НЫВ «ГРЕК» ШОБӦМ
Куим торъя пьеса, коми олӧмысь
Йӧз:
МАРЬЯ — ныв, 20 арӧса.
ВАНЬӦ — сылӧн вок, ар 12–13.
АННА — налӧн мам, дӧва, ар 42.
ПЕДӦР ПЕТРӦВИЧ — сельсӧветса секретар, ар 22.
КИРӦ ПЕТЫР — сылӧн бать, озыр крестьянин, ар 45, зэв вылӧ асьсӧ пуктӧ.
ГАБӦ — сельсӧветын стӧрӧж, пӧрысь морт.
ЁГОР МИКАЙЛӦВИЧ — партия ячейкаса секретар, ар 23–25.
ӦНИССЯ, ар 35 }
КАТЯ, ар 37 }
СТЕПА, ар 40 } нывбабаяс,
НАТАЛЬ, ар 50 }
ПЕКЛА, ар 30 }
ӦКСИНЬ — бабитчысь, пӧрысь старука.
СЕМӦ ИВАН }
ПЕТЫР СТЕПАН } мужикъяс.
КУЗЬМА ВАСЬКА }
МИЛИЦИОНЕР.
СУДЫН ЮРАЛЫСЬ.
СЕКРЕТАР.
ЗАСЕДАТЕЛЬЯС суд вылын (2).
ПАНАСОВА — мыждысь (суд вылын).
ЙӦЗ (суд вылын): бабаяс, мужикъяс, нывъяс.
1-я да 2-ӧд торъясыс вӧчсьӧны тӧлын, ӧтик лунӧ.
3-ӧд торйыс вӧчсьӧ гожӧмын, воӧн-джынйӧн мысти.
МЕДВОДДЗА ВӦЧӦМ.
Сельсӧвет. Прӧстӧй керка. Веськыда кык ӧшинь; ӧшиньяс дорас пызанъяс (кык); пызанъяс вылас гумагаяс, нигаяс, чернила, ручкаяс. Шуйгавылас ӧтик ӧдзӧс (ывлаӧ); стен пӧлӧныс лабич. Веськыдвылас мӧд ӧдзӧс; ӧдзӧс дорас шкап. Стенъясас портретъяс Ленинлӧн, Калининлӧн; сэсся ляскалӧма да тув йылӧ ӧшлӧма кутшӧмсюрӧ гумагаяс. Кымынкӧ улӧс. Тӧвся лун.
1-я петкӧдчӧм.
ГАБӦ (ӧтнас, ветьӧкӧн чышкалӧ пызан вывъяс). Бур йӧзлы талун праздник — вӧскресенньӧ, юрбитны вичкоӧ ветлісны, а миянлы некор — службатӧ ӧд он эновт... Регыд нин, кӧнкӧ, и секлетарыд локтас, бара лунтыр он эштыв пуксьывны... Мӧдарӧ кӧ шуны, сытӧг ӧд оз жӧ и позь. Сы вылӧ и власьт — командуйтны мед. А миян коддьӧмсӧ колӧ бура зурйӧдлыны, медым велалам овныс ӧнія сӧвет власьт дырйиыс. Педьӧыд, со... (Друг сьӧлыштӧ, видзӧдлӧ гӧгӧр.) Тьпу! трустыд пыр важ ногӧн шусьӧ. Зэв ӧд лӧгасьӧ Педьӧнад кӧ шуан: эн пӧ сідз менӧ шу, шу пӧ Педӧр Петрӧвичӧн. Дерт, Петрӧвич, Кирӧ Петырлӧн пи да. Дзик жӧ батьыс кодь збыту... Сэсся абу жӧ и лӧсьыд чина-власьта морттӧ Педьӧнад шуны... Коймӧд во нин секлетаралӧ, ставсӧ бергӧдлӧ ӧтнас, — старӧста... али нӧ, председатель шоча и волывлӧ татчӧ. Мый сэсся, мортыд этша-этш велӧдчӧма, гижны мастер — толькӧ шаркӧдӧ перӧнад кабала вывтіыд. Кык морт и эм миян Кунвадорад татшӧмыс — мӧдыс Терень Микайлӧ Ёгор, камунист партияын секлетаралӧ. Сійӧс шуӧны Педӧр Петрӧвичсьыд на сюсьджыкӧн, сійӧ пӧ весиг и сыысь на ыджыдджык чина... Вежсис тай, зонмӧ, пӧраыд. Важӧн вӧлі олӧма йӧзджык натшальствуйтӧны, ӧні ставыс кутіс лоны томуловысь. А ме, со, выжыв пӧрысьӧдз олі да, ассьым ним овӧс ог куж пасйыны. Ещӧ ӧд Педӧр Петрӧвич и сералӧ менӧ: тэ пӧ, Габӧ, тшӧтш лыддьыссян сӧветскӧй служакӧн, а кырымасьны он куж. (Пуксьӧ пызан сайӧ, босьтӧ ручка.) Час жӧ ещӧ ӧтчыд видла (корсьӧ гумага), кабалаыс тай абу-а... (Лапкӧдӧ гумага чукӧр пызан вылысь.) Татысь вӧрзьӧдны оз позь Педӧр Петрӧвич шуӧ: пызан вылысь пӧ нинӧм эн вӧрӧд, тані пӧ ставыс «делӧяс». Тайӧяс вылын пӧ да, со, (индӧ шкап вылӧ) эсійӧ шкапас мый эм и сулалӧ став кутӧдыс да олӧмыс Кунвадорса обществолӧн... (Видзӧдӧ стенӧ.) Часлы, тані тай кутшӧмкӧ кабалаяс ӧшалӧны. Стенсьыд, ме чайта, позьӧ. Педӧр Петрӧвич стенӧ ӧшлӧм кабалаяс йылысь нинӧм эз шулы. (Нетшыштӧ ӧтик лист.) Нолтӧ, видлам. «Габӧ», «Габрил»... Миколлӧн пиыс шуӧ: тэнад нимын пӧ, дедӧ, медводдза букваыс сувтса коколюка кодь, крукыльнас веськыдвылӧ. (Гижӧ.) Ок, трустыд, кутшӧм вӧсньыдик артмис, оз и тӧдчы. Часлы жӧ мӧдар помнас босьтчыла. (Сюйлӧ чернила дозйӧ ручка помсӧ, гижӧ, вашъялӧ.) Со тай, небось, тӧдчыны кутіс!.. Мыйла нӧ, пӧдлиннӧ, тадзи ручка помнас оз гижны? Эськӧ быдӧн вермисны гижӧдтӧ лыддьыны, весиг неграмотнӧйяс. Талун жӧ Педӧр Петрӧвичӧс чуйдӧда, мед мӧдар помнас кутас гижны быдтор пемыд крестьяналы. (Кылӧ кок шы.) Локтӧ кылӧ. (Ӧдйӧ чеччӧ, чышкалӧ улӧс вывъяс.)
2-ӧд петкӧдчӧм.
ПЕДӦР (пырӧ, пӧрччысьӧ). Некод на эз волы талун?
ГАБӦ. Эз, Педӧр Петрӧвич, некод на эз волы.
