ЛУЧА

(Висьт збыль)


ТИСТ ИВАН


Чукыль-мукыль, джуджыд вӧра пармаяс пӧвстӧд, еджыд ялаа мича ягъяс пыр, уна пӧлӧс расъяс вомӧн, веж туруна видзьяс дорӧд, изъя косьяс вывті, посньыдик коми сиктъяс пӧлӧн, войвывсянь лунланьӧ шывгӧ-визувтӧ Висер ю. Тэрыба шульӧдӧ Висер, быттьӧкӧ тэрмасьӧ ӧдйӧджык мамыслы — паськыд Эжвалы — веськыд киняулас пырны. Шойнатысянь квайт километр сайын Висерӧс шымыртӧ Эжва, нуӧ сьӧрсьыс водзӧ да водзӧ — рытывлань, рытыв-войлань, войлань, — кытчӧдз оз ачыс вош кӧдзыд Вой саридзӧ.

Туй кузя Висер вожӧ кайигӧн (туйыс кежӧ Шойнатысянь) ковмас вуджны «Мусюр» вӧлӧк, кызь нёль килом. кузя. Сэсся воас медводдза сикт — Джиян, — сулалӧ Висер ю дорын, джуджыд ыб вылын. Джиянӧ пыригӧн лоӧ бура ыджыд чой (кыр) кайны. Дзик чой йылас, мир туй бокас, шуйгавылас лунӧ банӧн сулалӧ важиник керка. Рытывладорыс ичӧтик переруба («чулана»). Стенас тувъялӧма роч гижӧда пӧв: «Ивановская советская станция». Тайӧ керкаыс джиянса крестянинлӧн — Тист Иванлӧн.

Коді оз тӧд Тист Иванӧс! Висер вожӧд и Ньывсер вожӧд быдӧн тӧдӧны сійӧс — ылӧ гӧгӧр нималӧ!.. Тист Иван, кыдз шуласны, «ничево» олӧ: видз-му тырмымӧн, видзӧ вит мӧс, нелямын душ ыж, зэв ён воронӧй вӧв, дай курӧгъясыд на тырыс. Яйысь ни, йӧлысь ни, выйысь ни, вурунысь ни, колькйысь ни, нинӧмысь некор нужда оз тӧдлы Тист Иванлӧн семьяыс. Сэсся зіль мортыдлӧн быдлаӧ киыд судзсьӧ: гожӧмнад тырыс черитӧ кыйлӧ, — майбыр, оз ков ылӧ мунны: юыд ныр улас; арнад — вӧралӧ, чӧскыд вӧр пӧтка яй сёйӧны — еджыд чигъя сьӧлаясӧс, сыла-госа дозмӧръясӧс — вийӧръясӧс, чукчиясӧс; тӧвнас ветлӧ-мунӧ деньгатор нажӧвитны — гын сапӧгъяс вӧчавны (Тист Иван тӧдӧ гындей-мастерство). Весь ӧд ог шу: Тист Иван, мися, «ничево» олӧ.

Ме сыкӧд таво гожӧмнас медводдзаысь на тӧдмаси, Висер вожӧд коми сьыланкывъяс гижавны ветлігӧн. Ми тӧварышкӧд вӧлі уджалам Висер сиктын (Богородск). Ӧтчыд кыдзкӧ лун шӧр гӧгӧрын пырис миян патераӧ кутшӧмкӧ гажа морт: ичӧтик тушаа, гӧгрӧсіник чужӧма, дзоляник сьӧд уска-тошка, лёкиник пинжака, гын сапӧга (петыр видз дырйи).

— Чолӧм, другъяс, здрасте! — шуӧ мортыд. Ачыс ӧти местаын оз весиг вермы сулавныс — пыр ӧтарӧ-мӧдарӧ, водзӧ да бӧрӧ, жӧдзӧ джоджас, кыдз шуласны, «прамӧя тӧла мортыдлы». Сэсся сёрнитігас неуна лажӧдчыштлӧ пыр, юрсӧ ӧтар-мӧдар бок вылас катовтлӧ, кияснас шеныштлӧ. Зэв тешкодь «элемент»!..

— Здорово! — воча шуам сылы. — Мый висьталан, тӧварыш?

— Ті ӧд, дерт кӧнкӧ, другъяс, билетъясӧн сӧветскӧй станцияяс пыр ветланныд?

— Сідз, дерт. А мый нӧ эськӧ?

— Аттӧ, едьӧна сила!— аслыс моз шуис «гӧсьт» балябӧжсӧ гыжйыштігтырйи. — Ті, муса другъяс, кыдзкӧ-мыйкӧ энӧ жӧ штрапуйтӧ менӧ, пӧжалуйста... Ме лоа Джиянса сӧветскӧй станция кутысь. Вайи татчӧ Ягвывса мельникӧс. Сійӧ менӧ, екуня-ваньыд, «русскӧй горкейӧн» гӧститӧдіс да, ме кутчыси колльыны сійӧс гортӧдзыс — праздничайтігмоз: видзӧд, сэні аскомысь (вӧскресенньӧӧ) крам праздник — Микӧла лун... Гортын коли толькӧ баба, вӧлӧй тані... Гашкӧ, тіянӧс лэччӧдныд оз другӧн вӧвъясыс сюрны да, энӧ жӧ штрапуйтӧ менӧ, другъяс.

