* * *

Менам киын томсянь ворсіс
Лэчыд коса.
Петлі верстьӧ йӧзкӧд радын
Быд покосӧ.

Мукӧд моза шыльыдінсӧ
Эг кӧть корсьысь, —
Видз выв турун лёддзӧн усис
Коса дорсьым.

Пажын бӧрын ышмӧм шонді
Пӧжліс бура.
Коса вылӧ сэки вежлі
Тэрыб куран.

Рытыс бӧръя зорӧд бӧрын
Коркӧ воліс.
Тайӧ кадӧ вӧлі меным
Торъя долыд.

Кӧть и ӧні — ог жӧ быттьӧ
Венны сетчы:
Гожӧмъяснад шондісьыс на
Водзджык чечча.