӧс.
Коми йӧзсӧ тӧлыс
окалас да шуас
меліӧн и шаньӧн
менсьым чужан муӧс.