МОЙДЧӦМ

Рӧмыд. Анна пукаліс Агния баб ордын ӧшиньдорса лабич вылын да видзӧдіс турӧбалысь ывлаӧ. Ышмысь тӧлыс кыськӧ помтӧг вайис лым. Анналы вӧлі гажтӧм, кӧть пӧчыс вӧлі орччӧн да печкис.

— Агния баб, вай мыйкӧ мойд, — корис Аннуш.

— Став мойдсӧ нин мойдлі, нинӧм нин эз коль.

— Мойд, — дзайгысян гӧлӧсӧн нюжӧдіс Аннуш.

— Тэ шуан: мойд, ме шуа: мойд. А еджыд ошкӧс мойда ог?

— Мойд, — збоя вочавидзӧ нывка.

— Тэ шуан: мойд, ме шуа: мойд. А сьӧд ошкӧс мойда ог?

— Но мойд.

— Тэ шуан: но мойд, ме шуа: но мойд. А визя ошкӧс мойда ог?

— Сэтшӧмыс оз овлывлы, — серӧктіс Аннуш.

— Тэ шуан: сэтшӧмыс оз овлывлы, ме шуа: сэтшӧмыс оз овлывлы. А лӧз ошкӧс мойда ог?

— Да мойд, мойд.

— Тэ шуан: да мойд, мойд, ме шуа: да мойд, мойд. А гӧрд ошкӧс мойда ог?

— Но, Агния баб...

— Тэ шуан: но, Агния баб, ме шуа: но, Агния баб. А туся ошкӧс мойда ог?

— Эн! — дӧзмӧмӧн вочавидзӧ Аннуш. — Тырмас.

— Тэ шуан: тырмас, ме шуа: тырмас. А виж ошкӧс мойда ог?

— Нинӧм сэсся ог шу, — лӧгасис нывка.

— Тэ шуан: нинӧм сэсся ог шу, ме шуа: нинӧм сэсся ог шу. А турунвиж ошкӧс мойда ог?

— Да тырмас, тырмас. Ог сэсся тадз мойдчӧ. Мыйкӧ бурӧс мойд.

— Но ме сэсся нинӧм ог куж. Ачыд вай кӧть ӧтиӧс мойд. Али он жӧ куж? — юаліс Агния баб.

— Мыйла ог куж? Мойда, — кӧсйысис Аннуш.

Чӧв олыштіс. Мичаджыка пуксис. Сэсся лӧсьӧдыштіс платтьӧсӧ, кисӧ пуктіс пидзӧс вылас да заводитіс:

— Олісны-вылісны гозъя. Налӧн вӧлі ӧти пи, Иван. Коркӧ Иван и шуӧ: «Ветла ме ылі муӧ-ваӧ, йӧзсӧ видзӧдла, ачымӧс петкӧдла». Косьтіс нянь, сӧвтіс мыш нопйӧ и мӧдӧдчис. Муніс да муніс, да муніс; муніс да муніс, да муніс. Ю воис. Вуджис. Муніс да муніс, да муніс; муніс да муніс, да муніс. Муніс да муніс, да муніс. Сэсся и бӧр гортас воис.

Аннуш ланьтіс. Агния баб видзӧдліс внучкаыс вылӧ да юаліс:

— Пом нин воис?

— Пом.

— А мыйкӧ зэв дженьыд мойдыд да?

— Да-а, — нюжӧдіс Аннуш. — А мый дыра сійӧ муніс.