ГОЖӦМЫН

☼ ☼ ☼

Дзоля Петя олӧ зэв ыджыд сиктын. Сикт горулас визувтӧ паськыд Печора ю.

Батьыс да ыджыд вокыс ветлывлӧны чери кыйны.

Батьыс кыйлывлӧ сир, чими чери, ком, налим.

Коля вокыс вугыр шатинӧн кыйӧ кельчи да ёкыш.

Батьыслысь кыйдӧссӧ сёйӧны асьныс, воклысь кыйдӧссӧ сёйӧ Мурӧ нима кань.

☼ ☼ ☼

Петялӧн ыджыд пу керкаыс уна ӧшиня. Ӧшиньтіыс тыдалӧ Печора ю да мӧдлапӧвса рас.

Петя радейтӧ видзӧдны ӧшиньӧд. Печора юыс лӧнь да югыд, а мукӧддырйиыс овлывлӧ пемыд да гыа. Петя виччысьӧ батьсӧ да воксӧ.

☼ ☼ ☼

Батьсӧ да воксӧ виччысигмоз Петя гижасьӧ карандашӧн. Сійӧ серпасаліс ассьыс Сюрук мӧссӧ да Карко вӧвсӧ. Ӧні гожӧм, да гортса пода ^Пода — скӧт./^ йирсьӧны луд вылын. Рытнас Сюрук воас гортӧ да ваяс чӧскыд йӧв.

☼ ☼ ☼

Керка дорын град йӧр. Мамыс весалӧ ёг турунысь лук град. Лукйыс гырысь, но курыд. Петя сійӧс оз радейт, но мамыс мырдӧн тшӧктӧ сёйны. Петялы колӧ морков. Морковыс юмов, но посни на.

☼ ☼ ☼

Йӧрын кисьмӧма ӧмидз. Вӧрын кисьмӧма чӧд. Петя мамыскӧд кайӧны вотны чӧд. Петя вотіс вомас, а мамыс вотіс чуманӧ. Рытнас гортас мамыс, батьыс, вокыс да Петя панялісны чӧдъя-ӧмидза йӧв.

☼ ☼ ☼

Керка дор йӧрын Петя радейтӧ ворсны мачӧн. Мукӧддырйиыс ворсӧны вокыскӧд кыкӧн. Кыкнад гажаджык. На дорын бергалӧ Шарӧ нима пон. Сійӧ котралӧ да увтӧ, куталӧ вокъясӧс гач кокӧдыс. Ставлы гажа.

Гожӧмнад лӧддза-номъя. Луннас лэбалӧ лӧдз, рытнас петӧ ном. Петя наысь оз пов, зіля ӧвтчӧ кияснас. Сійӧ отсасьӧ батьыслы да вокыслы пуктыны турун. Сюрук мӧслы да Карко вӧвлы тӧв кежлӧ колӧ уна турун. Ачыс Карко вӧлыс зіля жӧ отсасьӧ турунсӧ заптыны, а Сюрук мӧскыс ачыс заптысьнысӧ оз куж. Сійӧ лунтыр йирсьӧ.

☼ ☼ ☼

Талун Петяӧс вокыс босьтіс аскӧдыс чери кыйны. Вӧлаліс баддьысь ичӧтик вугыр шать, пысаліс си, вугыр да нидзув. Чӧвтіс ваӧ да тшӧктіс кыйӧдны таб бӧрся, шуис: кор табйыс суныштас ваас, сэки и кыскы.

Петя дыр, син мудзтӧдзыс, видзӧдіс таб вылӧ, но сійӧс эз дэбӧд. Коля вокыс воліс сы дорӧ, выльысь пысаліс нидзувсӧ да бара муніс аслас кыйсянінӧ.

Недыр мысти Петялӧн табйыс вӧрзьыштіс, и сійӧ лэптіс ичӧтик ёкышӧс. Ёкышыс вӧлі гӧрд бордъя да мышку вомӧныс пемыд визя. Гортас Петя вайис ёкыш, а Коля вокыс вайис кельчияс. Мурӧ каньыс чӧсмасис кыйдӧснас, а сэсся рытбыд ниртчис Петя кокӧ, буракӧ, тадзинас аттьӧаліс.

☼ ☼ ☼

Куим ая-пиа мӧдӧдчисны вӧрӧ тшакла. Петя поліс пырны пыді вӧрас. Сійӧ тӧдіс, мый вӧрын олӧны ош, кӧин, руч да кӧч. Поліс вочаасьны ошкӧд да кӧинкӧд. Батьыс шуис:

— Вӧрса олысьясысь оз ков повны. Гожӧмын найӧ пӧтӧсь да морт дорӧ оз матыстчыны.

Ая-пиа зіля корсялісны тшак. Налы сюрис дона гоб, гӧрд гоб, сім гоб да уртшак.

Рытнас гортас мамыс уртшаксӧ солаліс, а мукӧдсьыс пуис чӧскыд тшаква.

Батьыс шуис, мый найӧ Колякӧд ветласны ылі вӧрӧ ельдӧгла да мукӧд солалан тшакла.

☼ ☼ ☼

Регыд воас ар, Коля вокыс мунас школаӧ.

Петя мӧдас отсасьны мамыслы идравны град выв пуктас: капуста, морков, сёркни да кушман. Тӧв кежлӧ бать кыйис уна чери, ваяліс косьтан да солалан тшак.

Вайӧдісны видз вылысь Карколы да Сюруклы тӧвйымӧн кос турун. Ар помнас колӧ дасьтысьны кӧдзыд тӧв кежлӧ.

Тӧвнас Петя мӧдас исласьны даддьӧн крут чой йывсянь Печора юлань. Печора ю мӧдас узьны кыз йи улын, шойччыны авъя гожӧм бӧрын.