* * *

Сьӧдӧдлӧм да едждӧм бӧрас
енэж потіс йи моз шӧри.
Гымаліс да сэсся зэрис
пуля гырся кӧдзыд шерӧн.

Сэсся, шерӧн зэрӧм бӧрас,
кырныш качис енэж шӧрӧ.
Едждӧм мылькъяс, ыбъяс пӧлӧн
сиктӧ рӧдтӧ куим вӧла.

Куим вӧла, куим вӧла
зымакылӧ керка пӧлӧн.
Тӧда: менӧ талун найӧ
мӧдӧдасны Урал сайӧ.

Тӧда: ӧти пон ку пасьысь
найӧ сиктӧс нуны дасьӧсь.
Кырныш лэбалӧ да лесьта
кравзӧ налӧн юръяс весьтын.

Тӧда: вӧтася ме тайӧс.
Тӧда: абуӧсь нин найӧ.
Тӧда: тайӧ шера луныс
уна дас во сайын муніс.

Тӧда: зумыш Урал сайӧ
пӧльӧс мӧдӧдісны найӧ.
Сійӧн пӧльлӧн вирыс ӧні
горзӧ менам дзик быд сӧнын.