МАМЛЫ ПИСЬМӦ

1

Тэ мудзин, аттӧ ёна мудзин,
Но весиг кыв ни джын он шу.
Ме шондіӧдз кӧ эськӧ судзи.
Эг бокӧ кодлыкӧ жӧ ну.

Ме зіля эськӧ сійӧс вайи,
Мед шонтіс тэнӧ вой и лун.
И быттьӧ вӧлі кӧ збыль райыс,
То сеті тэныд, кӧть эн мун.

Ме ставсӧ эськӧ тэныд сеті,
Но сійӧ-й эм, мый эз тай ло.
Кыдз бордъяси да гортысь петі.
Сідз бокын ола кымын во.

Сё муса мамӧй, ёна кора,
Тэ прӧстит менӧ таысь, но?
Тэ менӧ, донаӧй, кӧ ёран,
То сэсся олысьӧн ог ло.

Тэд гӧтыр мӧдӧдӧ пӧсь чолӧм,
И дзоля пиӧй килысь пас...
Ме аддза: ӧбраз дорад волін
Да чӧвтін куим пернапас.

2

Мамук, кыдзи нин сиктаным олан,
Мый нин выльторйыс тіянын эм?
Кор нӧ миянӧс видлігмоз волан?
Эн тай дыркодь нин гижлы тэ мем.

Ачым мыйкӧ ме ог жӧ вот тэрмась:
Гижны колӧ, а вунӧдча пыр.
Гашкӧ, висян? Ме волыны верма.
Эг ӧд ас муын вӧв нин ме дыр.

Но, а гӧтыркӧд арланьыс воам.
Сылы гажтӧм да, ӧткӧн оз лэдз.
Мамук, тӧдан мый: кадыд кӧ лоас,
Ичӧт корӧсьтӧ сэк кежлӧ тэч.