ПРАЗДНИК ЛУНӦ СЬЫЛӦМ
Андрей Ефимович Истоминлы, 
Коми АССР-са культураын заслуженнӧй работниклы,
Ижмаса ыджыд ёртлы, сьылысьлы

Ньӧжйӧ, яндысигтыр, гусьӧн
Лымйыс тавося нин усьӧ,
Шебрӧдны мед, кыдз тай шусьӧ,
Нӧшта кыза яг и эрд.
Лымйыс, майбыр, татчӧ тӧрас:
Изьваным мӧй весьӧпӧрас?
Лым оз чинты мортлысь вӧрас,
Содтӧд шуӧм вайӧ сьӧрас:
Колӧ пӧ и лымъя пӧра,
Сытӧг йӧзлы гажтӧм, дерт.

Тӧвся лун, кӧть дженьыд сывъя,
Зэв жӧ кыпыд сьыланкывъя.
Тӧдӧны бур зонъяс-нывъяс —
Сьыланкывтӧгыд он ов.
Сэні-й мусукасьӧм кывсьӧ,
Йӧз кост олӧм-вылӧм сьывсьӧ,
Тшӧтш и бур кыв пӧльяс йывсьыд
Важ моз кылӧ тэнад лов.

Пытшкад — казьтылантор уна.
Сы вӧсна и долыд мунан
Изьва дорті тӧвся лунас,
Мый тан ставыс тӧдса, ас.
И со ачыд сьывны панан,
Алӧй рӧм-сер ӧшйӧ банад,
Сьӧлӧм шыыд тӧвру паныд
Оз-ӧ чужан вӧр-ва пальӧд,
Содтӧд лэдзыштан кӧ бас?

Кывтӧ сьылӧм асшӧр ӧдӧн.
Думнад аскиӧ нин мӧдан,
Ловнад-вежӧрнад тэ тӧдан:
Йӧзас мичлуныс оз быр.
Мед нӧ, бара кӧ на шуны,
Шуда лоас чужан муным
Ӧні, талун, аски — пыр!