ЛЕЖНӦГ СИКӦТША НЫВ

Дасысь унджыкыс меным эз вӧв,
Муртса косьмис на вом дорысь йӧлыс,
А ӧд мыйтакӧ тӧда нин вӧлі,
Эм мый быдӧнлы ас серти пӧв.

Гашкӧ, та вӧсна ворсігӧн пыр
Ӧти нывкалань сибӧдча вӧлі.
Кутшӧм дурӧм нин, сійӧ кӧ ӧліс.
Весиг сы вӧсна юрси эг шыр.

Да и яндыся вӧлі ме сэк,
Мам кор пасьтӧдліс дӧмаса гачӧн.
Но кор ворслім ми ас вурӧм мачӧн,
Сэк и дӧмасӧй вунліс тай век.

Гашкӧ, сэки нин майшасьлім ми...
Лежнӧг сикӧтш кор во мысти сеті,
Сэтшӧм мичаник нюм сылӧн петіс —
Быдсӧн ки дорӧ матыстлім ки.

Тайӧ кадсӧ ме мунны эг чайт...
Лежнӧг сикӧтша мичаник нылӧй,
Тэ тай сиктсьыным мунін зэв ылӧ.
Кыдзи олан нин? Гижышт кӧть вай.