КАЗЬТЫЛАН ТОРПЫРИГЪЯС


Аттӧ, ӧдйӧ жӧ пӧраыс котӧртӧ! Веськыда лэбӧ, — бордъя вояс, кыдз шуӧ Выль Паш. Биа бордъя вояс! Тӧкӧтьӧ на быттьӧ олыштін, а кватитчан да — вит во чеччыштӧма: тӧрыт на быттьӧ сійӧ вӧлі, а збыльысьсӧ — дас во нин сэсянь бергӧдчӧма. Вот, тадзисӧ шургӧ выль олан кадыс дас квайтӧд во нин. Тӧдӧмысь, йӧз историяын некор на эз вӧвлы татшӧм чорыд ӧда кадыс. Ӧти воыс — дас во весьт сулалӧ. Ӧд социализм тэчан кад. Ударнӧй кад. Большевикъясӧн веськӧдлан кад. Та вӧсна сэсся дерт, ньӧти абу шензяна татшӧм пуан кадыд, ломалан пӧраыд. Тадзисӧ вӧрзьӧдчис сійӧ Октябр гым шыысь садьмӧмсянь. А сэтчӧдз... Веськыда кӧ шуны, сэтчӧдз и олӧмыс миян эз тыдавлы, а сідз кутшӧмкӧ сумуйтӧм, йӧжгылясьӧм, нюкрасьӧм вӧвлі. Кималасӧн, синтӧмъяс моз овлім. «Кыдзкӧ да мыйкӧ», «ен да бур йӧз» отсавлісны... Збыльысьсӧ эськӧ кодъяс найӧ вӧліны? «Кыдзкӧ-мыйкӧыс» — асланым тӧдтӧмлунным, «енмыс» — асланым пемыдлунным, «бур йӧзыс» — асланым тупкӧса вежӧрным. Восьсӧнджыка шуӧмӧн: сьӧкыд олӧм, поп да кулак. Со кутшӧм вӧвлі важӧн коми уджалысь йӧзлӧн «экономикаыс и культураыс».

Вот! Медъёнасӧ татчӧ — культураас — ми и мытшасям вӧлі.

Да, веськыда кӧ шуны, комилӧн аслас эз и вӧв некутшӧм культура. Кытысь нӧ сійӧ вермис лоныс, кор коми кывсӧ быдсяма чиновникъяс увтыртлісны, весиг матӧ эз сибӧдлыны школаясӧ ни, присутственнӧй местаясӧ ни, эз морт кывйӧн, а пон кывйӧн лыддьывлісны.

А гижӧд (печать, литература)? Коми гижӧд вӧвлі? Коми кывйыс кӧ запрет улын вӧлі да полігтырйи, вӧй пӧтка моз, кытшлавліс гусьӧникӧн, — коми литература йылысь, дерт, и сёрнитныс нинӧм. Эз вӧв дай эз лысьт вӧвнысӧ! Медым эськӧ эз ло менам тані пӧръялӧма лыддьысьясӧс, ковмас неуна пасйыштны нӧшта ӧтитор. Збыльысьсӧ вӧвлі жӧ и войдӧр нин коми «литератураыд». Наян-мудер власьтыд да йӧзӧс нартитысь классыд гӧгӧрвоӧны жӧ волі литератураыдлысь ыджыд значенньӧсӧ да, тайӧ воропсӧ эз дзикӧдз лэдзны асланыс киысь. Мед кӧть и этшаник вӧлі сійӧ «литератураыс», кыдз шуласны, — кань лякӧс мында, но и сійӧ вӧлі отсӧг пемыд йӧзӧс ылӧдлыны, налысь вежӧрсӧ «ен руӧн» тыртны. Кутшӧмсюрӧ молитваяс, ӧткымын «святӧйяслысь» олӧм-вылӧмсӧ (шуам, Степан Перымскӧйлысь) да «евангелльӧ» вӧлі комиӧдлӧмаӧсь да печатайтлӧмаӧсь. Татшӧм «коми нигаяссӧ» ӧні на ме ачым помнита: дзолядырйи велӧдчигъясӧн сэтшӧмъяссӧ сетавлісны миянлы «награда» пыдди. Авторъясыс — кутшӧмкӧ поп Красов, кутшӧмкӧ поп Сахаров, эм на пиын тшӧтш и коми учёнӧй Г. С. Лыткин. Со меным неважӧн на (таво апрель 13-д лунӧ) Сыктывкарса сӧвет мӧдӧдіс ӧти «коми нига», да гижӧ: «Думайтам, тіянлы мыйсюрӧ вылӧ туяс материал пыдди. Карса сӧветын юралысь Калинин. Орготдел Тентюков». (Буретш тай со и туйис, згӧдитчис). «Нигаыслӧн» нимыс «Миян господьлӧн Исус кристослӧн вежа бур юӧр Матвейсянь. Коми кыл вылӧ выльысь пуктысь Г. С. Лыткин». Вот, татшӧм «коми литература» пыртлісны коми пӧвстӧ. Эз небось лэдзлыны кутшӧмкӧ велӧдчан коми нигаяс, вежӧр восьтан литература, кысь нин эськӧ художествоа литературасӧ да. А ӧд сылӧн (худож. коми литературалӧн) и сэки нин, во 75–80 сайын, петасъясыс тыдовтчылісны. Босьтам кӧть сійӧ жӧ Иван Куратовӧс, коді гӧгӧрволіс коми «мича кывлысь» коланлунсӧ —


