ДОМНА КАЛИКОВА


1919 во.

Том Сӧвет республика вылӧ кыпӧдчисны пӧшти став мувывса капиталистъяс, быд боксянь жмитӧны. Торъя сьӧкыд кад вӧлі аръявылыс.

Асыввывсянь топӧдӧ Колчак — Глазовӧ пырӧма.

Лунвывсянь зырӧ Деникин — Тула дорӧ воӧма.

Рытыввывсянь сюйсьӧ Юденич — Петроград бердын зымӧдчӧ.

Войвывсянь кавшасьӧ Миллер.

Со кутшӧм кадыс волі. Сӧвет республика гӧгӧр топавліс и топавліс би кытшӧ — кольлі миян странаным дзик ки пыдӧс пасьта.

Эз бокӧ коль гражданскӧй войнаысь и миян Коми му: воссисны фронтъяс Удораын, Изьваын, Печӧраын, Эжваын. Здрӧгнитіс война гымысь войвывса зумыш парма, шонавліс биӧн, свинечӧн да вирӧн резӧмысь войвывса кӧдзыд вӧр-ваыс, война юкалӧмыс ёнтіс да йиджис сьӧлӧмӧдзыс коми уджалысь войтырлы.

Зэлӧдіс сэки став Сӧвет Союзса уджалысь йӧз ассьыс ыджыд вынсӧ, уклад радъясӧн сувтіс врагъяскӧд водзсасьны. Ӧтпырйӧ кыпӧдчис быд кар, быд сикт, быд фабрик-завод. Став Сӧвет страна пӧри вооружённӧй лагерӧ, воюйтан фронтӧ, уна миллёна Гӧрд Армияӧ.

И вот — вӧрзис тайӧ армияыс враг вылӧ збоя, быд фронтлысь сэк чегъяліс рӧч: рытылӧ, асылӧ, лунӧ и войӧ кавшасьысь врагъясӧс шыбитіс прӧч.

Тайӧ чорыд гражданскӧй война дырйи косясигӧн петкӧдлісны некор вӧвлытӧм геройство да доблесьт миян Гӧрд Армия, гӧрд партизан отрадъяс и торъя ёртъяс.

Тайӧ ыджыд войнаыс чужтіс уна геройясӧс, на пиысь унаӧн петісны ловйӧн, унаӧн и кось вылӧ колины — пуктісны ловнысӧ Октябр вӧсна, Сӧвет власьт вӧсна, став уджалысь йӧзлысь вӧльнӧй олӧмсӧ да уджсӧ видзӧм вӧсна.

Мужикъяскӧд радысь косясисны тшӧтш нывбабаяс и том нывъяс.

Коді эз кывлы Домна Каликоваӧс! Сійӧ олӧм йылысь миян и лоӧ тайӧ висьтыс.

Сыктывкарсянь 5 километр сайын, Выльгорт с/сӧвет улын, эм ичӧтик сикт — Дав. Тайӧ сиктас и чужлӧма комын вит во сайын — 1898 воын — Домна Педӧровна Каликова гӧлиник крестянин семьяын. Батьыс кувлӧма водз. Кольӧмаӧсь нёль чоя-вока дӧва мам ки вылӧ. Вокъясыс Домналӧн — Педӧр да Иван кувлӧмаӧсь жӧ революцияӧдз на, кольӧма сӧмын ӧти чой — Анна, Домнаысь ыджыдджык.

Сьӧкыда, судзсьытӧмпырысь овліс-быдмис Домна, весиг эз вермы прамӧйджыка велӧдчыны — школаӧ ветліс сӧмын ӧти тӧв, велӧдчис церковно-приходскӧй школаын младшӧй отделенньӧын, а сэсся лои эновтны велӧдчӧмсӧ. Гортса удж да кынӧмпӧт корсьӧм падмӧдісны сыысь Домнаӧс.

А гӧльлуныс, сьӧкыд нуждаыс да тшыглуныс пыр ӧтарӧ дзескыдджыка пондісны топӧдны куим эня-нылаӧс. Дас нёль арӧс на эз вӧв Домналы, кор сійӧ мамыскӧд мунісны гортсьыныс кынӧмпӧт корсьны. Веськалісны Кардорӧ, сэні олісны слугаясын ӧти гӧстиничаын — дозмукъяс мыськавлісны.