— Ми тані олам на выльлунъясӧдз, сэтчӧдз тэ бӧр на воан гортад.

— Сійӧ ӧд и эм, другъяс, ог, ме чайта, во, едена силаыд... Видзӧд, вӧскресенньӧнас празднуйта Ягвылын, выльлуннас — Одыбын, дай Тистын на ковмас и... Кыдзкӧ, гашкӧ, воторникӧ рытланьыс верма бӧр гортӧ воштысьны... А сыысь дырсӧ оз жӧ позь меным гуляйтныс: видзӧд, серӧданас — купальнича Иван лун, Джиянад крам праздник, кӧзяинтӧг оз позь...

— Нинӧмла тэныд, тӧварыш, сэтшӧма тӧждысьнысӧ: ми сійӧ лунсӧ Джиянад жӧ кӧсъям овны — тшӧтш «празднуйтны», — шмонитам ми.

— Но! Сідзкӧ тай зэв бура артмас, екуня-ваня!.. Ті, другъяс, ме ордӧ пырӧй, милости спросим!.. Станцияыс ӧд ме ордын... Ме ӧд — Тист Иван, ог «кое-как» ов! Вит мӧс видза, нелямын душ ыж, а Воронкоыс менам, екуня-ваня! Ук, едена сила, став Висер вожас абу сэсся мелӧн кодь вӧлыс!.. Ме ӧд, другъяс, коркӧ коммунист жӧ вӧлі. Ӧні кӧть и абу партияын, а коммунистӧн на ачымӧс лыддя... Шуа тай: мися, ме ог «кое-как», другъяс, ов!..

— Кутшӧм варов морт Тист Иваныд вӧлӧма, — шуим ми ас костын, кор сійӧ муніс миян дінысь.

Збыльысь, Тист Иваныд сэні меным кажитчис зэв варовӧн. Вӧлӧмкӧ, «вина чадйыс» сійӧс ворсӧдӧма: садь юрӧн сійӧ зэв рам, этша сёрниа морт вӧлӧма. Вӧвлӧма сійӧ и партияын, — пыравлӧма «беднота комитетъяс» дырйи (Висер вожад, гашкӧ, сюрс коммунист вӧлі да), сэсся воддза воӧ и «киритӧмаӧсь» сэтысь. Гӧтырыс висьталӧм серти, делӧыс со кыдзи вӧлӧма. Висерад пӧшти быд морт — кыйсьысь-вӧралысь. Тист Иваныд сідзжӧ прамӧй окотник. Ӧтик кыйсьысь кыдзкӧ аддзӧма руч трӧпа да, капкан сэтчӧ пуктас. Капканад коркӧ ручыд и шедас, толькӧ пружинаыс вывті чорыд вӧлӧма да, ручыдлӧн лапаыс дзикӧдз орӧма. Ручыд куим кокӧн пышйӧма. Тист Иваныд аддзас сылысь гырдӧсь кок туйсӧ да вӧтчас сы кузя лызьӧн. Дыр мысти суас, дай лыяс. Ваяс сэсся ручӧс гортас, куляс, кучиксӧ вузалас. Мӧд кыйсьысьыд коркӧ локтас капкан дінас да ёна и шензяс да матькас:

— Аттӧ, — шуӧ, — кузь лешак! Шедлӧма трасичаыд да, лапаыс орӧма... Тьпу! — сьӧлыштас руч лапа вылӧ; сюяс сэсся лаз мешӧкас лапасӧ да ёрччигтырйи гортас локтас.

Ручтӧ кыйӧмыд — абу дас сизим ура кӧчӧс кыйӧм: сэтшӧм шуд йывсьыд ёнджыка сёрнитӧны, юӧрыд ылӧджык кылӧ. Капкантӧ пуктылысь мортыдлы недыр мысти сідзжӧ кывсяс: Тист Иванлы пӧ руч шедӧма, куим кока пӧ, веськыд водз лапаыс пӧ капканӧн, тыдалӧ, орӧма... Коркӧ-некоркӧ делӧыд та йылысь и судӧдз воас. Сэні шуӧмаӧсь: быттьӧ пӧ Тист Иваныд ручтӧ капкансьыс лыйӧма, лапасӧ пӧ наросьнӧ орӧдӧма сэсся да кольӧма (пуктӧма) капканас, медым пӧ чайтісны капканӧн орӧмӧн. Судитӧмаӧсь Тист Иванлысь перйыны сьӧм руч ку доныс да сетны воддза кыйсьысьыдлы. Таысь и партиясьыс сэсся Ивантӧ вӧтлӧмаӧсь. Тист Иван та понда оз зэв шогсьы:

— Мед кӧть и вӧтлісны, — шуӧ, — а ме сё-таки ачымӧс коммунистӧн лыддя...