ПЕДӦР (пуксьӧ пызан сайӧ, аддзӧ Габӧлысь «гижӧдсӧ»). Тайӧ нӧ мый? Габӧ, коді нӧ тайӧ гумагасӧ марайтіс?
ГАБӦ. Ог тӧд, Педӧр Петрӧвич, некод эз пырав татчӧ.
ПЕДӦР. Кутшӧмкӧ крукыльяс вӧчалӧма. (Видлалӧ скӧра.) Тэ ачыд тайӧ вӧчалӧмыд, чӧрт! Со, чернилаыс на уль. Пӧрысь выжыв!
ГАБӦ (вашъялӧ). Ме, ме, Педӧр Петрӧвич. Сійӧ ме велӧдчи гижны ассьым нимӧс — «Габӧ»... Тэ, Педӧр Петрӧвич, гиж ручка мӧдар помнас, тӧдчасджык быдӧнлы...
ПЕДӦР (косьтӧ гумагасӧ). Ланьт, скӧтина! Кымынысь тэныд шулӧма вӧлі: некутшӧм гумага, мися, эн вӧрӧд пызан вылысь?
ГАБӦ. Ме сійӧ кабаласӧ эг пызан вывсьыд босьт, Педӧр Петрӧвич, — стенын вӧлі ӧшалӧ да...
ПЕДӦР (торкӧ скӧра). Ӧткодь! (Таркӧдӧ чуньнас пызанӧ) Ме, вот, тэнӧ таысь под суд сета да, асьтӧ чӧртӧс стенӧ ӧшӧдасны, кылан?
ГАБӦ (копрасьӧмӧн кевмӧ). Прӧстит, Педӧр Петрӧвич, менӧ, йӧй старикӧс. Водзӧ сэсся нинӧм ог вӧрзьӧд.
ПЕДӦР. Смотри тэ, водзӧ кӧ ещӧ казяла — вӧтла да под суд сета. Сэки лоӧ во вит-ӧ-квайт тюрмаын тэныд виньгыртны. Эн вунӧд: ставыс, мый эм тані да, со, эсійӧ шкапас, «делӧяс». (Ӧшӧдӧ стенӧ гумагасӧ. Кост.) Ӧні мун ветлы да кор татчӧ кодсюрӧӧс. (Кыскӧ зепсьыс гумага.)
ГАБӦ. Кодъясӧсджык, Педӧр Петрӧвич?
ПЕДӦР. Мун пасьтась да, вӧлисти.
Габӧ петӧ веськыдвылӧ.
3-ӧд петкӧдчӧм.
ПЕДӦР (ӧтнас, дӧзмӧмӧн). Служба жӧ ӧд, чӧртыд, тайӧ. Некор спокой абу, пыр лоӧ ноксьыны. Ӧтитор неладнӧ, мӧдтор незаконнӧ вӧчӧны... Мый сэсся татшӧм йӧй йӧзыдкӧд керан? Оз гӧгӧрвоны сӧвет власьтлысь законъяссӧ, кӧть юраныс нӧшкӧн тувъяв.
4-ӧд петкӧдчӧм.
ГАБӦ (пырӧ, пасьтасьӧма). Кытчӧ колӧ ветлыныд, Педӧр Петрӧвич?
ПЕДӦР. Первой кор Ёгор Микайлӧвич, ячейкаса секретарӧс.
ГАБӦ (юрнас лайкнитӧ). Кыла.
ПЕДӦР (видзӧдлӧ гумага вылӧ). Сэсся со кодъясӧс кор, кывзы, эн вунӧд: Спира Катяӧс — Гриша Вань гӧтырӧс; сэсся Кузьма Ӧниссяӧс — Кӧсьта Митрей моньӧс; ещӧ кор Закар Натальӧс... Но, ӧні кежлӧ тырмылас, вунӧдан. Кор, дзик пыр мед локтасны татчӧ, шу, сельсӧветса секретар прикажитіс.
ГАБӦ. Ладнӧ. (Петӧ шуйгавылӧ.)
5-ӧд петкӧдчӧм.
ПЕДӦР (ӧтнас; чеччӧ да ветлӧдлӧ ӧтарӧ-мӧдарӧ). Аттӧ, сё морӧ, йӧз! Нырулад мыж вӧчӧны да он тӧдлы... Но-но-но, Марьюшка, мый тэ лыстӧмыд вӧчны!.. Тэ кӧнкӧ чайтін: оз пӧ казявны власьтъясыд? Миянысь гусьӧн немтор он вӧч. Ми сы вылӧ и эмӧсь, мед видзӧдны гӧгӧр, мед быдтор муніс по законам РСФСР!
6-ӧд петкӧдчӧм.
ЁГОР (зэв ӧдйӧ пырӧ; киняулас папка). Тэ нӧ, Педӧр Петрӧвич, нинӧм на эн кывлы? (здоровайтчӧ; папкасӧ пуктӧ пызан вылӧ).
ПЕДӦР. Мый йылысь, Ёгор Микайлӧвич?
ЁГОР. Матьвей Марья йывсьыд? (Пуксьӧны кыкнаныс.)
ПЕДӦР. О-о! Ме ӧні стӧрӧжӧс тэ дінӧ самӧй ысті сы йылысь. Мый тэ думайтан, Ёгор Микайлӧвич, та йылысь?
ЁГОР. Мый нӧ думайтныс? Колӧ пырысь пыр жӧ протокол вӧчны да под суд сетны Марьясӧ... Ок, чорыда жӧ и судитасны стервоӧс!.. Эсы ыджда мыж колӧ жӧ, другӧ, вӧчны. Кыдзи нӧ сылӧн киыс кыптӧма сы вылас?
ПЕДӦР. Но, гулящӧй нылыдлы нӧ мый? Чуркаыд ӧд некодлы абу колантор.
ЁГОР. Ӧні тон петкӧдласны сылы, колантор абу. Корсин кӧ чуркатӧ — куж и быдтыны, эн ви... Да ӧд кыдзкӧ ми быдтор йылысь медбӧрын тӧдам! Эськӧ миянлы, коммунистъяслы, колӧ ставсӧ медвойдӧр казявныс: ми ӧд став политикасӧ нуӧдам, сійӧн и шусьӧ «диктатура пролетариата»...
ПЕДӦР. Чӧртыс тӧдӧ, мыйла сідзи. Ми ӧд эськӧ сідз жӧ став власьтнас тані бергӧдлам да, став Сӧветскӧй аппаратыслӧн органъяс да, пыр мыйлакӧ йӧзсьыс колям. Вӧлӧмкӧ, сикт кузя нин йӧзыс сёрнитӧны Марья йывсьыд, а ми нинӧм на ӧнӧдз эгӧ кывлӧй. Талун батьӧ вичкоысь локтіс да шуӧ меным: мый нӧ пӧ ті, сӧветскӧй натшальникъяс, видзӧданныд? Ныр уланыд пӧ сэтшӧм мыжъяс вӧчӧны да, нинӧм онӧ аддзӧй. Ме быдӧн шай-паймуні: кутшӧм мыжъяс нӧ, мися, кодъяс вӧчӧны? — Юала. Сэки вӧлисти и тӧді ме: Матьвей Марьяыд пӧ челядясьлӧма нин дай удитӧма нин пӧ важӧн чуркатӧ дзебны-вины... Со ӧд кутшӧмӧсь ӧнія нывъясыд! Кыскасясны, кыскасясны да сэсся пияннысӧ джагӧдасны А бӧртинас ноксьыныс лоӧ миянлы!