«Тайӧ кывлысь мичсӧ сьӧлӧмын ме кылі.

И ме медводз сыӧн ньӧжйӧника сьылі,

Тайӧ кывйӧн мукӧд гораджыка сьылас —

Сё кызь сюрс пель сэки уна буртор кылас!»


1913–14 воясӧ кутшӧмкӧ ногӧн Ӧ. Ӧ. Цемберлы вӧлі удайтчӧма лэдзны посньыдик кык коми нига — «Коми сьылан да мойдан кывъяс»! Коми йӧзкостса мойдкывъяс кындзи сэтчӧ вӧлі пырӧма тшӧтш кымынкӧ коми кывбур М. Поповлӧн (лирика). Сэні жӧ вӧлі петӧма медводдзаысь «Коми збойлун» М. Лебедевлӧн («Гажаджык, коми йӧз, олӧй»), кодӧс ӧні сьывны запретитӧма.

Октябрса революция орйӧдліс важ чепъяссӧ ставроссияса уджалысь йӧз вылысь, восьтіс туй быд ас сёрниа посни йӧзлы тшӧтш кыпӧдчыны аслас кывйӧн паськыда пӧльзуйтчӧмӧн, сетіс ӧткодь права сылы. Вӧрзис сэки и коми кыв, пондіс быдмыны коми гижӧд, коми литература. Сылӧн дас вит вося туйыс — дзонь история. Ӧд нинӧм абуысь чужис, быдмис да сӧвмис бура ыджыд тураса художествоа пролетарскӧй коми гижӧд! Миян ӧти ёрт 1928 воын висьтавліс коми гижӧд кузя: «Ми дас воӧн вӧчим чуймымӧн ыджыд воськов водзӧ. Ми революциябӧрся дас воӧн вӧчим сё пӧв ыджыдджык гижӧд чукӧр революция водзвывса 500 вося гижӧд чукӧр дорысь». Кӧть эськӧ быттьӧ зэв нин ыдждӧдлӧмӧн тайӧс шуӧма, но, ме ногӧн, и тайӧ на этша; революциябӧрся коми гижӧд чукӧр быдмӧм нинӧмӧн оз позь сравнитны, некутшӧм водзвывса эпохаӧн.

