АГНИЯ БАБ — ВОЛШЕБНИК


— Мама, мыйла Агния бабтӧ шуӧны се-лек-ци-о-не-рӧн?

— Кодлысь нӧ кывлін?

— Тӧрыт на тай папа шуис. Код нӧ сійӧ лоӧ?

— Селекционерыс — сійӧ став быдмӧг вылас волшебник.

— Волшебник?

Анна крӧвать бӧрвылысь кватитіс ковта, пасьталіс да котӧрӧн уськӧдчис ӧдзӧсӧ. «Ӧдйӧджык, ӧдйӧджык, — тэрмӧдліс сійӧ ачыс асьсӧ. — Ӧдйӧджык Агния баб ордӧ».

Керкаыс Агния баблӧн сулаліс шор сайын, джуджыд кыркӧтш йылын. А керка гӧгӧрыс мыйыс сӧмын эз быдмы: льӧм пуыд и пелысьыд, сус пуыд и ниаыд, сэтӧрыд и ӧмидзыд.

Анна вуджис шорсӧ пу пос вывті да котӧрӧн сорӧн кайис кыркӧтш вылӧ. Муртса на восьтіс дзиръясӧ Агния баб йӧрас, пыр и горӧдіс:

— Агния баб, Агния баб, тэ — селекционер.

— Коді, коді? — веськӧдчис Агния баб, коді вӧлі град йӧрас да весаліс ёг турун.

— Волшебник став быдмӧг вылас.

— Да, ме волшебник и эм, — серӧктіс пӧч.

— Волшебник? Мыйла нӧ либӧ некор эн висьтавлыв? — шензьӧ нывка.

— А эн юавлы да.

Вот тайӧ да. Тайӧс нин Аннуш некыдз эз вермы гӧгӧрвоны. Волшебникъяс йылысь Анналы мамыс лыддьывліс мойдъяс, телевизор пыр кинояс видзӧдлывліс. Но Агния баб и — волшебник? Но и но.

— Лок, ме тэныд мыйкӧ петкӧдла, — шуис Агния баб да мӧдӧдчис пывсянланьыс. Анна чеччалігтыр вӧччис сы бӧрся.

Пывсян дорас, лунвывланяс, вӧлі торъя град йӧр. Сэні быдмис ӧти сус пу (тайӧ пашкыр лыска пусӧ Анна тӧдіс нин) да нӧшта куим вӧсньыдик коръя пу. А ӧти пу вылын, медся ыджыдыс вылын, дзоридзалісны ичӧтик еджыд дзоридзьяс. Ӧтик, мӧд, коймӧд... А кутшӧм чӧскыд дукаӧсь тайӧ дзоридзьясыс!

— Агния баб, мый тайӧ? — гусьӧн юаліс Аннуш.

— Яблоня.

— И яблӧгъяс быдмасны? — чуймис нывка.

— Оз кӧ кынмы, дерт, быдмасны.

— А миян воспитательница детсадйын висьтавліс, мый миян войвылад яблӧгыд оз быдмы.

— А ёна жӧ лоӧ дӧзьӧритныд, — нюмъёвтіс Агния баб. — Тӧвбыд майшаси, мед оз кынмы. Воддза тӧвнас идзасӧн вевттявлі вужъяссӧ, да шыръяс вӧлі килльӧмаӧсь, а колян арнас коз лыс вӧрысь ваялі да сійӧс пукталі, а сэсся лымйӧн тырталі. Вот сідзи и тӧвйӧді. Арнас медводдза яблӧгъяс мӧдам сёйны тэкӧд.

— Агния баб, тэ тай збыль волшебник вӧлӧмыд, — тыр синмӧн видзӧдіс нывка пӧчыс вылӧ. А сэсся чинтіс гӧлӧссӧ да юаліс:

— А тэнад волшебнӧй палочкаыд эм?

— Эм, быдса дас.

— Дас? Меным ӧтикӧс сетан?

— Ог. Тэнад ӧд аслад эмӧсь.

— Менам? Кӧні?

— Чуньясыд нӧ?

— Да, бара нин ме вылын шмонитан, — гажтӧммис Аннуш.

— Ог, ог шмонит, нылук, киясыд быдтор вермӧны вӧчны. И керка лэптыны, и трактор вӧчны, и нянь быдтыны. — Сэсся неуна чӧв олыштӧм бӧрын содтіс: — Сӧмын колӧ кужны найӧс уджӧдны.

Аннуш топӧдчис пӧчыс дінӧ:

— Ме мӧда тэныд отсасьны.


Гижӧд
Агния баб — волшебник
Жанр: 
Йӧзӧдан во: 

lkejrlkelkrgner klrjnelknfrkl ekjnrjkenfrej

1