КОЙМӦДЫСЬ КОСӦДІС...


Мӧдӧдчи ме курортӧ. Дыркодь таӧдз нёрпалі, да сетісны путёвка, бурдӧдчы пӧ ветлы, сэсся пӧ мед некор нин эн вись. А некорсӧ кысь, кор мӧдарлань нин катовтчӧма олӧмыд. Он ӧд томмы, томман кӧ эськӧ курортад-а. Но век жӧ мӧдӧдчи. Гоз-мӧд вежан паськӧм тэчи, вӧччантор на босьті, гашкӧ и, гажӧдчыштны слӧй лоӧ. Со тай курортад ветлысьяс йывсьыд кымын анекдот лӧсьӧдӧма. Верӧсӧй дольӧ: лысьтан кӧ пӧ код вылӧ кӧ син чӧвтлыны! Мый сэсся сэн, син куньӧмӧн ола? Дерт, бурджык эськӧ вӧлі, эз кӧ тайӧс шу. Ӧлӧдӧм пыдди мыйкӧ ыззьӧдана кодь сылӧн артмис. Мырдӧн быттьӧ тайӧ мӧвпсӧ юрӧ тувъялӧ. Ачым шуа, мися, некод менӧ сэн оз виччысь, некод ме вылӧ оз ышты. Кызь луныд лэбовтас, он и тӧдлы.

Но, колльӧдіс менӧ верӧсӧй автобусӧ. Мукӧдыс, олӧмаджыкъяс и томджыкъяс, энюлов и айулов, вӧччӧмаӧсь, ме кодь жӧ ыджыд сумкааӧсь пуксялӧны.

Мекӧд орччӧн, ӧшиньладорас, зэв посниа кудритӧм гӧрд юрсиа ань пукалӧ, ар нелямын вита кымын, матігӧгӧрсасӧ чорыд духинас пӧдтӧ. Автобус ӧшиньсӧ восьтыштіс, сувтіс да сэтчӧ и юрсӧ сюйис: верӧсыскӧд сёрнитӧ. Верӧсыслысь чужӧмсӧ кыськӧ аддзылі нин быттьӧ, но коді — эг вермы тӧд вылӧ уськӧдны.

Кыла, да аньыдлы верӧсыс шуалӧ:

— Бура ов, эн ышмы сэн.

Менам нюмӧй петіс: мися, став айуловыс кӧ ӧткодь вежӧгтысьӧсь-а.

— Ачым тӧда! — швачкис-вочавидзис аньыд да шнёпкысис-пуксис.

Татчӧ нин ме пыльсмуні: со ӧд кутшӧм збой аньыс, тадз верӧсыслы лысьтӧ шуны. Менам верӧслы кӧ тадз шуан, оз и лэдз.

Автобус ӧдзӧс пӧдлассис, ми вӧрзим.

— Уп, слава богу, мӧдӧдчим, — лӧсьӧдчыштіс аньыд пуклӧс вылас. — Талун, буракӧ, курортӧдзыд воа нин. Коймӧд лун мӧдӧдча.

— А мый нӧ эськӧ? — юала. Тӧдтӧм морт да ёна сёрниӧ пырӧдчыны абу лӧсьыд-а. Кӧсъяс кӧ, ачыс висьталас. Но аньыд сӧмын кинас ӧвтыштіс, чатӧртчис, креслӧ мышкас юрсӧ нёровтіс да синъяссӧ кунис, мыйкӧ ас кежсьыс мӧвпалӧ.

Эг ылӧдз и мунӧй, муртса карсьыс вевъялім петны мир туй вылӧ, автобусыд кежыштіс боклань да сувтіс. Мый и лои? Воссис ӧдзӧс да пырис орччӧн пукалысь аньыдлӧн верӧсыс. Мӧдыс оз аддзы, синсӧ куньӧмӧн пукалӧ да.

Матыстчис айуловыд да шыасис:

— Катя, пет!

Аньыс восьтіс синъяссӧ да эз и чуймы, сӧмын ыджыда ышловзис.

— Пет, кодлы шуӧма! — бара чорыда тшӧктіс, а сэсся босьтіс гӧтыр кисьыс ичӧтик сумкасӧ да плащсӧ. Меным ковмис сувтны да бӧрыньтчыштны.

— Катя, кылан? — тшӧктана мурӧстіс сылӧн гӧлӧсыс.

Аньыд быттьӧ чеччыштіс-чепӧсйис места вывсьыс да шыасис автобусын пукалысьяс дінӧ:

— Тӧдмасьӧй, тайӧ менам верӧс. Коймӧд лун нин мӧдӧдча курортӧ, а сійӧ быд лун падмӧдӧ мунӧмсьыс! Аддзылінныд?

Плешкыс да сьыліыс мужичӧйыдлӧн вир сера лои.

— Катя! — ӧлӧдана шыасис сійӧ.

Но аньыдлы, буракӧ, верӧсыс вывті нин ёна дӧсадитӧма, дугдыны оз вермы:

— Ті тӧданныд, коді менам верӧсӧй? Телерепортёр, — и аньыд шуис зэв нималана ов.

Тайӧс кылӧм бӧрын медся веськодьыс автобусын шызис, быдӧнлы лои окота видзӧдлыны нималана морт вылӧ.

«Со кытысь сійӧс тӧда», — визнитіс юрын.

— Коймӧд лун нин тадзи ӧча-мӧчаасям, — оз вермы лӧньны ыззьӧм нывбаба.

Телерепортёрыд воис ӧдзӧс дорас да юрсӧ лэптывтӧг и петкӧдіс сумкасӧ ывлаас. Сылӧн вӧсньыдик, а стӧчджыка кӧ шуны, косіник гӧтырыс, моднӧй гача да пырыс тыдалана ковтаа, шыльӧдыштіс юрсисӧ да веськӧдчис петанінлань: кӧлуйтӧгыд ӧд он мун, а автобустӧ дыр он сулӧд.

Но петтӧдзыс бара на сувтыштліс да бергӧдчылӧмӧн шуис:

— Ок, и радейта ме талун сійӧс! Мед восӧдтӧдзыс лоӧ! Асывнас, гашкӧ, лэдзас, — и чеччыштіс ывлаас.

Автобусын вак-вакӧн серӧктісны. Быдӧн уськӧдчисны ӧшиньяслань, нӧшта видзӧдыштны теш вылас. Синмӧн колльӧді тешкодь гозъяӧс: налӧн челядясьӧмас вӧлі мыйкӧ сьӧлӧмтӧ вӧрзьӧданатор.


Гижӧд
Коймӧдысь косӧдіс...
Жанр: 
Йӧзӧдан во: 

lkejrlkelkrgner klrjnelknfrkl ekjnrjkenfrej

1