Тадзи Домна тӧдмасис озыръяскӧд, — эз озырлун перйӧмкӧд, а озыръясӧн гӧльясӧс нартитӧмкӧд.

1912 воын эськӧ Домна мамыскӧд бӧр волісны гортаныс, да тшыглуныс бара вӧтлӧ Домнаӧс йӧзӧ: мӧд вонас сійӧ бара муніс Кардорӧ, а сэсся сетчис Ленинградӧ, кӧні уджаліс ӧти фабрикаын. Тані Домна зэв нин пыдӧдз тӧдмасис робочӧйяс олӧмкӧд, став сьӧкыдыс ас вывтіыс муніс — нартитӧмыс, увтыртӧмыс и нуждаыс.

Куим во мысти Домна Петроградсянь бӧр гортас воліс, но эз дыр ов, бара лои мунны. Ӧні Домна веськаліс Вяткаӧ. Сэні сійӧ тифӧн висьмис. Справитчыштіс да революция дырйи нин бара гортас локтіс. Октябрса революция мездіс Домнаӧс озыръяс вылӧ слугаалӧмысь. Став том, пым сьӧлӧмсьыс сетчис Сӧвет власьт дор.

— Но кутшӧм пӧльза ме верма сетны Сӧвет власьтлы? — шуӧ дӧсадапырысь Домна. — Ме — деревняса малограмотнӧй ныв, гижны ни лыддьысьны прамӧя ог куж, а кутшӧм окота меным кӧть мыйӧнкӧ да мыйӧнкӧ революциялы служитны!..

1918 воын Домна пырӧ важ Усть-Сысольск уездувса видз-му овмӧс юкӧдӧ (Земельнӧй отделӧ), служитӧ сэні курьерӧн-рассыльнӧйӧн.

Збой, повтӧм сьӧлӧма, чорыд вӧляа, сюсь мывкыд-вежӧра кызь арӧса Домна сэки нин петкӧдліс ассьыс революция дор сулалан сямсӧ: собранньӧяс вылын сёрнитігъясӧн вӧлі ставнас ӧзйылас, кодкӧ кӧ мыйкӧ Сӧвет власьтлы паныда шуас либӧ няргӧмӧн кӧ кодкӧ норасьны кутас сьӧкыд олӧм вылӧ.

А медся сьӧкыд воас, 1919 воын, Домна дзикӧдз нин сетчис пролетариат класслы, сувтіс сы дор вермасьысьяс радӧ — октябр тӧлысьын пырис коммунист партияӧ.

— Ӧні ме быттьӧ выльысь чужи, — нимкодьпырысь сэки шуӧ вӧлі Домна. — Вӧлисти быттьӧ мортӧ пӧри. Вайӧ, индӧй менӧ кӧть кутшӧм боевӧй уджӧ — нинӧмысь ог пов! Мыйта эм менам сямӧй, вежӧрӧй, вынӧй, — ставсӧ пукта революция вӧсна.

Сэтшӧм уджыс Домналы, дай уна сюрс уджалысь коми йӧзлы, тшӧтш регыд сюрис. Кык вежон на эз коль Домналы партияӧ пырӧмсянь, октябр 29-ӧд лунӧ войвывсянь, Кардорсянь, Удораса нюръяс, вӧръяс пыр петіс Эжва вылӧ Латкинлӧн еджыд банда. Босьтіс Айкатыла. Командуйтӧ капитан Орлов. Коммунистъясӧс да Сӧвет власьт дор сулалысьясӧс нем жалиттӧг палачьяс лыйлӧны да ловъя вылысь юясӧ пӧдталӧны. Уджалысь йӧз шемӧс ланьтісны. Палачьяслысь локтӧмсӧ зэв нимкодьпырысь встречайтісны попъяс да сиктса озыръяс — купечьяс, кулакъяс, важ урадникъяс да мукӧд пӧлӧс контрреволюционнӧй сволочьяс. Найӧ пемыд арын ӧтвылысь ставныс сьылісны ыджыд лун дырйи моз «Христос воскресе», гажаа бовгисны ыджыд лундырся кодь вичко звӧнӧн.

