ГӦТЫРЫС БӦРСЯ...


Курортад медводдзаысь вои да дивъя кажитчис. Вердӧны кынӧм сертиыд, фрукты мыйта колӧ, кампет, печенньӧ. Сола ваа ваннаын да вынйӧр сетан няйтын бурдӧдӧны. Со и ветлӧдлан ӧти кабинетысь мӧдӧ. Сэсся и нӧшта на ошйысянтор лои. Верӧсӧй коркӧ массаж вылӧ ветлӧдліс том ныв дорӧ да пельӧс сьӧдмӧдліс, кутшӧм сійӧ небыдик киа. Либӧ юрси шыранінӧ петалас да ошйысьӧ: том ныв шырис, кӧть пӧ эськӧ сы дорын лунтыр пукала. Сэтшӧм лӧсьыда да меліа юрсиӧс мольӧдіс-шыльӧдіс. Ме сӧмын сьӧлыштла вӧлі. Ӧні курортад аслым мышкӧ массажсӧ вӧчӧ том зон. Часлы, мӧвпала, ачым ошйыся жӧ верӧслы. Водзӧс мынта. Мед оз ышнясь том нывъяснас.

Со тадзи и ола, курортася. Ставыс эськӧ бур, да пондыны мӧдіс ӧти мужичӧй, нуръясян пызан сайын ӧтлаын пукалысь. Воддза лунъясас син бӧжнас сӧмын кыйкнитлывліс, сэсся — веськыда кӧть ньылыштас. Сёрниӧ колӧ и оз ков пырӧдчӧ. А ме ӧд абу кывтӧм пемӧс. Сёрнита жӧ.

Варовитыштан да сэсся быттьӧ важ тӧдса кодь лоан. Со ӧтчыд и шуӧ пызансайса ёртӧй: кино вылӧ пӧ ветлам. Но и ветлім. А некодкӧд сэсся и ветлынысӧ: ӧтнам жырйын ола да. Кыкӧн кӧ кодкӧдкӧ — век нин вомъёрт эм, а ӧтнамӧс овмӧдісны да кодкӧдкӧ быть ёртась, он кӧ и ошкӧ пӧран.

А тӧдсаӧй лунысь-лун вельмыны мӧдіс, а кор тӧдмаліс: ӧтнам ола, веськыд мат лои. То емла локтӧ, то сунисла, то шыранла — кутшӧмкӧ могӧн век нин пыралас. А тӧрыт рытланьыс дозйӧн пырис, чӧскыдик наливка вайӧма. Юыштім-чурснитім, сэсся мӧдысь. Видзӧда да, ёртӧйлӧн синъясыс югъявны мӧдісны, быттьӧ выйӧн мавтӧмаӧсь. То пидзӧсӧ инмӧдчылас, то киӧс босьтлас. Но, мися, вина юӧмыд тай неладнӧ лои. Кыдзкӧ меным таысь колӧ мынтӧдчыны. Вай, мися, тэ, ёртӧй, мун, меным колӧ медсестра дорӧ ветлыны, ӧкмыс час кежлӧ корис. Ветлы пӧ, ме тані пукавла. Ог, ог, мися, вай мун. Дознад и быдӧн. Дозсӧ пӧ татчӧ кольла, сёрӧнджык пырала да помалам.

— Мун, вай мун, менам ӧд верӧсӧй зэв вежӧгтысь да тӧдлас кӧ, сьылідзиртӧ чегас, — скӧрысь нин вӧтла.

— Кысь сійӧ тӧдлас?

— Чӧв! Менам верӧсӧйлӧн быдлаын син да пель.

Кыдзкӧ ысті. Дознас и быдӧн. Войнас пӧ вола, петігас бара на шуис. Мися, оз ков меным некутшӧм волӧм.

Чашкаяссӧ пожъялі, ӧшинь восьтлі, мед курыд-юмов юан кӧрсьыс ыркалас оланінӧй, пыралі душ улӧ да воді узьны. Ачым вашъяла, мися, кужи на тай ыстынытӧ. Сэсся ог нин талы некор ӧдзӧсӧс восьт.

Он на кокньыдатӧ мын! Войнас торкӧдчӧ ньӧжйӧникӧн. Менам нин ойбыртсьӧма. Куйла шырпи моз чӧла, кывзыся. Бара торкӧдыштіс, чорыдджыка нин. Ме шы ни тӧв. Узьӧм улӧ сетчи. Ас кежысь эськӧ китшка-серала.

Оз ӧд мун! Пыр ёнджыка и ёнджыка торкӧдчӧ, яндысьтӧм бугыльыд! Скӧрмыны нин мӧді. Мый и сирасис, яндзимыс абу, оз пов ни!