ЁГОР. Но, мед. Мыжсӧ кӧ вӧчис — мед оз элясь сэсся миян вылӧ. Равноправйӧсӧ ӧд эз сы вылӧ лӧсьӧдны... Ме водзвыв верма шуны: Марьятӧ наперво вит во кежлӧ тюрмаӧ йӧршитасны-а... Колӧ ӧдйӧнджык, мися, протокол вӧчны да арестуйтны Марьясӧ.
ПЕДӦР. Ме ысті кодсюрӧӧс корны нин эськӧ да. Регыд, ме чайта, локтасны.
ЁГОР. Кирӧ Пеклаӧс нӧ корин эн? Меным сійӧ и висьталіс Марья йывсьыд.
ПЕДӦР. Васька Ёгор гӧтырӧс? Эг... Час, стӧрӧж воас да ыстылам.
ЁГОР. Сэсся батьтӧ колӧ корлыны тшӧтш. Кымын унджык свидетель чукӧрмас, сымын надежнӧджык тайӧ делӧыс лоас.
ПЕДӦР. Дерт, ставсӧ колӧ вӧчны закон серти, мед некод эз вермы некытчӧ крукасьны. (Видзӧдӧ гумага вылӧ.) Свидетель квайт кымын буракӧ ӧні лоӧ нин. Ещӧ ковмас корны Опонь Иван Степаӧс. Сыкӧд тӧрыт Марьяыд пывсьӧма да, нёньяссьыс пӧ йӧв петӧ. Гӧгӧрвоан, Ёгор Микайлӧвич?
ЁГОР. Но, гӧгӧрвотӧг ӧд ог ов. Менам аслам бабаӧй куимӧс нин вайліс да, сьӧкыд дырйи некутшӧм йӧв оз мыччысьлы, йӧлыд лоӧ челядясьӧм бӧрын вӧлисти... Сэсся со мый колӧ вӧчны, Педӧр Петрӧвич: тані протокол гижӧм бӧрын колӧ понятӧйясӧн ветлыны Марья ордас, гортас, да видлавны сійӧс, кыдз шуласны — вӧчны сылы «экспертиза». Сэки сэсся некод нин оз кут шуасьны миян вылӧ.
ПЕДӦР. Вернӧ тэ шуан, Ёгор Микайлӧвич! Збыль колӧ асьсӧ видлавны ветлыны, непременнӧ. Дерт, ми асьным огӧ кутӧ видлавныс, босьтам нывбабаясӧс, найӧ ӧд тӧдӧныджык.
ЁГОР. Дерт нывбабаясӧс, найӧ видлаласны, а ми видзӧдам да акт вӧчам сы йылысь. Ковмас тшӧтш милиционерӧс босьтлыны, гашкӧ прӧтивляйтчыны Марьяыд кутас да...
ПЕДӦР. Ладнӧ, ставсӧ вӧчам по законам РСФСР.
7-ӧд петкӧдчӧм.
Пырӧны: Габӧ, Катя, Ӧнисся, Наталь.
ГАБӦ (пыригмозыс). Ставнысӧ вайӧді, Педӧр Петрӧвич, сӧмын Ёгор Микайлӧвичтӧ эг аддзы.
ЁГОР. Ме тані нин.
ГАБӦ. Збыль тані и эм. Вежӧн буракӧ кыдзкӧ лоим.
ПЕДӦР (нывбабаяслы). Ті, тьӧткаяс, мунӧй да регыдик стӧрӧжкаас пукыштӧй. А тэ, Габӧ, кольччыв на.
НАТАЛЬ. Мый нин нӧ сэтшӧмыс лои тіян, господин секлетар? Весиг Габӧ ӧбедайтны эз лэдз, мырдӧн кыскис: мунам пӧ пырысьтӧм-пыр...
ГАБӦ. Кыдзи прикажитӧма вӧлі — сідзи и вӧчи ме.
ПЕДӦР. Дерт, прӧста огӧ корӧ некодӧс, а корӧма кӧ — колӧ пыр жӧ и локны, жуйявны оз позь... Но, мунӧй эстчӧ! (Шеныштӧ кинас веськыдвывлань. Нывбабаяс петӧны.)
8-ӧд петкӧдчӧм.
ПЕДӦР (Габӧлы). Тэ, Габӧ, мун ветлы да со кодъясӧс ещӧ кор татчӧ: Опонь Иван Степаӧс, сэсся Кирӧ Пеклаӧс — Васька Ёгор гӧтырӧс, менсьым батьӧс да милиционерӧс. Гӧгӧрвоин? Эн вунӧд.
ГАБӦ. Кыла, Педӧр Петрӧвич. Дзик пыр тінгыртла. (Петӧ шуйгавылӧ.)
9-ӧд петкӧдчӧм.
ПЕДӦР (перйӧ гижан гумага). Но, сэсся ковмас протокол гижны. (Кӧсйӧ гижны.) Дерт, рочӧн лоӧ гижны?
ЁГОР. Рочӧн, непременнӧ рочӧн. Та ыджда делӧ йылысь оз позь комиӧн гижны; гашкӧ делӧыс тайӧ ВЦИК-ӧдз на мунас да, коминад сэні нинӧм оз гӧгӧрвоны.
ПЕДӦР. Ладнӧ. (Гижӧ.)
ЁГОР (чеччӧ, ветлӧдлӧ, вомгорулас сёрнитӧ, киассӧ шамралігтырйи). Но, ӧні сэсся Марьяӧс во вит кежлӧ кымын эськӧ и дзумгылам тюрмаӧ... Тайӧ делӧыд кӧ помӧдз лючки мунас, ме чайта, и менӧ кутасны уездсянь вылӧджык пуктыны, дай вермасны карӧ служитны корны. Тані ӧд нинӧмӧн он вермы асьтӧ петкӧдлыныд, кӧть нэмыд уджав — пыр лыддьысьны пондан деревенскӧй роботникӧн. А менам ӧд эськӧ эм жӧ ичӧтика юр вежӧрыд да, оз тӧдны-а!.. Но, ӧні сэсся тайӧ делӧыс менӧ кыпӧдас гашкӧ. Уком, казялас менсьым тайӧ заслугасӧ да, кыскас уездӧ; уездсяньыд регыд верман веськавны обласьтӧ — Сыктывдінкарӧ. Сэні пуктасны кутшӧм кӧ заведующӧйӧ... Коркӧ сэсся татчӧ Кунвадорад волан гӧститны ли отпускӧ ли да, йӧзыдлӧн шензьӧмыд лоӧ: со пӧ Терень Мишыдлӧн пиыс мый ыджда чина мортӧдз воӧма!.. Код тӧдас, гашкӧ сэки Кунвадорад ог и видзӧдлыны кут да...
ПЕДӦР (дугдӧ гижӧмысь). Нолтӧ, Ёгор Микайлӧвич, кывзышт, кыдзи ме заводиті протоколтӧ гижны.
ЁГОР. Но-но, вай лыддьы. (Сувтӧ пызан дорӧ.)