Революциябӧрся печатьын медводдза коми художествоа гижӧд вӧлі Сандрик Миколлӧн кывбур «Водзӧ» («Зыр. ж.» 1918 во, № 4). Ме сэки муртса на вои Коми муӧ Украинасянь. Кор аддзи тайӧ кывбурсӧ, кутшӧм нимкодь вӧлі меным: ӧд комиӧн, коми кывйӧн петӧма кывбур! Сы бӧрын регыд и ачым куті гижыштавлыны коми кывбуръяс. Медводдзаыс вӧлі «Гӧрд звӧн» («Зыр. ж.» 1918 во, № 18). Зэв любӧ вӧлі: ӧд аслам гижӧдӧй печатьын петіс! Нэмӧн на медводдзаысь! Дерт, техника боксяньыс (ӧнія серти кӧ) зэв на сійӧ вӧлі жеб, улын. Но куті зільны бурмӧдны да шыльӧдны-мольӧдны. Сэсся тӧдмасялі гижысь ёртъяскӧд да, ӧтвылысь пондім артавны ассьыным гижӧдъяснымӧс. Торъя ёна босьтчис тайӧ уджыс 1918 вося ноябрсянь, кор воссьыліс Сыктывкарын «Коми комиссия». Унджык рытсӧ вӧлі коллявлам «комиссияын»: лыддялам гижӧдъяснымӧс да сёрнитам на кузя. Ме, Илля Вась, О. Маегов, Иона Чисталёв (кувлі 1923 воын) да Вась Педӧр (кувлі 1922 воын), — со кутшӧм вӧлі медводдза сӧветскӧй коми гижӧдъяслӧн котырыс. Бӧрвылас воис нӧшта миян дінӧ Чисталёв Тима Вень. Ёна вензьывлім, ёна сёрнитлім и гажӧдчылім. Медся серьёзнӧй вӧлі поконик Иона Тимофеевич Чисталёв. Сійӧ вӧлі гижӧдъяснымӧс лэптылас ён критика вылӧ. Пыр вӧлі корсьысям асланым нога (коми сяма) гижан форма, медым мездысьны искусственнӧй роч формаысь, но некыдз эгӧ вермӧ аддзыны. Ӧтчыд помнита, Иона Тимофеевич локтіс миян дінӧ да петкӧдлӧ гижӧда кабала, ачыс нимкодьпырысь шуӧ:

— Вот, тайӧ бур. Тайӧ — шедевр!

Вӧлӧм, вокыс сылӧн (Тима Вень) ыстӧма Помӧсдінсянь выль кывбур «Югыд вой, кӧдзыд вой»:


Тӧлысь-кодзув ӧтарсянь —

вылісянь.

Еджговлӧз лым мӧдарсянь —

улісянь.

Юрвыв кодзув зэв вылын —

дзирдалӧ.

Шытӧг ылын, войвылын —

чардалӧ.


Миянлы, збыльысь, зэв мичаӧн да бурӧн кажитчис тайӧ кывбурыс. Зэв художествоа серпас. Колӧ шуны, Тима Веньысь мичаджыка вӧччӧдны ассьыс гижӧдторъяссӧ миян пиысь некод эз кужлы (дай ӧні на, пӧжалуй, оз сюр). Сылӧн быд гижӧд ломалӧ вӧлі ыджыд художествоа ярлунӧн. Колӧ вӧлі кывлыны асьсӧ Тима Веньӧс, кор сійӧ ачыс лыддьывліс гижӧдъяссӧ. Мыйта мастерство да сьӧлӧм вӧлі пуктас сійӧ сэтчӧ! Помнита, ӧтчыд лыддис сійӧ ассьыс выль очерк кодь висьт «Во гӧгӧр кытшовтӧм пӧтка сьылӧм шыӧн», да став природаыслӧн серпасъясыс збыльысь син водзад быттьӧ волӧны: ...«Пинь пинь... пинь! Чик-чилик!» — вӧлі шуас лэбачьяслы подражайтӧмӧн. Но, дерт, ми сэкъясӧ эгӧ на кужлӧ кыпӧдны гырысьджык творческӧй вопросъяс, кутшӧм методъясӧн гижны, эз на вӧв унаысь и гижӧдъяснымӧс колана могъясыскӧд йитӧмыс, — гижлім коми оласног йылысь, коми природа йылысь, либӧ чуксавлім выль олӧмлань. Гашкӧ, ёнджыкасӧ на сэки миянӧн веськӧдліс национальнӧй энтузиазмыс, а эз революционнӧйыс. Ӧд коми кывлы воссис вӧляыс да, чукйӧн вӧлі бызгӧ-люзьгӧ петӧ ортсӧ... Но миянӧс кыдзсюрӧ гижӧмысь некод сэки эз ӧлӧдлы. Сы йылысь ми пондім тӧдны сёрӧнджык нин.