Код тӧдас, мый сылӧн «лов саяс», пытшкӧсас, а ортсысяньыс, збыльысь, тыдалӧны кутшӧмсюрӧ выльногса «признакъяс». Босьтам кӧть ӧтитор: керкаас абу некутшӧм «ен» (ӧбраз), — важӧн нин ставсӧ черӧн керавлӧма да пачын сотӧма. «Ен джаджъяс», ӧбразъяс пыдди, сулалӧ Ленинлӧн портрет, стенъясас сідзжӧ ляскалӧма сӧветскӧй картинаяс — портретъяс, плакатъяс, лозунгъяс. «Важ кӧлуйысь» стенын ӧшалӧ, кӧрт тув йылын, толькӧ ӧтик... ратник-погон. Тист Иваныд вӧлӧма ратник — мобилизуйтлӧмаӧсь война вылӧ, аддзылӧма Карпат гӧраяс. Став воюйтӧмсьыс «награда» пыдди сэсся и кольӧма тайӧ погон пӧлыс...


«НОВОЛУЧИНСКИЙ»


Семья Тист Иванлӧн абу на зэв ыджыд — нёль душ: ачыс, гӧтырыс — Ликӧ (Ликеръя), ичӧтик тушаа, зэв варов ань, да кык пи: ӧтикыслы ар кӧкъямыс кымын, мӧдыслы — нёльӧд вылӧ петӧма. Бӧръя кагасӧ Ликӧ вайӧма тӧлын, рӧштво видз дырйи. Сэки Тист Иван коммунистӧн на вӧлӧма.

— Иван, пыртны жӧ ӧд, кӧнкӧ, кагатӧ ковмас? — шыасис Ликӧ челядясьӧм бӧрас.

— Кутшӧм али пыртӧм? — скӧрысь шуис мужикыс. — Абу ӧд тэныд важ режим. «Пыртны»... Выль ногӧн ставсӧ вӧчам — октябритам тайӧ писӧ, кыдз пӧлагайтчӧ...

— Мый нӧ сійӧ «тябритӧмыс» лоӧ? Нимтӧм лоӧ ладинечным али мый?..

— Сетам и ним сылы, эн шогсьы. Дерт, огӧ пуктӧ кутшӧмкӧ «святӧй» ним, сійӧ лоӧ «леригиознӧй дурман» миян ногӧн... Час, ме думайта да ачым бӧръя сылы нимсӧ.

Мӧд луннас самӧй вӧлі партияса ячейкалӧн чукӧртчылӧм. Тшӧтш сэні и Тист Иван вӧлі. Кутшӧмсюрӧ ячейкаса уджъяс йылысь сёрнитӧм бӧрын сійӧ корис кыв, сувтіс пызан дорӧ дай шуӧ:

— Со мый ме кӧсъя тіянлы, тӧварышъяс, висьтавны. Тӧрыт менам пи чужис. Кыдзи коммунист ме, дерт, ог вичкоӧ ну сійӧс пыртны, няйт купельын тюльскӧдны. Ми мый вермам бырӧдам леригиознӧй дурмансӧ йӧз костысь, некутшӧм енлы ни чӧртлы огӧ веруйтӧ. Сідз жӧ ме кӧсъя быдтыны и ассьым челядьӧс, торъя нин тайӧ выль чужысьсӧ. Гашкӧ, ме ӧтнам ог сяммы сылы прамӧйджык ним корсьны да, вайӧ, тӧварышъяс, ӧтвылысь бӧръямӧй кутшӧмкӧ выль ним...

— Вот, другӧ, Иван Пеоктистӧвич, бур делӧ тэ вӧчан! — шуӧ ячейкаса секретар сэки. — Тэ — медводдза морт на Ыджыдвидз вӧлӧсьтад, дай, гашкӧ, став Висер вожас да, октябринатӧ кагаыдлы лӧсьӧдысьыд. Ме чайта, тэ бӧрся и мукӧд сэсся вӧтчасны... Но, вайӧ, тӧварышъяс, ставныд думайтӧй, кутшӧм ним сетны Иван пилы.

Бура дыр юр вемнысӧ бертлӧдлісны собранньӧ вылын Иванлӧн тӧварышъясыс. Быдсяма нимъястӧ кыпӧдавлісны эськӧ да, ставыс кутшӧмкӧ жебиник ним, некытчӧ туйтӧм.

— Медым вӧлі чорыд ним, дай «гӧрд рӧма», — шуӧ Тист Иван.

— Сідзкӧ «Кыа» пукты, — шуӧ ӧтик.

— «Кыаыд» — ныв ним, дай татшӧм нимъясыд эмӧсь нин Коми муад... Колӧ кутшӧмкӧ вӧвлытӧм выль ним сетны...

— Сет «Дозмӧр»! — горӧдіс мӧд тӧварыш.

— Дозмӧрыд ӧд абу гӧрд, — сійӧ сьӧд пӧтка.

— Син дорыс ӧд гӧрд жӧ сылӧн.