ПЕДӦР (лыддьӧ). «1923 года декабря 16-го дня. Мы, нижеподписавшиеся, Секретарь Кунвадорского сельсовета, автономной Коми-зырянской области, Феодор Петрович Мырныров и секретарь Кунвадорской ячейки Ре-Ке-Пе Щалаков составили настоящий протокол следующем. Сегодня доходили нам слухи от нижепоименованных граждан села Кунвадора таковые, что у вдовы того же села Анны Максимовны Намыровой имеется дочь Марья Матвеевна, каковая еще теперь девица и таковая имела в животе незаконнорожденного ребенка, кокового неизвестно когда родила куда-то и такового убила или удавила, это ясно показывала грудь, потому что когда она парилась в бане, из титьки выходило молоко для незаконнорожденного ребенка таковой. Ввиду всего вышеизложенного и сделали таковой протокол, который записали допрос нижепоименованных свидетелей: Первое. Спросили крестьянку Кунвадорского села»... Ӧні кодӧскӧ чуксалам да юалам...
ЁГОР. Тэ, Педӧр Петрӧвич, веж «незаконнорожденнӧй» кывсӧ, — «внебрачнӧй» гиж сы пыдди; ӧні ӧд «незаконнорожденнӧйыд» абу нин буракӧ, а «внебрачнӧйыд» лоӧ верӧс сайӧ мунтӧдз пиалӧм...
ПЕДӦР. А, ме ногӧн, эськӧ бурджык кольны «незаконнорожденнӧйнас», сійӧ ачыс нин висьталӧ — абу закон серти рӧдитӧма, да сы понда ёнджыка вермасны мыждыныс суд вылад.
ЁГОР. Колям инӧ сідзи... Вай кор кодӧскӧ, ӧдйӧнджык колӧ делӧсӧ вӧчны.
ПЕДӦР (мунӧ веськыдвывлань, чукӧстӧ ӧдзӧсӧд). Нолтӧ, кодкӧ ӧтик волӧй татчӧ! (Бӧр пуксьӧ. Пырӧ Катя.)
10-ӧд петкӧдчӧм.
ПЕДӦР. Лок татчӧджык, Катя. (Катя полігтырйи матыстчӧ.) Ми ӧні кутам тэнсьыд юасьны мыйсюрӧ да, висьтав веськыда, эн соссьы немтор.
КАТЯ. Мый йылысь нӧ? Ми мыйкӧ мӧвпалім да, мӧвпалім ӧні куимӧн, да эгӧ и тӧдӧ, кутшӧм грек суис миянӧс.
ЁГОР. Тіянӧс эськӧ некутшӧм грек на ӧнӧдз эз су да, мукӧд грек понда тай, со, лоӧ кыскавныс тшӧтш-а...
ПЕДӦР (юасьӧ, сэсся гижӧ вочасӧн). Вай жӧ висьтав, Катя, мый тэ тӧдан Матьвей Марья йылысь?
КАТЯ. Но-о, сы йылысь вӧлӧм корӧмныд!.. Мый нӧ менсьым сы йылысь юасьныс! Ме ӧмӧй куш ӧтнамӧн тӧда? Став сикт кузяыс нин ӧд Марья йывсьыд сёрнитӧны. Быдӧн вӧлі тӧдӧны сылысь сьӧкыдсӧ. Сэсся бӧръявылыс друг кытчӧкӧ быттьӧ рушкуыс воши. Вӧлӧмкӧ, челядясьӧма дай идралӧма нин чуркасӧ... Ачым эськӧ ме эг аддзыв Марьясӧ да, Кӧсьта Митрей монь — Ӧнисся — меным тӧрыт рыт висьталіс. Талун вичкоысь локтігӧн аддзылі мамсӧ Марьяыдлысь — Максим Аннатӧ да шуткаӧн моз и юалі: ныв али пи нӧ, мися, Марьяыдлӧн чужис? Аннаыд менӧ, дитя, тайкӧ и нӧйтас: эн пӧ смекайтчы, шуӧ: некод на пӧ эз чуж... Дерт ӧд абу лӧсьыд пиалӧм ныв йывсьыд веськыдатӧ висьтавныд...
ПЕДӦР Тэ нӧ кывлін эн: нёньяссьыс пӧ йӧв петӧ Марьяыдлӧн?
КАТЯ. Петтӧг ӧд оз ов челядясьӧм бӧрад, ачым сы йылысь тӧда...
ПЕДӦР (Гижӧ; недыр мысти Катялы). Но пуксьы эстчӧ, лабичас сэсся... (Мунӧ да бара ӧдзӧсӧд чукӧстӧ.) Кузьма Ӧнисся, лок татчӧ! (Бӧр пуксьӧ.)
11-ӧд петкӧдчӧм.
Пырӧ Ӧнисся.
ПЕДӦР. Ми тэнӧ корим татчӧ, мыйкӧ тэ он-ӧ тӧд Матьвей Марья йылысь?
ӦНИССЯ. Со код понда вӧлӧм миянӧс кыскалӧны!.. Яндысьтӧм син сійӧ!.. Босьт жӧ да ви ассьыд дитяӧс!..
ЁГОР. Тэ збыль тӧдан — вийӧма чуркасӧ Марьяыд?
ӦНИССЯ. Ме? Не пӧштӧ ме, став Кунвадор нин тӧдӧ. Талун весиг вичко службасӧ ми вок коддьӧмыс эгӧ кывлӧй, — пыр вашкӧдчисны бабаяс сы йылысь. Ме тӧрыт пыралі на ордӧ, быттьӧ тшан корны могӧн, — Микӧла кежлӧ кӧсъя сур пуыштны да, — Марьяыс зэв жугыля вӧлі пукалӧ ӧшинь дорас. Сэсся петіс пывсян лӧдсавны. Мамыс ӧтарӧ няргӧ: янӧдіс пӧ, шуӧ, нылӧй менӧ...
ПЕДӦР. А тэ он тӧд, кытчӧ чуркасӧ Марьяыс иналӧма?
ӦНИССЯ. Пыдӧ, дерт, меститіс... Асьсӧ колӧ прамӧйджыка тӧрӧпитлыны сы йылысь. Кыскасис кӧ, мед и яндзимсӧ новлӧдлас!..
ЁГОР. Кодсюрӧ висьталӧны: быттьӧ кӧ пӧ Марьяыдлӧн нёньяссьыс йӧв петӧ?
ӦНИССЯ. Сійӧ ӧд висьталӧм оз ков, быд баба тӧдӧ — кага вайӧм мысти йӧлыд пыр лоас...
ПЕДӦР. (Гижӧм бӧрын, Ӧниссялы). Сэсся пуксьы лабичас. (Ӧнисся пуксьӧ Катякӧд орччӧн. Педӧр мунӧ да чукӧстӧ ӧдзӧсӧд). Наталь тьӧт, волы сэсся тэ татчӧ! (Бӧр пуксьӧ. Пырӧ Наталь.)
12-ӧд петкӧдчӧм.
ПЕДӦР Тэ, Наталь тьӧтӧ, дерт мыйяскӧ тӧдыштан жӧ Максим Анна ныв йывсьыд?
