ЮГЫД ЗЭР

1

Весьтын югыд енэжыслӧн сер,
Югыд ваӧн койӧ сиктӧс зэр.
Жӧлӧб помысь лэччӧ югыд шор,
Югыдвежӧн лоис керка дор.
Ӧшинь улӧ петіс менам пи,
Югыд мольяс кыйӧ сылӧн ки.
Югыд зэрсьыс пиӧй оз и пов,
Югыд зэрсьыс сылӧн кыпыд лов.
Пиӧс корны ывлаӧ ог пет,
Югыд зэрсьыс быдмас сійӧ мед.

2

Гожся зэрыс регыд оліс,
Кӧтӧдыштіс мулысь эж.
А ӧд кыдзи радлӧ лолыд —
Ывла вылыс — вежсьыс-веж!

Гӧгӧр югдіс, гӧгӧр мича,
Муніс гыма-чарда грӧз.
Енэжыслӧн рудов ситеч
Весиг лои лӧзсьыс-лӧз.

Ӧшкамӧшка енэж шӧрын —
Мӧдлапӧлӧ вуджан пос,
Быттьӧ мичаник джодждӧра
Кодкӧ лэптіс дуригмоз.

Сьылӧ пыста, сьылӧ колип,
Содтіс сьылан горсӧ шор.
Уна жӧ и радлун колис
Талун гӧсьтӧн шуантор.

3

Енэж сӧстӧммис чардыс бӧрын.
Дугдіс пуяссӧ летны тӧв.
Пырис зонпосни гуран шӧрӧ,
Найӧс ӧнітӧ — ӧв не ӧв.

Енэж-му костӧ чикыш петіс,
Мунӧм чардыс моз вӧчис вирд.
Югдіс вочасӧн вӧльнӧй светыс,
Да и бырсмуніс шонді дзирд.

Олан гыяссӧ кутіс юны
Ӧшкамӧшкалӧн сера вӧнь.
Нӧшта мичаджык лои луныс,
Пытшкас тӧрӧдіс звӧн и лӧнь.