СУСЕДКА ЙЫЛЫСЬСуседка менам — пӧрысь баб, Гражданскӧйтӧ на тӧдӧ. А сідзсӧ ачыс зэв нин слаб, То нёрпалӧ, то пӧдӧ. И ставсьыс мыжа сэкся кад, Кор тшыгъялӧмыс сюрис. И война кадыд — сьӧкыд ад, Кор дзормис шогсьыс юрыс. А кыдз нӧ оз, кор куим пи Эз гортас бӧрсӧ воны? Сэк лёталіс и кок, и ки, Сэк позис кынӧн лоны. Ме кыла войнаыслысь гор, Кор тайӧ бабыс оксӧ. И кыдз нӧ та бӧрын он ёр Му вывсьыс пежсӧ, лёксӧ? И кыдз нӧ та бӧрын он кор, Мед олім шудӧн-мирӧн, Мед юргис кыпыд уджлӧн гор, Мед ланьтіс вӧрӧг-ирӧд?