НАТАЛЬ. Марья йывсьыд?.. Стерво сійӧ, сэсся нинӧм!.. Сы йылысь и менӧ коринныд?.. Эштӧма эськӧ сылысь, трасичалысь, юрсӧ керыштны! Ме кӧ вӧлі Анна местаад, проклятӧйӧс эськӧ важӧн нин ёри да гири-люкӧн тойышті гортсьыс, мед кок помыс сэсся некор эз вӧв сылӧн!.. О, господьӧй!.. (Пернапасасьӧ.) Сылӧн бара абу жӧ нин пернаыд, дай сьӧлӧмыс абу тыдалӧ... Босьт жӧ да ассьыд ладинечӧс ви... Ок, пречистая богородича, Микӧла милӧстивӧй! (Кыкысь пернапас чӧвтӧ.) Кыдзи нӧ киыс пырӧма сылӧн аслас дитя вылӧ!..
ЁГОР. Пырӧма нин тай кыдзкӧ-а... Ӧні сэсся, со, и бур йӧзсӧ лоӧ сы понда кыскавны... Судъяс вылӧ на ковмас ветлыны и...
НАТАЛЬ. Со ӧд, сё батюшкоӧй, Микайлӧ аркандел, лов сетысь, лов босьтысь, пӧрысьӧ-нэмӧ кутшӧм причча и менӧ тшӧтш суис!..
ПЕДӦР. Сэсся нӧ мый ещӧ верман висьтавны сы йылысь?
НАТАЛЬ. Мый нин висьталан ӧні, зӧлӧтӧйӧй!.. Эсы мында грек Марьяыд вӧчӧма! Блуднича сійӧ, — некор оз мын сылӧн грекыс... Аслас ладинечлысь ловсӧ босьтіс, пырттӧг ни молитватӧг... О, господьӧй! (Пернапасасьӧ.)
ЁГОР. Тэ, Наталь тьӧтка, кыдзкӧ эн казявлы Марьяыслысь, нёньсьыс петӧ оз йӧлыс?
НАТАЛЬ. Ме, сё шайтӧй, дас кыкӧс вайлі — сизим пи да вит ныв. Меным мам йӧв йывсьыд оз ков висьтавны, кор сійӧ босьтчас петны... Марьяыдлӧн пӧ веськыда виялӧ йӧлыс... Тыдалӧ, тайӧ лунъясӧ на челядясьӧма...
13-ӧд петкӧдчӧм.
Пырӧны: Габӧ, Кирӧ Петыр, Степа, Пекла, милиционер.
ГАБӦ. Ставнысӧ кыски, Педӧр Петрӧвич.
ПЕДӦР (Натальлы). Мун пуксьы, Наталь тьӧтка, эстчӧ лабичас. (Наталь пуксьӧ.)
ПЕТЫР. Здорово, Ёгор Микайлӧвич! (Киасьӧны.) Мый могӧн нин менӧ татчӧ коринныд, натшальствояс?
ПЕДӦР. (Сетӧ улӧс.) Ӧнтая йывсьыд... Вай, батьӧ, пуксьыв регыдик кежлӧ. (Габӧлы.) Тэ, Габӧ, вай нуӧд Степасӧ да Пекласӧ стӧрӧжкаад, мед неуна сэні виччысьласны. (Милиционерлы.) А тэ, милиционер, пуксьы лабичас сэтчӧ.
Милиционер пуксьӧ. Габӧ, Пекла да Степа петӧны веськыдвылӧ.
14-ӧд петкӧдчӧм.
ЁГОР. Кытысь нӧ тэ, Петыр Кириллӧвич, кывлін Матьвей Марья йывсьыд?
ПЕТЫР. Кытысь кывлі? Став йӧзыс нин сы йылысь сёрнитӧны да! Ті тай, вот, сӧветскӧй натшальникъяс, нинӧм абу тӧдлӧмныд-а. Ме кӧ Педьӧлы эг висьтав, гашкӧ некор энӧ и казявлӧй да? Марья йывсьыд меным талун (бергӧдчылӧ, лабичлань видзӧдлӧ) тэ, буракӧ, Наталь, висьталін? Сэсся Степа...
НАТАЛЬ. Ме, ме, Петыр сват. Вичкоысь локтігӧн тай сёрниӧ воим да, шуи сы йылысь кыв мӧд...
ПЕТЫР Вывті жӧ нин ӧні нывбабауловсӧ пӧтачитӧны. Сійӧ и видзчысь, бабаыд друг видзны кутас, ке-ке-ке! (Серӧктӧ.) Дерт эськӧ, Марьяыдлӧн кӧ батьыс ловъя вӧлі, сира гезйӧн домаліс сюръя бердӧ да, бура и жняпкӧдіс беддьӧн... А мый дӧва мамыд вӧчас? Максим Аннаыд сэсся слабиник жӧ дай, эз куж нылыдлысь вӧлясӧ кутыштны... Со тай, сэсся мыйӧдз и воис нылыд...
ПЕДӦР Часлы, Опонь Иван Степалысь юалам. (Мунӧ чукӧстӧ.) Степа, нолтӧ волы татчӧ! (Бӧр пуксьӧ.)
15-ӧд петкӧдчӧм.
Пырӧ Степа.
ПЕТЫР. Степаыд, ме чайта, медъёна тӧдӧ: тӧрыт тшӧтш Марьяыскӧд пывсьӧмаӧсь да...
ПЕДӦР (Степалы). Тшӧтш тӧрыт пывсинныд Матьвей Марьяыдкӧд?
СТЕПА. Тшӧтш, тшӧтш.
ПЕДӦР. Мый нӧ тэ сэки сылысь казялін?
СТЕПА. Быдтор... Пывсянад ӧд ставыс тыдалӧ... Кынӧмыс эськӧ быттьӧ ыджыдджык на да, сійӧ овлывлӧ — мукӧдыслӧн челядясьӧм бӧрас вежон кык на тӧдчӧ кынӧмыс. Сэсся нёньяссьыс Марьяыдлӧн йӧв петӧ. Этадзи чабыртыштас (петкӧдлӧ кинас) да толькӧ чильскӧбтас йӧлыс; ачыс менсьым юалӧ: мыйла нӧ пӧ, Степа, тадзи? А ме быттьӧ нинӧм ог тӧд, сӧмын ачым думайта: «Тэ, мися, люба, эн йӧйтӧдлы менӧ; тэ тай ректӧмыд нин рушкутӧ, сійӧн и йӧлыд петӧ»...
Педӧр зіля гижӧ.
ЁГОР. А тэ эн юав, кытчӧ воштіс сійӧ кагасӧ?
СТЕПА. Эг кыдзкӧ юав; кӧсъя эськӧ вӧлі да, эг шыась сы йылысь.
ПЕТЫР. Йӧйталӧмыд жӧ сідзкӧ, колі нин ӧти сайын юавныс...
ПЕДӦР. Ми асьным юалам сылысь ассьыс!.. (Степалы.) Но, сэсся пуксьыштлы кытчӧкӧ. (Мунӧ да ӧдзӧсӧд чукӧстӧ.) Пекла, лок татчӧ, дай тэ, Габӧ, тшӧтш!
Бӧр пуксьӧ. Пырӧны Пекла да Габӧ.
