ВЫЛЬ ДА ВАЖ — ТОРЙӦДНЫ ПОЗЬТӦМӦСЬ


Ичӧтысянь колис паметьӧ татшӧм серпас: кӧть кодарсянь он кут матыстчыны Койгортӧ, вӧръясысь петӧм бӧрын первойӧн тыдовтчӧ вичко. Лук модаа гӧгрӧс мича куполъяса, лым еджыд, сійӧ дӧввидзӧ джуджыд мыльк йылын, гӧгӧрыс разгысьӧм грездъяс шӧрын. Ок, мича! Ыджыд, и кажитчӧ кокньыдӧн, чача кодьӧн: небось тай миян пӧльяслӧн мастер киясыс кужлӧмаӧсь жӧ мичмӧдны сійӧс гӧгӧрбок.

Ӧти кадӧ тайӧ мичлунсӧ заводитісны косявны. Первой бруткӧбтісны-уськӧдісны кӧлӧкӧлсӧ. Ми, зонпоснияс, вӧлі нёльӧн сы пытшкӧ тӧрам. Сэсся и кӧлӧкӧльничасӧ кутісны разьны. А гырысь еджыд кирпичьясыс некыдзи оз шедны, оз чуктыны: найӧс быттьӧ сваритӧмаӧсь стенас. Первойсӧ чайтлісны, мый тайӧ кирпичьяссьыс позяс мыйкӧ выльысь стрӧитны, но нинӧм таысь эз артмы: кирпичыс оз шед, а ставыс дрӧбитчӧ. Ми, детинкаяс, радлім, мый тадзи рӧзӧритӧны вичкосӧ, мися, сідзи и колӧ ен позлы, мися, кӧть ризісӧ да кыз коркаа книгаяссӧ гусявлыштам; а менам пӧрысь дядь, коді ранитчылӧма гражданскӧй война вылын, коддзыштӧм да, вичко косялысьяс вылӧ видзӧдігӧн, бӧрдіс:

— Быд кирпич катлӧма гӧрб вылын, — шуаліс сійӧ. — Став сикт кодьӧн стрӧитӧма... Этатшӧм двореч... Мый вӧчӧны... — мый вӧчӧны!..

Жуглысьяслӧн, буракӧ, пиньныс эз мӧрччы помӧдзсӧ разьны вичкосӧ да найӧ эновтчисны, сэтчӧ лӧсьӧдісны картупель видзан склад.

И лои миян мича вичконым чегӧм бордъя чикыш кодь.

Тайӧ серпасъясыс кыдзкӧ аслым тӧдлытӧг сувтісны менам син водзӧ, кор ме неважӧн пукалі ӧти конференция вылын, кӧні вӧлі котыртӧма республикаын, кыдзи и мукӧдлаын, история да культура памятникъяс видзӧм кузя добровольнӧй общество. Докладчикӧс — Коми АССР-са Министръяс Сӧветысь председательӧс вежысь З. В. Паневӧс — да уна лыда выступайтысьясӧс кывзігӧн ме быттьӧ прӧйдитчи Коми му пасьтала да аддзылі сійӧс, мый вӧчлӧмны, кыдзи олӧмны-вылӧмны миян батьяс, миян пӧльяс да ещӧ пӧльяслӧн на пӧльясыс.

А ёна-ӧ ми тӧдам та йылысь? Бура-ӧ тӧдам ассьыным чужан мунымӧс, сылысь историясӧ?

Ӧні быд школьник стӧча вермас висьтавны, кутшӧм царь веськӧдлӧма Ассирияын сэтшӧмтӧ воясӧ миян эраӧдз. Либӧ вочавидзас, кутшӧм вӧлі оласногыс древньӧй грекъяслӧн. Дерт, ӧтарсянь кӧ, тайӧ бур. Но вермас-ӧ сійӧ жӧ школьникыс висьтавны, кутшӧм событиеяс вӧлісны чужан сиктас Сӧвет власть лӧсьӧдан воясӧ? Кыдзи воча кучкысьлісны сэки разнӧй вынъяс? Либӧ тӧдӧны-ӧ сійӧ мастеръяс йывсьыс, кодъяс зымкнитісны-сувтӧдісны чугун сывдан завод? Оз быдӧн та йылысь вермы висьтавны.