— Оз ков, мисьтӧм ним сійӧ.

— «Ур»! Гожся урыд ӧд гӧрд...

— Звер нимыд абу лӧсьыд, дай сійӧ небыд, колӧ чорыдджык ним эськӧ сетны, — шуӧ Иван элясигмоз.

— Чорыд кӧ колӧ, пукты пиыдлы нимсӧ «Сизь»: сійӧ гӧрд и чорыд, нырыс дзик уклад кодь, — кодкӧ бара шыасис.

Ставныслӧн сэтчӧ серамыс петіс, весиг секретар тшӧтш нюммуніс. Иванлы таысь эз ло лӧсьыд быттьӧ, сӧмын нинӧм эз шу.

— Гашкӧ, тэ, тӧварыш Попов, ачыд кутшӧмкӧ ним думайтін пиыдлы? — юалӧ секретар Тист Иванлысь.

— Эм эськӧ, тӧварышъяс, ӧтик ним да, ог тӧд, глянитчас оз тіянлы, дай бура кузь — кык судта... Ті тӧданныд, тӧварышъяс, во нёль сайын миян Коми муын овліс Пинега-Печӧраса штаб. Сійӧ штабас вӧвлі зэв бур коммунист-агитатор — Чумбаров-Лучинский, ыджыд сьӧлӧма морт, нинӧмысь вӧлі оз пов, гӧтов биӧ кӧть ваӧ пырны революция вӧсна. Воддза воӧ (1921 воын) сійӧ усьӧма Кронштадтса бунттӧ бырӧдігӧн. Вот ме эськӧ и кӧсъя вӧлі аслам кагалы сетны нимсӧ сійӧ паметь кузя, медым быдмас да сэтшӧм жӧ повтӧм сьӧлӧма лоас, — выль Лучинскӧй... Ог тӧд, кыдз тіян ногӧн, шогмана нимыс тайӧ али абу.

— Зэв шогмана, тӧварыш! — нимкодьпырысь шуӧ секретар. — Кыдзи тіян ногӧн, тӧварышъяс? — юалӧ собранньӧлысь.

— Зэв бур ним!.. Шань!.. Шогмана!.. Сулалӧ сэтшӧм нимтӧ и сетны! — мӧда-мӧд вежымысь чукӧстчисны собранньӧвывса йӧз, гора кекӧначигтырйи.

— Сідзкӧ «Чумбаров-Лучинский» лоӧ пиыдлӧн нимыс, Иван Пеоктистӧвич? — шуӧ секретар. — Зэв бур ним, дай аслыд глянитчӧ...

— Огӧ дзик сідзи шуӧ, тӧварышъяс. «Чумбаров-Лучинский» — вывті, гашкӧ, ыджыд ним лоӧ джиянса сьӧд мужик пилы... Ме эськӧ кӧсйи шуны неуна небыдджыка — выль Лучинскийӧн: нимсӧ сетны «Новолучинский», овыс мед вӧлі «Чумбаров», ставнас кӧ шуны — «Новолучинский Чумбаров». Позьӧ оз тадзи, тӧварышъяс?

— Позьӧ, позьӧ! Зэв бур! — бара горӧдісны ставныс.

Сійӧ луннас жӧ (вӧлі вӧскресенньӧ), собранньӧ бӧрын, Тист Иван пыраліс ыджыдвидзса вӧлісполкомӧ да гижӧдіс ассьыс кагасӧ «Новолучинский Чумбаров» нимӧн.

Пемдігӧн нин Тист Иван воис гортас. Нимкодьпырысь висьталӧ гӧтырыслы:

— Тӧдан, Ликӧ, кутшӧм ним ме сеті кагаыдлы?

— Кутшӧмӧс нӧ?

— «Новолучинский»!..

— Мыйсяма ним нӧ тайӧ?.. Морт ним жӧ?

— Морт ним, дерт, дай зэв бур морт ним ещӧ! Гӧгӧрвоан, мый сійӧ лоӧ комиӧн? «Новолучинский» лоӧ «новӧй луч» — выль югӧр. Эн вунӧд!.. Ӧні ӧд гӧгӧр сявкйӧ выль югӧр — Сӧветскӧй власьтлӧн югӧрыс.

— Зэв жӧ нин тешкодь ним пуктӧмыд, Иван. Эз ӧмӧй сюр кутшӧмкӧ прамӧйджык морт ним: Микулай ли, Закар ли, Ӧсип ли, мый ли... «Новочукыль»... он весиг шуныс вермы... Йӧз серам!..

— «Новолучинский» — зэв лӧсьыд ним, дзик ӧніяса сӧветскӧй ним. Некутшӧм «йӧз серам» сэні абу.

— Сідзи и нэм кежлас лоӧ? — повзьыштӧмпырысь юалӧ Ликӧ.

— Кыдз нӧ сэсся, — дерт, сідзи. Сідзи нин исполкомын шнурӧвӧй нигаӧ гижӧма; сідзи и кувтӧдзыс кутас шусьыны. Ме со — Иван, тэ — Ликерья, а тайӧ Новолучинский...