16-ӧд петкӧдчӧм.
ПЕДӦР (Габӧлы). Мун петав, Габӧ, орчча керкаясас да зіля татчӧ кор Семӧ Иванӧс, Петыр Степанӧс да Кузьма Васькаӧс, мед пырысь-пыр жӧ локтасны.
ГАБӦ. Пыр-пыр. (Петӧ шуйгавылӧ.)
17-ӧд петкӧдчӧм.
ПЕДӦР (Пеклалы). Тэ нӧ, Пекла, кыдзи тӧдін Матьвей Марья йывсьыс?
ПЕКЛА. Лёкторйыд тай ачыс пеляд пырӧ, оз ков корсьысьны. Став Кунвадорыс ӧд тӧдӧ сы йылысь, не куш ме... Кӧть кодлысь юав — быдӧн висьталасны. А меным дивъя нин тӧдныд: керканым ӧд миян орчча Максим Аннаыдкӧд... Войдӧрлун кыдзкӧ рытнас сарайӧ петі да кыла: Марьяыд мыйкӧ зэв ёна кылӧ сараяс ли, карта вылас ли, ойзӧ... Ме пыр и думышті: «мися, челядясьӧ нин, коньӧрыд, буракӧ»... Талун асывводз пыралі на ордӧ да, некутшӧм кага абу... А тӧрыт рытнас, сёрӧн нин, мыйкӧ ёна чувъялісны биӧн... Ваньӧыслысь тӧрыт юалі: кодӧс нӧ, мися, ен сетіс чойыдлы — ныв али пи, мися, чужис! — да сійӧ шуис: некод пӧ некодлӧн эз чуж... Дерт, оз висьтавны сэтшӧмтор йылысь веськыда... Да ӧд казяласны жӧ, аддзасны кага шойсӧ...
ПЕДӦР. Аддзам, небось! Сы вылӧ ми и служитам Сӧвет власьтлы, медым вермасьны быдсяма лёкыскӧд да быдтор вӧчны по законам РСФСР!.. Но, сэсся ӧні ковмас ветлыны Марья дінас да видлавны сійӧс асьсӧ... Ті, Ӧнисся да Наталь тьӧтка, кутанныд видлавны — ті ӧд ёнджыка сійӧ делӧястӧ тӧданныд.
НАТАЛЬ. Тӧдам, сё шайт, тӧдам... Ме дас кыкӧс вайлі да, оз ков висьтавны...
18-ӧд петкӧдчӧм.
Пырӧны: Габӧ да 3 понятӧй.
ПЕДӦР. Со, и понятӧйяс воисны.
1-я ПОНЯТӦЙ. Здорово! Мыйлакӧ тай корӧмыд да, локтім-а...
ЁГОР. (Ставыслы сьӧлӧмысь.) Со мыйла, тӧварышъяс, ставнытӧ талун корим татчӧ: Ӧсип Матьвейлӧн Марьяыс вӧлі сьӧкыд, — быдӧн казявлінныд, дерт, — нӧбасьӧ вӧлі медбӧръя лунъясӧ нин. Сэсся чуркатӧ быдтыныд сылы яндзим, тыдалӧ, лоӧма да, рӧдитӧма дай виӧма... Тӧварышъяс! Коммунист партия миян шусьӧ «диктатура пролетариата», мӧд ногӧн кӧ шуны — став политика йывсьыс сійӧ медъёна тӧдӧ. Сӧвет власьтыд сыысь ичӧтджык кымынкӧ прӧчентӧн, да сэсся нывбабаяслы да нывъяслы лӧсьӧдісны равноправйӧ — либӧ, комиӧн кӧ, — ставыс ӧткодь: мужик кӧть, баба кӧть — сё ровно ӧні... Марья Намырова миян Кунвадорын вӧчӧма зэв ыджыд мыж — незаконнорожденнӧй ребёноксӧ ассьыс виӧма, дзебӧма... Тӧварышъяс! Ме, кыдзи коммунист, сулала за Сӧветскӧй власьт, тӧждыся пролетариат сек стран понда! Сы вӧсна Марья Намыроваӧс быть лоӧ под суд сетны, мед и мукӧдлы водзӧ кежлӧ пӧтачка оз ло!.. Тӧварышъяс! Делӧыс тайӧ ставнас нин зэв бура воссис, мыжыс дзик нин ки пыдӧс вылын моз тыдалӧ; рытын ойзӧма, войын биӧн чувъялӧмаӧсь, незаконнорожденнӧй кагаыс некӧн абу, нёньяссьыс йӧв петӧ... Ӧні, тӧварышъяс, протокол гижӧма, главнӧй свидетельяссӧ юалӧма, коли ещӧ асьсӧ видлавны да арестуйтны... Ӧні сы дінӧ гортас ставным и ветлам... Татшӧм мыжсьыд сійӧс непременнӧ судитасны вит во чӧж тюрмаын пукавны. (Босьтӧ папкасӧ.)
ПЕДӦР. Ичӧтджык наказанньӧ оз ло по законам РСФСР!..
КОДСЮРӦ. Сідзи-й колӧ, мед эз кыскась! (Заводиталӧны мунавны.)
Занавес.
МӦД ВӦЧӦМ.
Максим Анналӧн керка. Веськыда — ӧдзӧс посводзӧ. Шуйгавылас — кык ӧшинь; стен пӧлӧныс — лабич; пельӧсас — пызан, ен джадж. Веськыдвылас — занавес; таланьынджык — пач (пач вомыс видзӧдӧ сцена вылӧ), боксяньыс кайӧ пос (приступ). Кымын кӧ прӧстӧй улӧс. Тӧвся лун.
1-я петкӧдчӧм.
Анна пызан вылӧ ваялӧ (корсьӧ) сёйны: нянь куд, сов доз, мукӧдтор.
Марья пызан сайын сулалӧ да кушман зыртӧ тертукаӧн; сылӧн ичӧтика тӧдчыштӧ кынӧмыс.
АННА. Кӧні бара Ваньӧыс шӧйтӧ-а? Оз тӧд пажын кад...
МАРЬЯ. Воас да, пажнайтас, колӧ кӧ... Ырӧшыдла, мамӧ, пырав мун.
АННА. Мый нӧ ачыд эн вай? Сьӧкыд нин лои гӧбӧч поскӧдыд ветлыны? Ок, ок, ок, йӧз серам тэ, йӧз серам!.. Нэм кежлад тэ янӧдін асьтӧ дай менӧ тшӧтш, пежалін став семьянымӧс, рӧдвужнымӧс. (Петӧ занавес сайӧ.)
2-ӧд петкӧдчӧм.