Пузис палачьяс вылӧ лӧг вирӧн сьӧлӧмыс том коммунаркалӧн. Гӧгӧрвоис Домна Каликова: Коми му вылӧ воис зэв сьӧкыд кад. Палач Орлов, бандит Латкин да налӧн став шайкаыс лӧсьӧдӧны коми уджалысь йӧзлы пекля, найӧ вир вылын каргӧны-гажӧдчӧны нин...

— Воис и меным кад! — шуӧ Домна ревкомын, кор иуда Прокушев вузаліс Емдінын асьсӧ и став отрадсӧ еджыдъяслы да кор чукӧртчӧ вӧлі партизанъяслӧн отрад. — Ме тшӧтш партизанӧн муна! Палачьяслы водзӧс мынтыны! Тшӧтш вай менӧ мӧдӧдӧй.

Аслас синъясыс сідзи и югъялӧны лӧгӧн, чужӧмыс ӧзъялӧ, тӧдчӧ ыджыд решимосьт ставас.

— Кытчӧ нӧ, Домна, тэнӧ мӧдӧдам? Сэні ӧд лыйсьыны колӧ, воюйтны, — шуам сылы.

— Тӧда! Али винтовканад вӧдитчыны ог куж? Кужа! Да фронт вылын уджыд сюрас. Ме муна тшӧтш. Зверъяслысь водзӧс босьтны колӧ уджалысь йӧзӧс мучитӧмысь да виалӧмысь! Ме ачымӧс ставнас пукта революция вӧсна!

— Но мун нӧ, сэтшӧма окотитан да.

Кутшӧм нимкодьӧн петіс сэки ревкомысь Домна.

А час мысти он нин вӧлі и тӧд сійӧс: пасьтасьӧма гӧрдармееч паськӧмӧн, киас винтовка, нимкодьыс ас пиас оз тӧр.

Муніс партизанъяс отрадын кось вылӧ Домна Каликова. Сійӧ вӧлі ӧтнасӧн нывбабауловысь.

Коми уджалысь йӧзлӧн вир киссьӧ и киссьӧ: палачьяс лыйлісны коммунаръясӧс Отйысь, Аквадйысь, Айкатылаысь, Пальысь да уна-уна мукӧд сиктъясысь. Коми муын кыптіс бӧрдӧм: мамъяслӧн, кодъяслысь пиянсӧ виисны, гӧтыръяслӧн, кодъяслысь мужикъяссӧ лыйлісны, посни челядьлӧн, кодъяслысь батьяссӧ юясӧ сюйисны.

Морт вирӧн киськалӧм туй вывті бандитъяс мунӧны увлань — Яренсклань да вывлань локтӧны Сыктывкарлань.

Партизанъяслӧн отрад паныдасис накӧд Часын (Сыктывкарсянь 40 километр сайын).

Домна Каликова сэні медводдзаысь косясис еджыдъяскӧд, косясис пыр медводдза радын.

Сэкисянь сэсся Домна некор нин эз думайтлы ас йывсьыс, эз тӧждысьлы аслас здоровйӧ вӧсна, аслас олӧм понда. Пыр мунліс медводзын, медӧпаснӧй инъясас петавліс, медсьӧкыд уджъяс нуӧдны босьтчыліс.

Домна вӧлі бур разведчикӧн.

— Вай, командир ёрт, лэдзлы менӧ разведка вылӧ ветлыны, — вӧзйысяс вӧлі оз нин Домна, а разведчик Ваня.

— Ветлы, ветлы, — шуас вӧлі командир, — тэныд со кутшӧм мог ме сета: пырны еджыдъяс пӧвстӧ, тӧдмавны налысь вынсӧ да мый кӧсйӧны вӧчны, а аски асывводз бӧр мед тані вӧлін.

— Ладнӧ, вӧча ставсӧ! — вочавидзӧ командирлы Ваня.