Бур-ӧ тайӧ? Пӧжалуй, абу. Бурджык эськӧ вӧлі, ичӧтик морт кӧ челядь дырсяньыс тӧдіс батьясыслӧн, пӧльясыслӧн олӧм да удж йылысь, мый найӧ вӧчисны олӧманыс. Сэки эськӧ сійӧ кутіс ёнджыка уважайтны налысь вӧчӧмторъяссӧ, кутіс эськӧ велӧдчыны налысь, босьтны воддза поколениеяслысь мудростьсӧ да тайӧн озырмӧдны асьсӧ и ас гӧгӧрса олӧмсӧ.

Конференция вылын сёрнитісны, мый бӧръя кадӧ миян республикаын вӧлі аддзӧма уна археологическӧй памятникъяс — важ йӧзлысь оланінъяс, а сідз жӧ сэтшӧм местаяс, кытчӧ найӧ вайлісны жертваяс, кытчӧ дзеблісны кулӧм йӧзӧс. Аддзӧмторъясыс сетӧны зэв озыр материал миян мулысь историясӧ бурджыка, пыдіа тӧдмалӧм могысь. Вӧлӧмкӧ, миянын, ӧткымын местаясын, первобытнӧй йӧз овлӧмаӧсь нин 20–30 тысяча вояс сайын. А неважӧн на ми чайтлім, мый Войвылын медводдза стоянкаясыс вӧліны миян эраӧдз сӧмын мӧд да коймӧд нэмъясын. Сідзкӧ, колӧ выль синмӧн видзӧдлыны татчӧс территория вылын важ йӧзлӧн олӧм вылӧ, налӧн сӧвмӧм вылӧ. А тайӧ — ыджыд удж. Куш ӧти археологъяслы тайӧ уджсӧ не бергӧдны. Налы колӧны уна отсасьысьяс — студентъяс, школьникъяс, ставныс найӧ, кодъяслы дона, кодъясӧс волнуйтӧ рӧднӧй мулӧн историяыс.

Ӧнӧдз жӧ делӧыс мӧд ногаджык на вӧлі. Уналаын археологическӧй памятникъяс вылӧ видзӧдісны кӧдзыда, видзӧм пыдди жуглісны найӧс, сорлалісны мукӧд. Со ӧти пример. Зэв важся олан места вӧлі аддзӧма Вольдін сикт дорысь. Но татчӧс лесопунктса рабочӧйяс косялісны сійӧс. Абу шудаджыкӧсь вӧлӧмны и важ йӧзлӧн паськыда тӧдса Вис бердса оланінъяс. Синдор сельсӧветса видз-му овмӧсын уджалысьяс гӧрӧмны тайӧ местаяссӧ. Быттьӧ натӧг муыс оз тырмы.

Ассьым тайӧ пасйӧдъяссӧ ме заводиті Койгортса вичкосянь. Кымын татшӧм мича собор лои кисьтӧма! А ӧд найӧс эз ен стрӧит, эз ангелъяс ни. Ставсӧ найӧс кыпӧдіс народ. Вӧчисны кирпич и тэчисны зумыд стенъяссӧ сійӧ жӧ войтырыс, кодъяс быдтылісны нянь, кыйисны вӧрын зверь-пӧтка. Ме чайта, кор йӧз помавлісны татшӧм здание стрӧитӧмсӧ, кӧнкӧ, ёна и радлісны, ёна и долыдпырысь сёрнитісны ӧта-мӧдныскӧд.