Тадзи ми вочасӧн пыр велӧдчим гижны, содісны и выль гижысьяс. Но унджыкыс вӧлі гижӧны, кыдз шуласны, аснаукӧн, торйӧн, разі-пели. Колӧ вӧлі кыдзкӧ котыртны, ӧтувтны гижысьясӧс.

И вот, 10 во сайын, 1923 воын, юнь тӧлысьын, вӧлі коми гижысьяслӧн медводдза чукӧртчылӧм, конференция. Ме ачым эг вӧв тайӧ конференция вылас (ветлі Уралӧ), да ог тӧд, кыдзи да мый сёрнитісны сэні. Но материалъяс сертиыс тыдалӧ, мый тайӧ конференцияыс вӧчӧма. Медтӧдчана уджыс — пуктӧма подув котыртчӧмлы, сетӧма индӧдъяс гижан могъяс кузя. Дерт, гырысьджык туйдӧдъяс творческӧй вопросъяс кузя тайӧ конференция эз вермы сетны.

1926 воын, март 12-ӧд лунӧ, котыртчыліс пролетариат нога коми гижысьяслӧн ассоциация (КАПП). Тайӧ выль организацияыс сувтӧдліс ас водзас гырысьджык могъяс нин: 1) котыртны-ӧтувтны коми гижысьясӧс, 2) кыпӧдны да быдтыны выль гижысьясӧс, 3) сетны пролетариат идеологияа туйвизь коми литературалы, 4) отсавны гижысьяслы велӧдчӧмын да творчествоын.

КАПП котыртігӧн, медводдза чукӧртчылӧм вылас, лыбліс бура ыджыд вен. Кодсюрӧ вӧлі шуӧны: миян пӧ пролетариатыс абу да, оз вермы организацияыс шусьыны пролетарскӧйӧн. Тешкодь ӧд кажитчӧ ӧні! А «Габӧ Педӧр Ӧльӧксан пи Ӧльӧксей нима» (Ӧ. Ӧ. Чеусов) весиг тадзи вӧлі шуӧ: «Пролетарскӧй литература абу, дай оз ло», — кыдзи коркӧ сёрнитліс Троцкӧй. Мукӧд вӧлі чайтӧны: пролетарскӧйӧн кӧ пӧ шусян, ковмас пролетариат йылысь и литературатӧ лӧсьӧдны, а крестяна йылысь оз нин позь гижны. Подувнас вӧлі лыддьӧны тематикасӧ, а оз туйвизьсӧ.

Тӧлысь мысти КАПП организуйтӧмсянь, апрель 15-ӧд лунсянь, кутіс петны газет «Коми сикт». Сэтчӧ восьтӧма вӧлі литература юкӧд — «Коми гижӧм», кӧні петаліс бура уна гижӧд: 18 стаття коми литература йылысь, 12 висьт да 46 кывбур. Сы бӧрын сэсся, 1926 вося октябрсянь, пондіс петны «Ордым» — политическӧй, экономическӧй, литературнӧй крестянскӧй журнал. Медводдза нумерыс петіс буретш Октябрса праздник лунӧ (ноябр 7 лун). Пырӧма сэтчӧ кык висьт да 7 кывбур. Журнал петӧм — зэв ыджыд достиженньӧ вӧлі: лои художествоа литературалӧн трибуна, кыпӧдчан-паськӧдчан места. Дерт, ордым сійӧ — ордым и эм, векньыдик трӧпа, но и сійӧ нин вӧлі всё-таки туй.

Тадзи ордымасьӧмӧн миян коми литература быдмис да паськаліс, бурмис и пытшкӧснас. Сылы нин дзескыд лои ордымӧдыд мунны, петны вӧлі колӧ да ударнӧя босьтчыны социализм стрӧитан уджӧ. Пятилеткаса 3-ӧд решающӧй воын, 1931 вося январын, миян литература журналным решитчис шусьыны «Ударник»-ӧн, кутшӧм нимӧн и ӧнӧдз олӧ.

