* * *
П. Г. Доронин паметьлы            

Кор Льӧмъюын пемдӧ, а вой тӧв оз ӧвсьы,
а пожӧм век шувгӧ, а рыт-войыс кузь, —
сэк быдтор, мый вӧвсьыліс тан и эз вӧвсьы, —
мем ыльӧбӧн тӧд вылӧ воӧ, ог узь:

и рас йывті исковтысь кыаӧн шензьӧм,
и пысталысь дзользьӧмсӧ асалан здук,
и сьыланкыв тэчӧм, и ёртъяскӧд вензьӧм,
и кыпыдлун, кодӧс кӧть сё пельӧ юк.

Мый кадыскӧд ылысмис — бӧрсӧ оз во нин:
Ӧд кадыслӧн мусюрыс — ылыстысь сёрд.
Тан, этайӧ вевт улас, овліс Доронин —
важ гижысь, важ воин да-й менам важ ёрт.

Тат, пожӧмъяс горувті, рӧмдігас сійӧ
век ветлывліс, мӧвпъяссӧ кӧртавлігмоз,
син вевдорсӧ кӧрӧма, мышкасӧсь — кияс,
и тӧждысьысь синъяс оз ылӧдны, оз.

Сы вежӧрӧ, гашкӧ, сэк кослісны дырӧн
дас сизимӧд во, комын сизимӧд во,
а гашкӧ, Берлинӧ атакаӧн пырӧм
да ёртыс, код сыкӧд тшӧтш гортас эз во?

...Лӧнь ывлаыс аръявыв ас дінас дорӧ.
И Павел Григорьевич — быттьӧ на том —
век тшынӧдліс воднысӧ пыртӧдз «Аврора» —
дыр рӧмыдсӧ чуткаліс сигарет пом.

И ньӧжйӧник, тэрмасьтӧг, ышловзьӧм бӧрын,
важ кильчӧӧд пырліс...
Кор ӧні ме тан
выль кывбурӧс йиджтӧда важ пожӧм кӧрӧн,
мед мыччӧдны йӧзкостса олӧмлысь бан,
мем чайтсьӧ, кор асьсӧ жӧ вой тӧлыс октӧ,
кос, гылалӧм коръяснас шарӧдчигтыр,
кыдз быттьӧкӧ Павел Григорьевич локтӧ,
дыр чышкалӧ коксӧ — да ӧнӧдз оз пыр.