ПӦЛЬЯСӦН НИМТЫЛӦМ ЛУНӦ

Шуӧны олӧма войтыр:
Талун пӧ Ёгорей лун.
Кыаӧн кыптысьыс менам
Дзик мӧдтор понда оз вун.

Талун ӧд чужлӧма мамӧ
Печора ю бокын, сэн,
Кыті тай кытш вӧчӧ юыс,
Сиктас, код матыс и мен.

Журъялӧ ыркӧдысь тӧв ныр, —
Оз на, зон, лӧньтаслы шед.
Ёгорей локтӧ пӧ ваӧн,
Ывласӧ мыськавны мед.

Кӧсъя, мед югъялӧ талун
Быд войвыв юлӧн быд вож,
Кӧсъя, мед ва весьтсьыс шонді
Асывсянь рытӧдз эз вош,

Быдӧнлы вӧлі мед долыд —
Налы, код сьӧлӧмнас бур,
Быдӧнлӧн вӧлі мед вылын
Ывласьыс кольмыштӧм юр,

Быдӧн мед выльланьӧ синӧ,
Оласног мед эз ло руд...
Сиа ме мам чужан лунӧ
Ставлы кузь нэм да бур шуд!