— Пырттӧг?.. Гашкӧ, и пернатӧг да?..

— Мый трустла сійӧс кӧвъявныс, сытӧг олас!

— Кыдзкӧ быттьӧ абу жӧ лӧсьыд сідзтӧ...

— Зэв лӧсьыд!.. Татшӧм бур нимыс, гашкӧ, став Коми муас на абу, непӧштӧ миян Висер вожын!..


«ЛУЧА»


Ыджыд шензьӧм, сералӧм да быд ногӧн вӧйпӧм кыптіс джиянсалӧн, кор кывсис Тист Иванлӧн «йӧйталӧмыс». Кӧнкӧ кӧ паныдасясны кык баба, сы йылысь и сёрни налӧн:

— Кывлін, сваття, Тист Иваныдлысь дурӧмсӧ?

— Кывлі, кывлі, сваття... Шензьыныд он вермы, мый кутіс ӧні вӧчсьыны му вылад!.. Сё господи, пырттӧг ни, пернатӧг ни ладинечӧс видзӧны?!.

— Сійӧ ӧд и эм, сваття... Быттьӧ сылӧн абу морт лов, быттьӧ сӧстӧм ладинечыд сылы — кычипи... Ликӧыс пӧ зэв шогсьӧ эськӧ да, мый коньӧр бабаыд вермас вӧчны...

— Тыдалӧ, сваття, му вежан кадыд матын жӧ нин... Мед но ачыс енлы оз веруйт, — коммунист пӧ сійӧ да, — колі жӧ ладинечтӧ кӧть пыртны... Нимсӧ пӧ зэв тешкодьӧс сетӧма ачыс и, кутшӧмкӧ «Новӧй чулан» ли, мый ли, югъявны пӧ тай ставыс кутас-а... господьыс тӧдас, мый и вӧчӧны ӧні!..

Медся ёна, дерт, Тист Иван вылӧ лӧгасисны рӧдняясыс, торъя нин тьӧщаыс. Син водзын эськӧ оз лысьт зятьсӧ видны да, нывсӧ быд аддзысьлігӧн топӧдлӧ:

— Тэ, Ликӧ, непременнӧ пырт кагатӧ. Мед йӧй Иваныд кыдз гажыс олас-а, сӧстӧм ладинечӧс пырттӧг видзны оз позь... Абу ӧд сійӧ кычипи!.. Кулӧ кӧ загреки — тэ ӧд, люба, лоан ен водзын мыжаыс...

Ликӧ сӧмын сэтчӧ сьӧкыда ышловзяс-а, нинӧм оз шу.

Вежон мысти Тист Иван лэччис Маджаӧ вӧчасьны — гындеявны. Сы бӧрын Ликӧӧс дзикӧдз нин йӧршитісны, топӧдісны, веськыда лолыштны оз лэдзны — мырдӧн тшӧктӧны кагасӧ пыртны.

— Ме ачым нин ог тӧд, мый и керны, — шогпыр шуас Ликӧ рӧдняясыслы. — Пырті эськӧ кӧть да, Иванысь пола: кывлас кӧ — нӧйтас менӧ...

— Некод весиг оз тӧдлы, гусьӧник кыдзкӧ войнас вичкоӧ нуыштлы дай... Бӧрвылас кӧть и тӧдас — нинӧм оз ло; гашкӧ нӧ, неуна зыньгыштас, сэсся бурасяс. Медтыкӧ пыртӧмыс лои-а, сэсся кӧть мый вӧч эштӧм бӧрад... Да ӧд, Ликӧ, пырттӧм-пернатӧм ладинечӧс видзӧм дорысь лучшӧ нин ичӧтик нӧйтӧм терпитны, он ӧмӧй ачыд гӧгӧрво сійӧс...

Пыр ӧтарӧ тадзи долисны да долисны Ликӧлы, некытчӧ пемыд аньыдлы воштысьны лои, дай сетчис — Новолучинскийӧс пыртӧдіс вичкоын, купельын. Ӧтчыд рӧштво бӧрын, зэв нин сёрӧн рытнас, корис Ликӧ аслас рӧдняяс костсьыс вежай-вежаньӧс да найӧ, вой шӧр гӧгӧрын кымын, нуисны Тист Иванлысь октябритӧм кагасӧ Ыджыдвиддзӧ, поп ордӧ, пыртны... Поп бура дыр первой петитчис пыртӧмсьыс:

— Ӧпаснӧ кыдзкӧ быттьӧ... Иван енлы оз веруйт, вичкоӧ оз волывлы... Тӧдлас дай — менӧ тшӧтш зупкӧдас коркӧ гажа юрӧн... Тӧда ӧд ме сійӧс: карактерыс зэв омӧль код юрнас, вывті кокни киа сэки... Дай сэсся ещӧ коммунист сійӧ... Пола кыдзкӧ ме пыртныд сылысь кагасӧ...

