ЧЁРНЫШСКӦЙ КАДРИЛЬ


Мед но кӧнкӧ Маньӧ-Таньӧ
Восьтӧ йӧктӧмын выль стиль.
А ми ас ног йӧктам тані
Важся Чёрнышскӧй кадриль.

Сӧмын ӧшинюлыс сылас,
Сӧмын едждас льӧмъя сад,
Гудӧкасьысь босьтӧ, кылӧ,
Кокньыдик да вильыш лад.

Видзӧдан да, тадзи дзик ӧд
Йӧктіс менам ыджыд пӧч,
Запӧдручки Яков пикӧд
Тадз жӧ бергалісны стӧч.

Яковсяньыс квайт кӧлена
Нюжӧдчис нин Яков рӧд.
Аски-аскомысь и менӧ
Йӧктысь радсьыс вежас мӧд.

Лузыс кывтӧ коймӧд визьӧд,
Выль пӧв вежсис олӧм лад.
Гудӧкыслӧн югыд кизьыс
Кадриль ворсны важ моз рад.