— Надя, восьт! — корана вашкӧдӧ.

Ме быдӧн чур-чермуні. Дзик верӧсӧйлӧн кодь гӧлӧсыс. Каститчӧ, али...

Чеччи, матыстчи ӧдзӧсланьыд.

— Мун! Ог восьт! — горӧді.

— Он кӧ восьт, ӧдзӧстӧ разя! — мӧдіс камӧдны.

— Свят, свят! Кутшӧм нӧ йӧй шӧрӧ веськалі?

Восьті ӧдзӧс. Видзӧда: верӧсӧй сулалӧ, скӧрысла векыштчӧм чужӧма.

Ки-кокӧй лигышмуні.

— Василей, тэ нӧ кытысь татчӧ усин?

А сійӧ звермӧма, синъяс сувтсаӧсь, тайкӧ пурас.

— Кӧні? — шарк пырис жырйӧ.

Мӧдіс шкап ӧдзӧсъяс шлопӧдны-восьтавны, крӧвать ув видзӧдліс, балкон вылӧ петаліс.

Сьӧлӧмӧй коклябӧрӧ лэччис, морӧспань улӧй кӧдзавлі: йӧймӧма верӧсӧй.

— Он ӧмӧй аддзы, тані ме, — шыаси ӧдзӧссӧ пӧдлалӧм бӧрын.

— Кӧні, мися? — ырыштчис весиг.

— Коді? — слӧйми юавны.

— Другыд!

— Свят, свят! Васюк! Мый нӧ тэкӧд лои? Кутшӧм другӧс корсян?

— Виа кыкнаннытӧ! — бара на ырыштчис, а сэсся и мӧд пӧв быдлаысь корсис.

— Мыйла сы дыра эн восьт? — равӧстіс.

— Кысь нӧ восьта, ог тӧд, коді игӧдчӧ да.

— Ӧшиньтіыс чеччыштіс? — юалӧ.

— Кыдз нӧ ӧшиньті чеччыштас нёльӧд судтасянь? Некод эз вӧв.

Пуксис крӧвать вылӧ. Дінас пукси, сойӧдыс ки пыдӧсӧн малышті. Зэлӧдчӧма сэтшӧма, став сӧннас. Ньӧжйӧникӧн меліала сойсӧ, сэсся морӧссӧ, сьылісӧ, ас дорӧ топӧді да мышсӧ малала. Ньӧжйӧникӧн мӧдіс лаймавны, усьпаньвыв пуксьыны.

— Мый нӧ, кыдзи татчӧдзсӧ воин? Семьяыд нӧ? Скӧтыд? — юася.

Висьталіс. Гаражас кодлыкӧ машина дзоньталӧмаӧсь, а вештысьӧма роч винаӧн. Но и юыштӧмаӧсь. А сэсся кыв бӧрся кыв — тшӧкӧлдывайтны. Тӧдмалӧмаӧсь: Васькалӧн гӧтырыс курортын, да шпыннявны кутасны верӧс вылын.

— Мый нӧ, ачыд он нин вермы, гӧтыртӧ курортӧ мӧдӧдӧмыд?

— Висьӧ.

— Висьӧ, дерт. Ставӧн сэні висьысьяс. Тӧдам, мыйла сэтчӧ ветлӧдлӧны.

Шпуткӧны-куритӧны, шмонитӧны, пиньнысӧ кеслӧны. А Василей и йӧймӧма, гортӧ вежсьыны да сьӧмла кежалӧма, челядь и пода эновтӧма, менӧ видзӧдлыны шутёвтӧма.

Мичаа-бура сэсся и сёрнитім. Медводдза асъя автобуснас бӧр гортӧ шуис мунны.

Мусукасьтӧг, дерт, эг жӧ олӧй. Асывводз петам кыкӧн жырйысь, а воча — пызансайса суседӧй. Аддзис мӧд дядьӧкӧд петӧмӧс да весиг чужӧм вывсьыс вежсис. И пызан сайын варовлуныс быри, пукалӧ, быттьӧ вомас ва босьтӧма. А меным сійӧ и колӧ: майбыр, некод нин эз дӧзмӧд.

Бӧрынджык аддзылі: кутшӧмкӧ гӧгрӧсіник анькӧд дзигӧдчӧмӧн ветлӧдлӧ. Корсьӧмнад, буракӧ, век жӧ сюрӧ.


Гижӧд
Гӧтырыс бӧрся...
Жанр: 
Йӧзӧдан во: 

lkejrlkelkrgner klrjnelknfrkl ekjnrjkenfrej

1