Дыр кевмысьӧм мысти да бура ыджыд калым мынтӧм бӧрын поп пыртіс жӧ кыдзкӧ Новолучинскийӧс. Нимсӧ сетігӧн бура дыр попыд лукрасис-корсьысис «святцыысь», сэсся кагалы пуктіс нимсӧ Лука, куимысь помся купельӧ тюльгыліс: «Крещается раб божий Лука», — шуалігтырйи. Регыд эштіс — пыртсис.

— Мед гортас шуасны «Лучаӧн»: сідзсӧ пӧшти ӧткодь и лоӧ Новолучинскийыдкӧд нимыс... Нимлуныс талӧн лоӧ тӧлысь мысти рӧштво лунсянь, январ 25-д лунӧ миян святцы серти... Да мед бара Иваныслы кыдзкӧ оз жӧ кывсьы та йылысь — нӧйтас, мися, сійӧ менӧ.

Сӧмын тай эз зэв дыр видзсьы гусьӧннад тайӧ уджыд: сійӧ лунъяснас жӧ разаліс юӧр Новолучинскийӧс пыртӧм йылысь. Воис тайӧ юӧрыд и Маджаӧдз, кывсис Тист Иванлы. Гудыртчис сылӧн сьӧлӧмыс лёк юӧрсьыд, быттьӧ зі чушкис — сотыштіс, вемӧдзыс йиджис «забедаыс». Зумыштчис, жугыльтчис дай скӧрмис Тист Иван:

— Кыдзи нӧ, едена сила, баба лысьтіс менсьым Новолучинскӧйӧс пеж няйт купельын пыртны? — ас костас шуасьӧ ёрччӧм сорӧн. — Збыль кӧ пыртіс — ёна жӧ трасичаӧс и жбоньӧда!.. Лешак! Пырысьтӧм-пыр жӧ и торйӧдча!.. А попӧс, кузь юрсиа чӧртӧс, веськыда ныра, став юрсисӧ нетшка, едена сила! Мед водзӧ кежлӧ тӧдны кутас, кутшӧмджык религиознӧй дурмантӧ йӧз костӧ разӧдӧмыд... Октябритӧм кагаӧс купельын пыртны?!. Едена сила! Часлы, петкӧдла ме ставныслы, гортӧ воа да!..

Быдӧн зэв ёна тӧждысьӧны: поп и, Иван и, рӧдвужыс и, медъёнасӧ шогсьӧ да полӧ Ликӧ. Толькӧ ичӧтик «Луча» нинӧм оз пыдди пукты, ставыс сылы веськодь. Сійӧ либӧ узьӧ потанын (зыбкаын), либӧ бӧрдӧ, либӧ нёнясьӧ — кор юмов мам нёнь, кор шоммӧм сюр нёнь.

Вежон куим кымын Тист Иван вӧчасис Маджаын. Ликӧ оз на вӧлі виччысь сійӧс гортас. Кыдзкӧ ӧтчыд Василей лун (выль во) бӧрын, асывводзын (Ликӧ вӧлі самӧй пӧжасьӧ) нинӧм виччысьтӧг керка ӧдзӧс дзирс воссис да бырс пырис гортас Тист Иван, — бура «гажа» ачыс-а, зумыштчӧма. Ликӧлӧн быдӧн сьӧлӧмыс ыркнитліс первойсӧ.

— Тэ нӧ мый, едена сила, вӧчӧмыд менам ветлігкості? — пӧрччысьтӧг ни нинӧм топӧдіс Иван гӧтырсӧ. — Новолучинскийӧс пыртӧмыд вичкоын, купельын?

— Чӧ-ӧв, Иван!.. Эг жӧ ме пырт?.. Коді нӧ висьталіс тэныд?

— Быдлаын гӧгӧр сы йылысь сёрнитӧны. Висьтав, кыдзи тэ лысьтін, трасича, октябритӧм кагаӧс пыртны?

— Да он ӧмӧй верит, Иван? Эг, мися, пырт, ей-бог, эг пырт, прӧста больгӧны...

Иван уськӧдчис потанлань, «Луча» дінӧ (самӧй вӧлі зэв чӧскыда сійӧ узьӧ); разис рузумъяс, восьтіс дӧрӧм морӧссӧ — югнитіс ичӧтик ыргӧн перна, кӧвсӧ орӧдіс, нетшыштіс.

— Этійӧ нӧ мый эськӧ, а?!.. Пыртӧмыд дай перна ӧшӧдӧмыд, стерво!.. Ещӧ и соссян?.. Босьта да, вот став лёзьтӧ кушта! — зэв скӧрысь шуасьӧ, видӧ бабасӧ. Перна чегъяліс чуньяс костас, торпыригсӧ лӧканьӧ шыбитіс. «Луча» садьмис, бӧрддзис небыдика. Ликӧ босьтіс моздорас, нёньсӧ вомас сылы сюйис да, кага ланьтіс.

— Сійӧ... сідзи, Иван... Эг пырт, мися, кагатӧ... Пернасӧ сідз ӧшӧдлі. Вывті ёна быдӧн кутісны серавны дай ӧшӧді: мед, мися, чайтасны кагатӧ пыртӧмӧн...