Домна вежис не толькӧ паськӧмсӧ мужичӧй вылӧ, но нимсӧ сідзжӧ тшӧтш вежис. Сійӧ эз повлы кутшӧмсюрӧ мужичӧй няр «коммунистъяс» моз, кодъяс еджыдъясысь садьтӧг пышъявлісны сэки либӧ партийнӧй билетъяссӧ косявлӧм бӧрын сетчывлісны бандитъяс милӧсьт улӧ.

Разведчик Ваня воліс пыр стӧч кад кежлӧ да вайліс точнӧй тӧдмӧдъяс враг йылысь. Шойччӧм пыдди Ваня ветлӧдліс сикт кузя патрульӧн, либӧ сулавліс часӧвӧйӧн, либӧ нуис кутшӧмкӧ мӧд пӧлӧс боевӧй удж. Весиг мырдӧн лоӧ вӧлі тшӧктыны сійӧс, мед шойччыштіс, а винтовкаыскӧд некор эз янсӧдчыв, весиг сыкӧд тшӧтш и узьлывліс.

Ӧпаснӧй разведкаясӧ ветлӧмъясысь кындзи Домна радӧвӧй лыйсьысь моз жӧ косясьліс бойяс дырйи. Сідз вӧлі Чукаыбын: Домна медводдза радын тышкасис Прокушев бандакӧд, сідзи жӧ медводзын муніс и Межадор босьтігӧн.

Кор воис центрсянь отсӧг миян отрадлы, кор еджыдъяс пышйисны Сыктывкарсянь Эжва катчӧс, сэки партизанъяслы сетісны ичӧтик шойччӧг. Но Домна и сійӧн весиг эз пӧльзуйтчы: тэрмасьӧмӧн кайис Нёбдінса фронт вылӧ, кӧсйис суӧдны сэтысь отрадсӧ да тшӧтш косясьны еджыдъяскӧд. Домна сэтчӧ воис, кор Нёбдінсӧ вӧлі босьтӧма нин миян гӧрд отрад. Домна зэв нимкодя чолӧмалӧ сійӧс победаӧн да шуӧ:

— Кутшӧма ме тэрмаси воны бой вылас, да эг и су... А бӧрын, тылын, гажтӧм овныс — сэні унджыкыс быттьӧ нидзувъяс веглясьӧны. Вайӧй меным ӧдйӧджык кутшӧмкӧ боевӧй удж!

Еджыдъяс сувтлытӧг кайисны Аныбӧдз. Сэні найӧ чорыда укрепитчисны.

Домна оз вермы терпитны, мед бандитъяс ыджыдалісны да издевайтчисны коми уджалысь йӧз вылын.

— Вӧтлыны колӧ палачьясӧс сэтысь! Вай, лэдзлӧй менӧ на дінӧ разведкаӧн ветлыны! — вӧзйысьӧ Домна. — Ме тӧдмала, мый найӧ кӧсйӧны керны, ыджыд-ӧ налӧн вынныс.

Лэдзисны Домнаӧс. Сійӧ пасьтасис прӧстӧй деревняса нылӧн да муніс Аныбӧ, зверъяслы веськыда вомас. Тайӧ вӧлі Домналӧн медбӧръя разведка. Сійӧс еджыдъяс кутісны, вайӧдісны асланыс штабӧ, сэні тӧдмалісны, да Домна эз и соссьысь. Зарни погонаяслы сійӧ веськыда синмас и шуис:

— Ме — коммунистка. Локті тӧдмавны тіянлысь, палачьяслысь, выннытӧ.

Домнаӧс нӧйтӧны прикладъясӧн, тшӧктӧны висьтавны гӧрдъяс йылысь: уна-ӧ налӧн выныс да оружйӧыс. Домна нинӧм оз висьтав, сӧмын лӧгпырысь збоя шуӧ:

— Ті, сволочьяс, месянь нинӧм онӧ босьтӧй, нинӧм ме тіянлы ог висьтав. Ме ог пов тіян лыйлӧмысь. Мед ме кула, мед ті менӧ вианныд, но коммунизм оз кув, сійӧс тіянлы не вины!

