ДРУГ

Менам вӧлі муса друг — Степан.
Мекӧд тшӧтшъя. Овыс Тарабукин.
Орччӧн вӧлім сыкӧд сэн и тан,
Шудсӧ-шогсӧ сылӧн кувтӧдз юким.

Сӧмын ӧтчыд сюрліс юктӧмтор:
Ми эг вермӧй юкны ӧти нылӧс.
Вӧлі тайӧ, велӧдчим на кор,
Но зэв пӧся сьӧлӧмӧн нин кылім.

Морӧсаным кутчысим сэк ми,
Быттьӧ врагъяс вийсян косьӧ петім.
Синмысь быдсӧн чепӧсйыліс би,
Ӧта-мӧдлы ныраным кор сетім.

Важӧн абу ловъя дона морт —
Томӧн-ёнӧн йи куд улӧ сюрис...
Эм-ӧ кӧнкӧ сыысь шань да бурыс
Вӧльнӧй светас менлы вылӧ ёрт?..