КАПП-лӧн квайт вося нэм чӧжнас вӧлі куим конференция. Медводдзаыс 1926 воын август 21–22 лунъясӧ. Медгырысь сёрниыс вӧлі котыртчӧм кузя да гижан могъяс йылысь кутшӧмсюрӧ индӧдъяс сетӧма.

Мӧд конференция муніс 1928 воын сентябр 7–10 лунъясӧ. Тайӧ конференция кежлас КАПП вӧлі вуджӧма нин ассьыс организационнӧй кадсӧ. Сёрнияс мунісны коми литература водзӧ паськӧдӧм йылысь, коми гижӧд кыв йылысь.

Коймӧд конференция вӧлі 1930 воын октябр 3–5 лунъясӧ. Тайӧ конференцияыс индіс, мый литература кольӧ олӧмсьыс бӧрӧ, эрдӧдіс гырысь нелючкияс: веськыдвыв кежӧм, национал-шовинизм. Но тайӧ конференция вылас жӧ тӧдчисны выль чужӧм уна лёкторъяс.

Дерт, сійӧ став лёкторйыс лои сы вӧсна, эз вермы КАПП руководитны кыдз колӧ партия индӧм кузя да. Торъя омӧля вӧлі пуктӧма критика. Со ӧд кутшӧм примеръяс вӧліны: КАПП-лӧн 2-ӧд конференция ошкис Тима Веньлысь «Трипан Вась» да шуис сійӧс достиженньӧӧн коми литератураын, а 3-ӧд конференцияыс сійӧ гижӧдсӧ шуис шогмытӧмӧн, кулацкӧйӧн. Эз вӧв пыдӧджык видзӧдӧм существо вылас, художество вылас, кор сійӧ гижӧдыс петлӧма, кутшӧм вывод позьӧ сыысь вӧчны. Артмыліс вульгаризаторство. Ӧні важ кусыньяссӧ веськӧдлӧны нин. Важ КАПП-лысь нелючкияссӧ эрдӧдӧны. Коми художествоа литература збыльысь сувтӧ большевистскӧй туй вылӧ. Тайӧ ставыс кутіс лоны сӧмын ВКП(б) ЦК 1932 вося апрель 23 лунся историческӧй шуӧм бӧрын. Сійӧ збыльысь восьтіс сӧветскӧй гижысьяслы паськыд творческӧй туй. Ӧд, босьтам кӧ ми, некор эз вӧв сувтӧдӧма гижысьяс водзӧ татшӧм ёся творческӧй вопросъяссӧ, кыдзи ӧні. Шуам вӧлі быдӧн: колӧ гижны Маркс — Ленин методӧн. Но конкретнӧя, кыдзи-мый, мед быд сӧветскӧй гижысьлы вӧлі восьса да гӧгӧрвоана, сэтшӧм индӧдъяс некор эз ликмывлыны войдӧр. Сы понда сэсся, дерт, и артмывліс быд пӧлӧс нелючкиыс, лёк гижӧдъясыс и гӧрд калтураыс.

Позьӧ татчӧ вайӧдлыны зэв уна пример, кыдзи оз ков гижны произведенньӧяс, сӧмын сійӧ зэв уна места босьтас, да сэсся коді интересуйтчӧ да лыддьӧ коми литература, ачыс аддзас сэтшӧмъяссӧ, кыдз шуласны, «сколько угодно».

ЦК постановленньӧ петӧмсянь коли дзонь во. Ми, коми гижысьяс, асланым уджнаным кӧть и вӧрзьыштім перестроитчӧмлань, но этша на, омӧля на тӧдчӧ, творчествоным важас бура зэлыда на кыскӧ. Мог — регыдджык кадӧн воськовтны важ порог вомӧныс паськыд выль туй вылас. Коми оргкомитет да коми сӧветскӧй гижысьяслӧн медводдза конференция индасны сэтчӧ медматысса мунан вожъяссӧ. Дай аслыным колӧ!


Гижӧд
Казьтылан торпыригъяс

lkejrlkelkrgner klrjnelknfrkl ekjnrjkenfrej

1