Татшӧм кывъяссьыс еджыд офицеръяс веськыда пиньяснысӧ йирӧны, сэтшӧма скӧрмисны. Домнаӧс нӧйтӧны, издевайтчӧны сы вылын. Сэсся аддзӧны: нӧйтӧмӧн да грӧзитӧмӧн нинӧм оз ло. Сетӧны сэки Домнаӧс поручик Евдокимов ордӧ, сэні сійӧ оліс вежон кымын. Евдокимов кӧсйис мудерлунӧн перйыны Домнасянь колан сведенньӧяс, кӧсйис английскӧй печенньӧясӧн да шоколадӧн варовмӧдны сійӧс. Но Домна нинӧм эз висьтав.

Сэки еджыд палачьяс шуисны:

— Но сідзкӧ тэныд ӧти туй коли — лыйлам понйӧс моз!

— Ме сійӧс тӧда, сыысь ог и пов! Ме ог пон моз кув, а кула кыдзи коммунистка, Октябр вӧля понда! Но помнитлӧй: регыд и тіянлы, палачьяслы, пом воас!

Домнаӧс мӧдӧдісны конвойӧн Кулӧмдінӧ губернятӧм губернатор Латкинлы допрос вылӧ.

— Ноко, гӧрд шпионка, висьтав, уна-ӧ тіян отрадлӧн выныс? — юалӧ губернатор.

— Окота кӧ тӧдны тэныд, ачыд лэччыв Сыктывкарӧ да и тӧдмав. А ме нинӧм тэныд ог висьтав. — Тадзи збоя вочавидзӧ Домна.

— Тэнӧ лыйлам сідзкӧ! — лёкысь сэки шуӧ Латкин.

— Тӧда! Мед ӧтнам пӧгибнита, а ассьым ёртъясӧс ог вузав!

— Сувт пидзӧс вылад да юрбит, мед енмыс прӧститас тэнсьыд грекъястӧ да примитас пон ловтӧ!

Домна зывӧкпырысь сьӧлыштіс да шуис:

— Ме — коммунистка, некутшӧм енмӧс ог тӧд!

Латкин тшӧктіс йӧртны Домнаӧс арестнӧй помещенньӧӧ. Сэні сійӧ войбыд вензис да пинясис караульнӧйяскӧд, а асывводзнас нуисны Домнаӧс Помӧсдінӧ палачьяслы.

Кор вайисны Домнаӧс лыйланінас, сылысь первой чегъялісны кияссӧ да вӧлисти лыйлісны. Домна сэки медбӧръяысь горӧдіс:

— Менӧ вианныд, коммунизмӧс не вины! Мед олас коммунизм!

Тадзи кулі коми героиня, том коммунарка — Домна Каликова. Шойсӧ сылысь шыбитісны лым пиӧ.

Кык тӧлысь мысти гӧрдъяс вермисны, март 4-д лунӧ босьтісны Аныб, весалісны еджыд бандитъясысь Коми му.

Домна Каликовалысь шойсӧ аддзисны лым пиысь да вайисны Сыктывкарӧ.

1920 воын март 24-д лунӧ Домнаӧс дзебисны Кырув вичкодорса кладбище вылӧ.

Уна сё морт колльӧдіс медбӧръяысь збой коммунаркаӧс — Домна Каликоваӧс: став карса партийнӧй организация, став карса комсомол организация, став карса учрежденньӧясысь служащӧйяс, став карса гӧрдармеечьяслӧн гарнизон, уна граждана Сыктывкарысь, Выльгортысь и Давйысь.

Коли 13 во. Сӧвет страна важӧн нин путкыльтіс став врагъясӧс, ёнмис, кыптіс, пырис социализмӧ, мый вӧсна косясис да ассьыс олӧмсӧ пуктіс тшӧтш и Домна Каликова.

Коммунист партия веськӧдлӧм улын ми лӧсьӧдім му сяр квайтӧд юкӧнын вӧвлытӧм выль мир. Уна воддза дойяс бурдісны, уна важторъяс вунласис, но Октябрса геройяслӧн нимъясыс оз вунны. Оз вунлы коми уджалысь йӧз сьӧлӧмын и Домна Каликовалӧн нимыс. Нэм чӧж сійӧ гӧрд кодзув моз кутас яра дзирдавны.


Гижӧд
Домна Каликова
Жанр: 

lkejrlkelkrgner klrjnelknfrkl ekjnrjkenfrej

1