ЙӦРАЛӦН БӦРДӦМ

Ме аддзылі, кыдз бӧрдіс йӧра,
Кор чеччынысӧ вын эз вӧв.
Дзик морт моз ружтіс парма шӧрас
Да сэсся ланьтіс, лои чӧв.

Эз синъяссӧ нин сэсся восьты
И мусӧ парсавны эз мӧд.
Ён тросысь петля ловсӧ босьтіс,
Код йылысь йӧраыс эз тӧд.

А пиыс понӧль сайсянь корис:
Тэ мыйла, мамук, пӧ он лок?
Эз тӧд, мый мамлӧн олӧм орис,
Мый кодкӧ вӧчис ыджыд лёк.

Эз тӧд, мый кодкӧ ветлӧ вӧрас,
Код мича туй вылӧ эз пет.
...Ме аддзылі, кыдз бӧрдӧ йӧра,
Но некор нин эг аддзыв мед.