* * *

Россия, лым вӧсна тэ еджыд
И пожӧм вӧсна зарни, дерт...
Оз лыбзьы турӧбъяслӧн этшыс,
Чӧв усис бара чужан эрд.

А мыйта кымӧр таті муніс
Да кутшӧм шуштӧм лоліс сэк,
Но важ моз лӧзалӧ тай луныс,
И лымйыс югыд, кыдзи-й век.

И гулыд эрдас ылӧ-ылӧ
Зэв кокниа, кыдз эзысь ру,
Збыль, гашкӧ, шудлӧн торган кылӧ,
Мед нӧшта кыпыд вӧлі му.

И посводзӧ кор пыра тӧлын,
Здук ланьтла, кывзысьтӧг ог ов, —
Быд шылы вочавидзӧ сьӧлӧм,
И ачыс шыасьӧ сэк лов.