БАРА НА ТӦД ВЫЛӦ ВӦЛӦ
Чужан Комиам тӧдӧ и менӧ оз ӧти совхоз, Но оз кыдзи поэтӧс, оз век кыдзи гижысьӧс, оз... Кысь нин ёртанӧй, чӧвлы! Кӧть и ме ог куш сьыланӧс корсьӧмысь мудзтӧдлы кос, Страда дырйи, мед недыр кӧ, уджавла сиктсаяс моз — Сюрліс куртны и сюртны, и чӧвтны. Сӧмын ытшкысьны помӧдз эг велавлы, эг, Покос вылын кӧть тылым моз некор эг лег, Вӧлі скӧрлунӧй ас вылӧ петӧ. Ӧти гожӧмӧ, шонді кор сотіс, кыдз би, Шахов Петыркӧд веськалім видз вылӧ ми, Зеленеч мӧдлапӧлӧ, кӧн Эжвасӧ юковтӧ ді, Колӧ ты бок пӧ ытшкыны сэтӧн. Паніс покоссӧ Шахов кор, ваткыльтігтыр, Сэк и ме сэсся эг жӧ нин жуйвидз зэв дыр, Сьӧвзи киясам, гӧрбуша эбӧсӧн тыр, Шурс да шарс! — менӧ здукӧн он такӧд. Шурс да шарс! — вӧчи, ырыштчи да, воськов-мӧд. Сэсся-й казялі: ытшкысян слӧйсӧ ог тӧд, Лолӧй тырис, а косаӧй турунсӧ лякӧ. Зіля, шенася, ӧвтча — ӧд ог жӧ па сьӧлӧмнам усь, Мися, вывтіджык туруныс петӧма кузь. Сійӧ-й ӧтарӧ падмӧдӧ менӧ. Но ӧд, шонді кӧть лябмӧдӧ, ог на тай узь: Слӧйсӧ аддза — и ачымӧс вена! Мыйкӧ, казялі, Шаховлӧн ылысмис визь... Юрӧс лэпті да, горӧдсис: «Ук тэ!» Ӧтар-мӧдарас туруныс вольсассьӧ сідз, Быттьӧ тӧрыт на-й Петырыс эновтліс видз, Быттьӧ косасӧ киысь эз пуктыв. Воис ты помӧдз нюжмасьтӧг-шогтӧг — Со нин, видзӧда, воча мен локтӧ, Кыліс Петырлысь горӧдчӧм ляпкалӧм сён: «Мый нӧ, Поповӧ, мыйкӧ тай кольччыштін, зон? Э-э, да тадзи мӧй кутлӧны вороп? Китӧ, веськыдтӧ, вылӧ, а шуйгатӧ — увланьыс, тадз. А кор мӧдарӧ шеныштчан — киястӧ вежан сэк нач. Ноко, этійӧ діторсӧ орӧд». Босьтчи, мӧдӧдчи... Лэптыссис збоймӧдан ру... Надзӧн, надзӧн, но артмыны, артмыны кутіс! Быттьӧ вынсьӧдіс веж пиын лолалысь му — Сямӧй мыччысис тыдавтӧм кудйысь. Рассӧ, этійӧс, быттьӧкӧ тӧдлі нин важӧн, — Сэтшӧм кыпыд да шӧвквидзысь лоис сэк рас, Сэк, кор чульк йылын котыртім недырся пажын, Югзис сьӧлӧмӧй кытыськӧ сибалӧм гажӧн, Рассӧ кытшовтысь веретя лоис мем ас. Кор нин рытгорув, вуджны мед, лэччалім пыжӧ, Чайтсис, ытшкӧмнам вешті ме коркӧся мыжӧс. А кор ньылӧмӧс Эжваыс мыськовтіс-нуис, Нӧшта муса да дона мен лоис сэк юыс. Век, кор збыльмӧда ас водзӧ сувтӧдӧм мог, Быттьӧ шондіа морӧсам лолӧ. И кор кодікӧ олӧмас колана ног Менӧ веськӧдӧ-туйдӧ, мед эг тӧдлы шог, — Сэкся ытшкысьӧм бара на тӧд вылам волӧ.
Гижӧд
Бара на тӧд вылӧ воӧ
Жанр: 
Гижан кад: 

lkejrlkelkrgner klrjnelknfrkl ekjnrjkenfrej

1