Со пӧ, другӧ, ӧтвылысьтӧ кутшӧм двореч ми маркнитім!

И меным кажитчӧ: тайӧ войтырыс не сэтшӧма ен ради старайтчисны, кутшӧма ассьыныс сиктсӧ мичмӧдӧм ради.

Да, не ӧти архитектурнӧй памятник лои жуглӧма. Сыктывкарысь Стефановскӧй собор, мукӧд вичко. Соборъясысь петкӧдӧма-нуӧма уна зарни кӧлуй, дона ӧбразъяс...

Вӧлі татшӧмыс — мый сэсся вӧчан. Киссьӧм ватӧ пӧ он нин курышт. Но абу на ставсӧ воштӧма. Колӧ кӧть ӧні мӧд синмӧн видзӧдлыны кольӧм архитектурнӧй памятникъяс вылӧ, миян батьясӧн да пӧльясӧн вӧчӧмторъяс вылӧ да кольны найӧс дзоньвидзаӧн миян потомокъяслы. А огӧ кӧ ми кутӧй тӧждысьны на вӧсна, вочасӧн ставыс бырӧ.

Конференция вылын сёрнитісны, мый ӧткымын вичкоын ӧнӧдз на видзӧны картупель, мый Емдінын святительлӧн гробницаын стрӧитчысьяс, вӧлӧм, гудралӧны цемент, мый Ульяновоса манастырын песталӧны бияс... Ок-ма!

Гашкӧ, татшӧм войтырыс чайтӧны, мый найӧ тышкасьӧны религиякӧд? Тайӧ абу тыш, а йӧз серам, тайӧ — невежество. Тадзи кӧ эськӧ быдлаын тышкасисны лёк важыскӧд да енъяскӧд, то эз нин эськӧ вӧвны ни Василий Блаженныйлӧн соборыс, ни Зимньӧй Дворец...

А ёна-ӧ ми тӧдам, ёна-ӧ ми кӧсъям тӧдны миян мулӧн неважӧнся история йылысь? Уна-ӧ миян эмӧсь памятникъяс, кодъяс эськӧ казьтылісны быдмысь том войтырлы батьяслӧн героическӧй делӧяс йылысь? Абу уна сэтшӧмыс. А мукӧдлаас эськӧ и эм, но кызвыннас вӧчӧма тюпки-ляпки, сы вылӧ видзӧдігӧн ни синваыд оз доршась, ни кабырыд оз гӧрддзасьлы.

Ме не ӧтчыд вӧвлі Кулӧмдінын, но некор некысь эг аддзыв, мед эськӧ мыйкӧ казьтыліс татчӧс крестьяналӧн кольӧм нэм шӧрса восстание йылысь. А ӧд тайӧ вӧлӧма зэв ыджыд, трагическӧй событие. Думайтны кутан да, сьӧлӧмад ӧзйӧ ыджыд гордость чувство сэкся войтыр вӧснаыс. Крепостнӧй право дырйи неыджыд сиктӧн кыпӧдчыны гундыр кодь ён нартитысьяслы паныд. Кутшӧм смеллун! Кутшӧм характеръяс!

А мукӧдлаын? Абу ӧмӧй интереснӧ, мый Ухта гӧгӧрын вӧлӧма мирын первой нефть перерабатывайтан завод? Мирын первой! Коліс жӧ ӧд сійӧс вӧчнысӧ, местасӧ коліс кужны корсьны-и. Сэкся кадӧ. А мыйта политссыльнӧйяс вӧлісны миянын! Ставныс найӧ — ыджыд вежӧра, сэкся эпохаса передӧвӧй йӧз. Кыдзи найӧ олісны миян Войвылын, мый вӧчисны? — та йылысь ӧмӧй колӧ тӧдны сӧмын налӧн биографъяслы?