— Менӧ он пӧръяв, ставсӧ тӧдмала, екуня-ваня!.. Збыль кӧ пыртін — аски жӧ торйӧдча тэкӧд... Ачымӧс страмитны ог понды тӧварышъяс водзын!..

Петаліс суседъясас юасьны-тӧдмасьны, збыль-ӧ пыртіс бабаыс кагасӧ, сӧмын нинӧм некод лючки оз висьтав: йӧзлы нӧ кутшӧм мог Тист Иван семьяӧдз!

— Ми бара, Иван, нинӧм огӧ тӧдӧ, эгӧ аддзылӧ ни!.. Гашкӧ, Ликӧыд и пыртіс, гашкӧ, и эз... Код тӧдас йӧз кост олӧмтӧ? — висьталісны Иванлы суседъясыс.

— Но, ладнӧ. Аски поп ордӧ ветла. Кыдз топӧда сійӧс чорыдджыка — небось висьталас ставсӧ, едена сила!..

Рытнас сёрниттӧг ужнайтіс Иван, сёрниттӧг и узьны водіс. Войнас унаысь садьмыліс, сьӧласис, мыйкӧ броткӧдчис аслыс, нёльысь ли витысь куритчис. Ликӧ синсӧ эз жӧ куньлы; войбыд думайтіс: «Мый бара аски лоӧ-а?.. Нӧйтас, дерт, менӧ... Колӧма жӧ эськӧ ставсӧ веськыда висьтавны да... Гашкӧ эськӧ и прӧститіс да...»

Мӧд луннас Тист Иван муніс Ыджыдвиддзӧ, поп ордӧ, — мунӧм водзвылас дзибыртіс, кыдз шуласны, «на крабросьт», быдса самӧкур стӧкан (сьӧрсьыс вайліс тӧрыт дзонь парта). Поп вӧлі самӧй тшай юӧ. Мыйӧн пырис Тист Иван — поплӧн кисьыс муртса блюдйыс эз усь: сэтшӧма повзис.

— Вай жӧ висьтав тэ, поп, кыдзи тэ лысьтін пыртны менсьым пиӧс? Кутшӧм права тэнад сы вылӧ вӧлі, а?

Поплӧн весиг горшас нянь крӧшкиыс крукасис татшӧм кывъяссьыд.

— Ме нинӧм, Иван Пеоктистӧвич, — мыкталігтырйи шуӧ поп. — Кыдзи нӧ позьӧ... гм!.. нинӧм шуны...

— Кыдзи нӧ нинӧм? — торкис Иван, ачыс матӧджык поплань локтыштіс. — Эн пӧръясь, поп, веськыда висьтав: кыдзи, мися, тэ лысьтін купельын пыртны октябритӧм кагаӧс, едена сила, а?..

Поп тіралігтырйи чеччис пызан сайысь да сувтіс горнича ӧдзӧс дінӧ.

— Ме... кыдз сійӧ... раб божий Иван, ме эг...

— Кутшӧм ме «раб божий» тэныд лои?.. Вот, кыдзи рабышта ныр-вомад — висьталан небось сэки, едена сила!..

— Мырдӧн... мырдӧн тшӧктісны пыртныс... ме эськӧ ог вӧлі пырт да, мырдӧн тшӧктісны... Веськыда висьтала, раб... Иван Пеоктистӧвич, мырдӧн...

— Мырдӧн некод оз вермы тшӧктыны пыртны. Тэ пыртін дзик аслад горшлун пондаыд: шуласны тай — «поп горш да ад горш пӧ ӧткодьӧсь»... Кутшӧм ним нӧ сетін?

— Лука... святӧй Лука паметь кузя, апостол, евангелист...

— Ме вот тэныд щӧка бокад сэтшӧм «евангелльӧ» косьышта — мед черлыыд вежыньтчас, трустлӧн!.. «Лука»... Скӧтина тэ!..

— Позьӧ шуны меліджыка — «Луча...» Тадзисӧ зэв ёна мунӧ мыйкӧланьыд... кыдз сійӧ... да, Лучинскийланьыд...

— Важӧн нин эськӧ кад тіянӧс лёзьясӧдныд кос пу йылӧ ӧшлыны да. Толькӧ бур йӧзлысь олӧмнысӧ дзуганныд, вежӧрнысӧ пемдӧданныд, быд ногыс ылӧдланныд... Кывзы, поп: пырысь-пыр мун петав вичкоад да кирит асланыд нигаясысь менсьым пиӧс, мед дукыс весиг эз вӧв сылӧн сэні!

— Кирита, кирита, Иван Пеоктистӧвич, пыр жӧ и петала да кирита метрикаысь...

— Едена силаяс ті ставныд! — шуис Иван петігас нин.

Поп сэки вӧлисти кокньыдджыка лолыштіс. Толькӧ эз пет вичкоӧ Лукаӧс киритны, ӧнӧдз на кириттӧм сійӧ лои...

