"ГЕННАДИЙ АНАТОЛЬЕВИЧ ЮШКОВЛӦН..."

Геннадий Анатольевич Юшковлӧн нимыс быдӧнлы тӧдса миян республикаын. Нимйӧза гижысь, поэт, драматург, сійӧ став олӧмсӧ йитіс литературакӧд.

«Чугра», «Рӧдвуж пас», «Бива» романъясын, висьтъясын, повесьтъясын да пьесаясын сійӧ кужис петкӧдлыны коми войтырыслысь оланногсӧ да олан сямсӧ. Композиторъяс сылӧн кывбуръяс вылӧ лӧсьӧдалӧны мыла сьыланкывъяс.

Уна висьт, мойд да кывбур сійӧ сиис челядьлы. Сылӧн гижӧдъясыс овліны гажаӧсь и шогӧсь, майшасянаӧсь и серамбанаӧсь, мукӧдыс шмонитана да небыд нюма. Сійӧ бур сьӧлӧмӧн да бур видзӧдласӧн быттьӧ петкӧдлӧ челядьыслы, со пӧ, ті гӧгӧрын олӧмыс сэтшӧм уна рӧмӧн пӧртмасьӧ, казялӧй, нимкодясьӧй. Сійӧ оз веськыда велӧд, кыдзи колӧ овнысӧ зонпоснилы, а гӧгӧрвоӧдӧ найӧс, мед быдмасны шаньӧн да зільӧн, бур сьӧлӧмаӧн, чужан мунымӧс да коми кывнымӧс радейтысьӧн.

Став сьӧлӧмсянь чолӧмалам Геннадий Анатольевичӧс чужан лунӧн! Сиам дзоньвидзалун, шудлун, кыпыд да югыд олӧм-вылӧм, выль, сьӧлӧмъяснымӧс шонтысь гижӧдъяс.

Елена КОЗЛОВА, республикаса гижысь котырӧн веськӧдлысь.