В. И. Ленин шуліс: «Став важсӧ миянлы колӧ бура видзны не сӧмын кыдз искусстволысь памятникъясӧс, но и кыдз важ кадъясся олӧм-вылӧмлысь памятникъяс. Мед эськӧ сэтчӧ волісны экскурсияяс, мед эськӧ татшӧм местаясас вӧліны музейяс».

А миян частӧ на мӧдарӧ артмӧ. Сыктывкарын вӧлі быдӧнлы тӧдса кык судта важиник керка. Сэні овлӧма коми войтырлӧн национальнӧй гордостьныс, первой коми поэт Иван Алексеевич Куратов. Керкасӧ, буракӧ, некод лючки эз чередит, да сійӧ урӧсмис. А во куим-нёль сайын сійӧс и дзикӧдз кисьтісны, керъяссӧ кытчӧкӧ новлісны. Ӧні керка местаыс вомысь нетшыштӧм водз пинь места кодь — видзӧдлан сэтчӧ и шогӧдӧ.

Кыдзи и став страна пасьта, миян Коми муӧд яр бушколӧн прӧйдитіс гражданскӧй война — Сӧвет власть доръян сьӧкыд вояс. Мыйта вир кисьтӧма. Мыйта пӧсь сьӧлӧм да сюсь вежӧра юр гуалӧма муӧ, медым миянлы бурджыка овсис.

Но колана ногӧн-ӧ ми казьтылам паметьсӧ тайӧ йӧзыслысь? Ой, ог!

Сыктывкарын, Юбилейнӧй плӧщадь бокын, киссьӧм важ керкаяскӧд орччӧн эм гражданскӧй война кадӧ усьӧм геройяслы памятник. Дорыш вылас сувтӧдӧм паськыд цемент пӧв, сэні пасьталаыс гырысь букваяса гижӧд: «Налы, кодъяс сетісны олӧмнысӧ...» да сідз водзӧ. Видзӧднысӧ абу окота татшӧм памятник вылас, непӧштӧ любуйтчыны сыӧн. И яндзим. Яндзим на водзын, кодъяс куйлӧны кыз му улын, а ӧттшӧтш лӧгыд петӧ сійӧ йӧз вылас, кодъяс думыштӧмаӧсь тадзи вӧчны памятниксӧ. Мыйӧн сӧмын найӧ думайтӧмны!

Матысмӧ Великӧй Октябрлӧн ветымынӧд годовщина. Сӧветскӧй йӧз думнаныс ещӧ и ещӧ бергӧдчылӧны асланыс прӧйдитӧм туй вылӧ, нимкодясьӧны успехъясӧн, кодъясӧс шедӧдӧма виркисьтана косьясын да сьӧкыд уджын. Йӧз кӧсйӧны унджык тӧдны тайӧ славнӧй туй йывсьыс. Торйӧн нин том йӧз, челядь. Конференция вылын ӧткымын сёрнитысьяс висьталісны, мый та могысь найӧ ветлывлӧны ыджыд походъясӧ, зільӧны места вылын тӧдмавны, кыдзи-мый вӧлӧмаӧсь делӧясыс. Но, вӧлӧмкӧ, сиктын тӧдмавны мыйкӧ гражданскӧй война кадся событиеяс йылысь абу ёна кокни. Сы вӧсна, мый унджыклаас некод тайӧн оз интересуйтчы. Быттьӧ нинӧм абу и вӧвлӧма. А памятникъясыс, кодъясӧс коркӧ сувтӧдлӧмны усьӧм геройяслы, уналаын петшӧрсялӧмны.

А ӧд тайӧ местаясыслы колӧ лоны медгажаинъясӧн. Мед эськӧ сэтчӧ кыскис том войтырӧс, мед эськӧ тайӧ памятникъясыс ӧзтісны ныв-зонлысь мича думъяс, ыджыд кӧсйӧмъяс.

