ДА МЫЙСӦ МЕ ЙЫЛЫСЬ ОЗ ШУНЫ

Ой, важ моз шлывгӧ Изьва юным,
Нэмъяс шлывгӧ, а век том.
Да мыйсӧ ме йылысь оз шуны,
Он тай тупкы йӧзлысь вом.

Ой, быттьӧ муні-муні тӧрыт,
Катыдпомын сувтлі тон,
Да быттьӧ гортӧдз вой шӧр бӧрын
Менӧ колльӧдӧма зон.

Ой, быттьӧ вашкӧдчим ми кыкӧн,
Сэсся нинӧм мен эз ков.
Да быттьӧ окаси ме сыкӧд,
Тырліс долыдӧйла лов.

Ой, быттьӧ асылӧдз ме сэсся
Син эг куньлы — олі пыр.
Да сьӧлӧм ӧдӧбджыка пессьӧ,
Быттьӧ збыльысь шудӧн тыр.

Ой, йӧзыс весьшӧрӧ оз шуны,
Гашкӧ-й вӧлі сэтшӧмтор.
Да важ моз шлывгӧ Изьва юным,
Нэмъяс шлывгӧ, а век том.