ШОНДІ ПЕТӦМ БӦРЫН

Талун асывсянь букшасис луныс,
Керка ӧшиньяс бӧрдісны дыр.
Весиг «дышсӧ» мен дыш вӧлі шуны,
Нинӧм юрӧ ни киӧ эз пыр.

Но тай шондіыс кӧнікӧ вӧлӧм,
Кыськӧ петіс на югзьӧдны лун.
Пыр и небзьыштіс, ловзьыштіс сьӧлӧм,
Пыр и пышйис вом паськӧдлысь ун.

Пиӧй чачаяс кӧрӧбӧ лӧдіс,
Ӧдйӧ ывлаӧ уйкнитны мед.
Ӧшинь улӧдным котравны мӧдіс
Куим гӧгыля велосипед.

Югыд ывлаӧ бӧрсяньыс петі,
Менам унзільӧй быттьӧ эз вӧв.
Пиӧй, аддзис да, гӧлӧссӧ сетіс:
«Батьӧ, гуляйтам. Бӧрвылас сӧв».