МАРЬЯ. Прӧступитчысис нин тай менам да, мый керан сэсся... Коравліс тай Пиля да, ачыд жӧ эн сет... Нинӧмла ӧні и пойгыныс тэныд сэсся. Ачым ме мыжа — ачым и терпита ставсӧ... А йӧз больгӧмыд вылӧ нинӧм видзӧдны, мед кыдз кужасны вӧйпӧны менӧ, вомнысӧ ӧд он тупкы налысь... Тӧндзи тай карсянь воліс миянӧ ӧтик нывбаба да собранньӧ вылын висьтавліс: ӧні пӧ чурка ним абу, ныв кӧ пӧ верӧс сайӧ мунтӧдз пиалас — батьсяньыс пӧ судӧн позьӧ перйыны сьӧм кагасӧ быдтыны... Да ӧд судӧ ме Пиляӧс ог жӧ сет, — сэтшӧма радейтлі сійӧс да!... Сэсся ӧд абу сійӧ ставсьыс мыжа — ачым тай та выйӧдзыс вои, ещӧ сійӧ коравліс на менӧ-а... (Ышловзьӧ.) Ӧні дерт нин сыкӧд ми торъялім век кежлӧ. — Пиля мӧдӧс вайис... Мый керан? Кагаӧй кӧть коляс казьтылӧм вылӧ...
3-ӧд петкӧдчӧм.
АННА (пырӧ, киас ырӧш туис). Йӧз водзӧ нин весиг мыччысьны меным оз позь — быдӧн вомалӧны да сералӧны. Кӧть сэсся вичкоад нин эн ветлы... Талун тай Спира Катя вичкоысь локтігӧн ӧтлаасис дай юалӧ: ныв али пи нӧ пӧ Марьяыдлӧн чужис?.. О, господьӧй, кыськӧ тай корсьӧмыд жӧ тэ пежсӧ сійӧ! (юрбитӧ да пуксьӧ. Кыкнаныс сёйӧны.)
МАРЬЯ. Тырмас нин, мамӧ, сэсся... Мый нӧ пыр ӧтарӧ сы йылысь дольныс? Шуасьӧмнад ӧд он нин буракӧ справит...
АННА. На, сэсся и кыв эн шу? Тэ ӧд, буракӧ, абу бокӧвӧй меным — аслам ӧд тэ, рӧдимӧй. (Нора.) Мам сьӧлӧмад ӧд медъёна йиджӧ челядьыдлӧн лёк вӧчӧмыс. (Чышкалӧ синъяссӧ.)
МАРЬЯ. Бара нин бӧрдан!.. Бӧрд кӧть эн ӧд, мися, мый лоӧма — лоӧма нин...
АННА. Лоӧма нин тай эськӧ да... Корсьӧмыд да — дерт нин лоӧма... Абу тай тэ думыштӧмыд сы ыджда грек йывсьыс!.. Нэм кежлад ӧні кӧвъясяс тэныд «пиалӧм ныв» ним, кагаыдлы — «чурка»...
МАРЬЯ. Мед но! Мед кӧть кыдзи йӧзыд нимтасны... Ӧні «чурка» нимыд, мамӧ, абу, — юав тэ велӧдчӧмджык йӧзлысь, — ӧні став челядьыс ӧткодьӧсь...
АННА. Кысь нин нӧ ӧткодьӧсь? Нывъюрӧн кӧ кагатӧ ваян — пыр нин сійӧ «чуркаӧн» кутас лыддьысьны... Тӧді кӧ эськӧ татшӧм приччатӧ, колӧма жӧ тэнӧ Пиля саяд сетны да, сэки ӧд весиг ме эг и думыштлы тэнӧ та выйӧдз воны. Дзик уджалысь вӧсна сэки куті: Ваньӧ, мися, мед этша быдмыштас да, вӧлисти сета... Со тай сэсся мый лои... Коді та бӧрын сэсся тэ вылӧ видзӧдлас? Нэмыд колян лёк слава вылӧ...
МАРЬЯ. Мед но! Ме ог и мӧдӧдчы верӧс сайӧ мунныс. Гортын кута овны. Огӧ на ӧд дзик пӧгибӧ воӧ... Ӧні ӧд сэсся нывбабаясыдлӧн праваыс мужикъяскӧд ӧткодь, некод оз понды менӧ торъя увтыртны, вотчинатӧ оз жӧ чинтыны... Грамотаӧй толькӧ абу-а, эськӧ карӧ муні да сэтысянь куті сиктъясӧ ветлыны, сійӧ нывбабаыд моз жӧ коми аньясӧс велӧдны-югдӧдны...
АННА. Каганад нӧ кытчӧ мунан, коді тэнӧ босьтас? Прӧста нинӧм абусӧ мый сёрнитан?
МАРЬЯ. Кагаӧс сета приютӧ быдтыны... Велӧдчыныс вот некор-а. Карса нывбабаыд эськӧ шуӧ вӧлі: ӧні пӧ комиӧн велӧдӧны да, регыдӧн позьӧ велавныд гижны да лыддьысьны... Мун, лязтӧ вай...
АННА. Сэтшӧм тэ авъя да рам ныв вӧлін эськӧ да воштін тай ассьыд бур мывкыдтӧ, о, господьӧй!.. (Чеччӧ, петӧ занавес сайӧ.)
4-ӧд петкӧдчӧм.
МАРЬЯ. Збыльысь, челядясьӧм бӧрын карӧ муна да велӧдча... Тані ӧд пыр лоан йӧз син водзын да, дугдывтӧг жӧ кутасны йирны-а... Ӧні тай, майбыр, и миянлы туйыс восьса, медтыкӧ окотаыд вӧлі-а. Со тай нӧ, карсянь волысь нывбабаыд велӧдчӧма да, кутшӧм лӧсьыда кужӧ быдтор висьтавлыны.
5-ӧд петкӧдчӧм.
Пырӧ Анна, ӧтпырйӧ ӧдзӧсӧд пырӧ Ваньӧ. Анна вайӧ ляз тасьті.
АННА (Ваньӧлы). Кӧні бара тэ лытайтан та дырасӧ-а? Он ӧмӧй тӧд пажын кадсӧ?... Пӧрччысь да пуксьы, сёй! Муртса эгӧ удзӧдӧ тэнӧ. (Пуксьӧ. Кыкнаныс лязсӧ няньӧн чунялӧны.)
ВАНЬӦ. Степан дядьӧясын шегъясим. (Зептас гизьӧдӧ шегъяссӧ, сэсся кыскалӧ пызан вылӧ) Со, мыйта ме вои! (Лыддьӧ.) Ӧтик гоз, кык гоз, куим гоз, нёль гоз...
МАРЬЯ. Мун сэтысь! Эн пуктав пызан вылас шегъястӧ!
ВАНЬӦ. Квайт гоз, сизим гоз... Час, лыддя да, вӧлисти... кӧкъямыс гоз, ӧкмыс гоз...
МАРЬЯ. Мун, мися! Эн тэч татчӧ нянь дінас пеж шегъястӧ! Со нӧ тэныд! (Ӧвтыштӧ кинас пызан вылысь, шегъяс гылалӧны джоджӧ.)
ВАНЬӦ. (Скӧрысь) Но-о, тэ!.. (Чукӧртӧ шегъяссӧ зептас.) Тэ, вот, Марья, ачыд колӧкӧ и пеж!.. Ме талун мыйкӧ тэ йылысь кывлі. (Пӧрччысьӧ да пуксьӧ сёйны.)
МАРЬЯ. Немтор ме йылысь кывлыныс.
ВАНЬӦ. Тэ йылысь? Ок, ещӧ мый кывлі-а!..
АННА. Сёй, сёй, эн больгы сэні!
ВАНЬӦ. Висьтала ог, мамӧ?
АННА. Висьтав но, вай.
