ТЭНАД АСЫВ
З. Ф. Терентьевалы            

Ӧд пемыд на, пемыд на дзик,
А асыв нин воис.
И асъя ног долыд тэн лоис,
Мый бара со биасис сикт.
Тэ павгӧдін юр вылад шаль,
Но — эштан на, часлы!
И рӧмпӧштан петкӧдлӧ аслыд,
Мый том тэ, и авъя, и шань.
Лӧнь ывлалӧн лымйӧдӧм бан
Тэд нӧшта на муса,
И кыдзи нӧ бара он шу сэк,
Мый чужлін и олан тэ тан.
Тэд ю сайыс лӧзӧдӧ, тэд
Выль кӧдзыдыс ёнмӧ.
И он мӧй кыв содты тэ, он мӧй,
Мый кӧдзыдыс ёнмӧ — и мед?
Ӧд тувччавны торъя нин бур,
Кор кок улыд дзуртӧ.
И сідзикӧн кутан тэ юртӧ,
Мый лёк кыв и лёклӧн оз сюр.
Тӧв ньӧти на асьсӧ эз веж,
Быд пельӧсын — март-а.
И кывтыдын дӧввидзӧ карта,
Мый некытчӧ сыысь он кеж.
Мед шоглуныс ковтӧг эз босьт,
Тэ восьлалан. Со ӧд —
И асылыс ас кадӧ воӧ,
Мый бӧрыньтны сійӧс оз позь.