МЕД ЙИТӦД ЫБЫСКӦД ОЗ ОР
Выль урожайнӧй сьылан, лыб, Быд пельӧсын тэ инмӧд асьтӧ. Мед, мудзтӧдӧ кӧ арся ыб, — Ми тӧдам сылысь кузьта-пасьта. И мышъясысь, и мусьыс ру Со кайӧ... Рытӧдз оз ло чӧв тан. Мый гожӧмбыдӧн быдтіс му — КамАЗ-лы мышку вылас сӧвтам... Тан дышлуныслы сӧмын тас: Оз артмыв бурыс некор уджтӧг. Быд бӧрӧздаын шына пас, И быттьӧ ружтӧ нин КамАЗ, А мышку вылыс джудждӧ, джудждӧ... А картупельыд пӧ мӧд нянь, Оз овны сытӧг сикт ни, кар ни. И кывтӧ-гывдӧ, бур да шань, Совхознӧй муысь перйӧм зарни. «Он мынлы, — аслыд шулан, — тась...» Но костӧ веськӧдыштан бара — Бӧр уджӧ сибӧдчыны дась, И сьӧлӧм тіпкӧ нӧшта яра. Эм пытшкӧсаным сӧвесть би — Он сыӧн олӧм туяс ылав. Ӧд мулысь вынйӧр-эбӧс ми И вир-яйӧн, и лолӧн кылам. То енэж — кымӧра, то — лӧз, Но му выв удж шы ӧтмоз кылӧ. Ӧд локтім шефъяс, карса йӧз, Ми сиктсаяслы отсӧг вылӧ. И татӧн, ыбас, лёк и бур Тэн ставнас сьӧлӧм бердад инмӧ. Тан видзӧдлан тэ, он кӧ дур, Дзик быдтор вылӧ мӧдджык синмӧн. Кӧть морт тэ ыбас абу выль, Но аслыд сыысь бара долыд, Мый тэ и ыблы сетан вын, Мый тэ и татчӧс йӧзас колан. Тан код нӧ вермас лоны нор? Эм кыпыдлун — ог олӧй сытӧг... Мед йитӧд ыбыскӧд оз ор, Кыдз олӧм вужсӧ кутысь йитӧд.
Гижӧд
Мед йитӧд ыбыскӧд оз ор
Жанр: 
Гижан кад: 

lkejrlkelkrgner klrjnelknfrkl ekjnrjkenfrej

1