УР КЫЙЫСЬ ЯРАН

Тувсов ур кыйигӧн ӧтилаасясны коми вӧралысь да ур кыйысь яран. Коми морт берданка пищаля, а яран ньӧвъя-вужъя. Коми морт пондас сійӧ серавлыны, кыдз пӧ тэ тайӧ ньӧвнас вӧралан, мый нӧ пӧ шедӧ дай. Яран шуӧ, шедавлӧ пӧ неунасӧ.

— Со ӧд менам пищальыс, вот тайӧ пищаль, не тэнад карнаныд.

Яран шуӧ:

— Да, тэнад бур пищаль, сӧмын ме тэ дорысь унджык кыя, кӧть заклад вартам.

Вартасны заклад. Понныс увтчас, аддзасны ӧти пуысь ур комын-нелямын.

Коми морт мӧдіс лыйлыны, а яран пу бокӧ зэвтчӧма да лӧсьӧдлӧ стрелаяс. Коми морт лыйліс нин ур 3–6, а яран век на ноксьӧ. Сэсся тай, гашкӧ, 50 стрела ӧтпырысь резыштіс, став урыс ӧтпырйӧн сяркылӧ-киссис. Сэсся мешӧк тыр сӧвтіс да и муніс гортас. Коми морт дивуйтчӧ коли.