Джиянӧ воигӧн нин (куим верст) Тист Иванлы дум вылас друг уси: «Мыйла нӧ ме попсӧ эг зульӧд? Аттӧ, едена сила!..» Локтігчӧжыс пыр мӧвпаліс, кыдзи бурджыка бабасӧ «велӧдны», кутшӧм местаясӧ швачӧдны — мед эськӧ прамӧя мӧрччис, дай мед йӧзыслы оз вӧлі тыдав нӧйтӧм туйыс... Сэсся горт дінас матысмигӧн нин бара друг думыштіс: «А мый нӧ бурыс лоӧ нӧйтӧмсьыс? Ме чайта, Ликӧ эськӧ эз пырт Новолучинскийӧс, эз кӧ ыштӧдны сійӧс сы вылӧ суседъяс да рӧдняяс... Мый сэсся, бабаыд пемыд, быдтор вылӧ на веритӧ... Прӧста костті и локсьӧма менам уджаланінысь... Сідз нин мед олас — ог вӧрзьӧд Ликӧӧс, а неуна петкӧдла жӧ ассьым этшӧс сылы».

Кыдзи мӧвпаліс, сідзи и вӧчис Тист Иваныд. Зэв на дыр Ликӧ вылас скӧраліс. Быдса вежон чӧж видіс, нӧйтны грӧзитчис. Мӧд вежон чӧж кыв эз лэдзлы, эз сёрнит Ликӧкӧд. Коймӧд вежон чӧж зэв шочиника кыв лэдзліс, корсюрӧ бабасӧ «Ликӧӧн» шуліс. Нёльӧд вежон чӧжнас варовджык лои, мукӧддырйиыс весиг вашмунлӧ. Тӧлысь мысти, стретенньӧ бӧрын нин, йӧввыв гӧгӧрлань, вӧлисти Тист Иван бурасис прамӧя — важ моз сёрнитӧ и, сералӧ и, Ликӧыскӧд орччӧн, ӧтик вольпась вылын, узьлӧ и... Со ӧд кутшӧм этшыс Тист Иваныдлӧн!


* * *


Висьтавлі нин тай водзынджык: мися, «Лучалы» нёльӧд арӧс мунӧ. Сійӧ новлӧ кузь сера дӧра дӧрӧм, — гачтӧг на котралӧ (мый нӧ сэсся, ичӧт на ӧд: быдмас да, эштас на гачьястӧ и брюкиястӧ пӧттӧдзыс новлыны). Гӧгрӧс чужӧмбана — зэв мича детина, кыдз шуласны, — «ен сыкӧд кодь». Толькӧ вывті рам, бокӧвӧй йӧзысь полӧ — «тӧдтӧмтӧ». Шоча, зэв шоча мича чужӧмбан вывтіыс вирдыштлас сылӧн нюм либӧ ваш. Котралыштас, котралыштас мыйкӧ дыра, сэсся босьтас мамыслысь важ эжӧдтӧм ыж ку пась, пуксяс лабичӧ, ӧшинь дорӧ, шымыртчас пасьнас дай кутас... нёнясьны. «Луча» нёнялӧ ассьыс чуньяссӧ. Сюяс вомас веськыд водз чуньсӧ да шӧр чуньсӧ да нятшкӧ-нёнялӧ. Ачыс сэки быттьӧ мӧвпалӧ кутшӧмкӧ зэв ыджыдтор йылысь.

— Мыйла нӧ, Ликерья, он ӧлӧдӧ кыдзкӧ «Лучанытӧ» чуньсӧ нёнялӧмысь, сійӧ ӧд абу бур: ӧти-кӧ, быдсяма няйтыс сылӧн чуньясас сибдӧ, вермас висьмыны; мӧд-кӧ, вежӧрыс детинаыдлӧн вермас торксьыны, — висьталім ми Ӧнисимовкӧд Тист Иван гӧтырлы.

— Сідзи нин велалӧма да... Нинӧм... Тані ӧд уналӧн челядьыс чуньнысӧ нёнялӧны да — нинӧм на тай некодлӧн эз лолыны-а... Ме дзолядырйи нёнявлі жӧ да, сы вӧсна тай со ола...

Мамыс сійӧс «Лучаӧн» шуӧ; кыдзи батьыс нимтӧ — ме ог тӧд, некыдз кӧ оз-а: ми тай эгӧ кывлӧ-а...

Тадзи быдмӧ ичӧтик Джиянын, визув Висер ю дорын, «Луча — Новолучинский Чумбаров». Колӧ сійӧс бура видзны-дӧзьӧритны, медым збыльысь быдмис сыысь, кыдзи тай коркӧ батьыс шуліс, «новӧй луч» — выль югӧр. А «святӧй Лука» нимыд ачыс вушъяс сы вылысь, кӧть и пыртіс попыд купельын — сійӧ ӧд эз век кежлӧ сибды.


Ноябр, 1926 во.

Гижӧд
Луча
Жанр: 
Гижан кад: 

lkejrlkelkrgner klrjnelknfrkl ekjnrjkenfrej

1