Да, став важсӧ колӧ бура видзны, мед эськӧ сійӧ колис и миян кувсьӧм бӧрын. Но тайӧ — ӧтитор на. Конференция вылын вӧлі тӧдчӧдӧма, мый важсьыс став бурсӧ колӧ босьтны миянлы ӧнія олӧмӧ. Шуам, стрӧиталам ми уна керкаяс. Но кутшӧм карӧ кӧть он лок, быдлаын найӧ ӧткодьӧсь. Оз ӧмӧй позь кутшӧмкӧ ногӧн мичмӧдны найӧс национальнӧй искусстволӧн мотивъясӧн? Мед эськӧ карыслӧн вӧлі аслас чужӧм. Мед сійӧ вӧлі мичаджык, и тӧдчӧдіс, кӧні ми олам.

Ӧні нинӧм татшӧмыс ёнасӧ оз тӧдчы. Пыралан ӧткымын Культура керкаясӧ, кафеясӧ, и мыйсӧ сӧмын абу рисуйталӧма: яблоняяс, кутшӧмкӧ тропическӧй быдмӧгъяс, вӧчалӧма гӧгӧрвотӧм визьяс. А оз ӧмӧй и тані позь мыйкӧ босьтны народлӧн искусствоысь? Ӧд тӧдса, мый войвывса народъяс важысянь бура кужлісны краситны-баситны ассьыныс оланінъяссӧ, кӧм-паськӧмсӧ, быд пӧлӧс гортса кӧлуйнысӧ. Сёрнитӧны тай, мый водзті миянын куясысь вӧчлывлӧмны сэтшӧм сумкаяс, кодъясӧс нулывлӧмаӧсь весиг Парижӧдз. Сэтчӧс дамаяс пӧ мырддьысьӧмӧн ньӧбавлӧмаӧсь тайӧ сумкаяссӧ.

А кутшӧм мастерӧсь вӧліны миян батьяс да пӧльяс вӧчны быдсяматорсӧ вӧр-пуысь. Кӧнкӧ пӧ Удораын ӧнӧдз на эм часовня, кодӧс стрӧитігӧн абу тувъявлӧмаӧсь ни ӧти кӧрт тув, ставыс пӧ кутчысьӧ пу тув вылын. Либӧ видзӧдлӧй, мый вӧчавлісны важ йӧзыс сюмӧдысь. Быд пӧлӧс туиссӧ, пестерсӧ, кузовсӧ — быдӧн чача кодь, сэтшӧм лӧсьыда пуксьӧ-ляскысьӧ мыш дінад. Быд визь, быд кусынь артыштӧма. А ӧні, вӧрӧ мӧдӧдчан да, пелькиник пестер пыдди мышкад лоӧ ӧшӧдны фанераысь вӧчӧм ящик, коді крукасьӧ быд пуӧ. Оз ӧмӧй позь татшӧм коланаторъяс вӧчӧмсӧ котыртны мастерскӧйын, кодъяс эмӧсь быд сиктын и карын? Позьӧ. Нинӧмла дзикӧдз вунӧдны да эновтны сійӧс, мый народ уна нэмъяс чӧж шыльӧдіс-мольӧдіс, вочасӧн пыр бурмӧдіс. Ӧні, кор сэтшӧма сӧвмисны наука да техника, разнӧй культураяслӧн топыда йитчӧмыс ваяс сӧмын пӧльза.

Котыртӧма выль общество. Сылӧн могыс — видзны историялысь да культуралысь памятникъяс, уджавны сы вылын, мед эськӧ став бурыс, кодӧс чӧжисны-чукӧртісны миянӧдз олысь поколениеяс, пыдіа йиджтысис ӧнія олӧмӧ, отсаліс миянлы тэрыбджыка восьлавны водзӧ.

Колӧ чайтны, мый тайӧ обществоас пырасны уна-уна йӧз.


Гижӧд
Выль да важ — торйӧдны позьтӧмӧсь
Жанр: 
Йӧзӧдан во: 

lkejrlkelkrgner klrjnelknfrkl ekjnrjkenfrej

1