ВАНЬӦ. Со мый. Шегъясигӧн Гриша Вань Кирӧ ворссис да ме вылӧ лӧгасис, сэсся кутіс шуасьны: тэнад пӧ чойыд Марьяыд чурка кага вайлӧма да джагӧдӧма сійӧс...
МАРЬЯ. } Ме, ассьым кагаӧс?!.. (Тшӧтш, повзьӧмӧн.)
АННА. } Сё благӧслӧви кристос?!
МАРЬЯ. Ӧні быдсяма лӧж славатӧ нин лэптасны...
АННА. О, господьӧй!.. (Нормӧ.) Сё ӧд, любаӧй, мый выйӧдз тэ миянӧс воштін! (Синъяссӧ чышкалӧ.)
ВАНЬӦ. Сэсся ставныс кутісны менӧ серавны да нимтыны, шуӧны: ӧні пӧ тэ, Ваньӧ, чуркаыдлы чожӧн лыддьысян... (Муртса оз бӧрд.) Тэ пӧ... ме быттьӧ... ӧні абу нин... ме пӧ абу нин... Ӧсип Матьвей Ваньӧ, тэ пӧ... ме быттьӧ... ӧні дядь нин... чурка чож пӧ ме ӧні. (Гусьӧник бӧрдӧ: нырнас шлюпиктӧ, тшӧкъялӧ, синъяссӧ соснас чышкалӧ.)
АННА. Чӧв, Ванюк, эн бӧрд. Эн верит йӧз больгӧм вылад...
ВАНЬӦ (Марьялы). Часлы, коркӧ, ыджыда быдма да, бура ме тэнӧ и жбонита!..
МАРЬЯ. Мыйысь нӧ сідзи?
ВАНЬӦ. Мыйысь?.. Мыйла тэ чуркаӧс вайӧмыд... Збыль, Марья, виин сійӧс?
МАРЬЯ. Ланьт, йӧюкӧй! Кыдзи нӧ кагаӧс вины позьӧ?.. Тэ эн кывзы йӧзыдлысь ызгӧмсӧ-сӧрӧмсӧ...
Чеччалӧны пызан сайысь, пызан идралӧны.
ВАНЬӦ. Сэсся ӧні некытчӧ ворсны оз позь петавны — пыр кутасны серавны. (Паччӧрысь босьтӧ шег доз сюмӧд кӧрӧбка — да зепсьыс сэтчӧ ректӧ шегъяссӧ.) Ӧтик, кык, куим... (Водзӧ сідз лыддьӧ.)
АННА (Марьялы). Мун видзӧдлы мӧд керка пачтӧ, дзикӧдз нин, кӧнкӧ, ваймис; да лӧдсышт ичӧтика, мед шоналас нин пачыс. Сэсся мӧсъястӧ сёӧдышт.
МАРЬЯ. Быдлаӧ ме? Ачыд нӧ мый он мӧсъястӧ кӧть сёӧд. (Петӧ.)
6-ӧд петкӧдчӧм.
АННА (аслыс). Батьыд кӧ эськӧ ловъя вӧлі эн лысьт тадзи вочатӧ шуасьныд да... Мамыд водзын тай тадзи ыджыдалан-а... Да ӧд водзджык эг казяв, эськӧ позис на кыдзкӧ изведитны сьӧктӧмсӧ да... Ӧксинь бабӧ эськӧ и вӧтліс грек ёкмыльсӧ сылысь...
ВАНЬӦ. Мам, талун нӧ скод али мый?
АННА. Ог тӧд, дитяӧй — эз тай миянӧс некод юӧрт-а.
ВАНЬӦ. Мыйкӧ тай Габӧ стӧрӧж воліс да зэв ӧдйӧ корис Степан дядьӧӧс исполкомӧ-а, шуис: унаӧс нин пӧ талун кори да нӧшта на пӧ колӧ корны...
АННА. Ог тӧд мыйла... Ӧні ӧд быдтор выль ногӧн вӧчӧны да...
7-ӧд петкӧдчӧм.
МАРЬЯ (ӧдйӧ пырӧ). Зэв унаӧн, мыйкӧ, миянӧ локтӧны, мамӧ?!..
АННА. Мый нӧ сідз повзин?.. Бара, кӧнкӧ, овмӧс йылысь юасьны да гижавны ветлӧны...
МАРЬЯ. Кирӧ Петыр Педӧр — секлетарыд, сылӧн батьыс, Терень Микайлӧ Ёгор — коммунист чукӧрын тай секлетаралӧ, сэсся мужикъяс да бабаяс — морт дас кымын, буракӧ... Муртса пыри мӧд керкаӧ, видзӧдлі ӧшиньӧд да — кутшӧмкӧ йӧз сулалӧ туй вылын... Терень Ёгор да Петыр Педӧр мыйкӧ зэв зіля висьталӧны мукӧдыслы да кинаныс шеналӧны миян керка вылӧ...
Кылӧ сёрни ывласянь.
ВАНЬӦ (жӧдзӧ). Ме нӧ кытчӧ дзебся, мамӧ?
АННА. Мыйла нӧ дзебсян? Оз ӧд некод вӧрзьӧд, пуксьы да пукав лючки лабичас. (Ваньӧ пуксьӧ. Посводзын кылӧны кок шыяс.)
МАРЬЯ (пасьтасьӧ). Ме Микол Варукӧ петала...
8-ӧд петкӧдчӧм.
Пырӧны: Педӧр, Ёгор, Петыр, 5 нывбаба, 3 понятӧй да милиционер, кодъяс вӧліны воддза вӧчӧмас. Кодсюрӧ ен джаджлань бергӧдчылӧмӧн пернапасасьӧны.
ПЕДӦР. Чолӧм, здорово тіянлы!
АННА. Локтӧй, бур йӧз, шойччӧй да шонтысьӧй, тӧранныд кӧ кытчӧкӧ керкаас...
СТЕПАН. Эгӧ на ёна мудзӧ, свестя...
АННА. Но, Степан зять тай тшӧтш вӧлӧма сэні... Шонтысь...
ЁГОР. Талун абу зэв кӧдзыд ывлаыс... (Марьялы.) Кытчӧкӧ нӧ Марья, мӧдӧдчан али мый?
МАРЬЯ. Могӧн колӧ Микол Варук дінӧ петавны.
ПЕДӦР. Лоӧ, любушка, этша нӧрӧвитыштлыны мунныд. Ми ӧд могӧн жӧ локтім...
АННА. Дерт, кӧнкӧ, бара нин видз-му да скӧт гижаланныд?
ПЕДӦР. Огӧ, мӧдтор йылысь локтім. (Видзӧдлӧ Ёгор вылӧ, ыджыдджык гӧлӧсӧн Марьялы шуӧ.) Нолтӧ, Марья Матвейӧвна, висьтав вай миянлы, кытчӧ тэ воштін ассьыд кагатӧ?
Марья да Анна ёна повзьӧны, чуймӧны.
МАРЬЯ. Кутшӧм кагаӧс? (Йӧз костын мургӧм.)
ЁГОР. Ассьыд кагатӧ, кодӧс тай войдӧрлун чужтӧмыд вӧлі!
АННА. Чӧв, мый нӧ тэ шуан? Эз на челядясь, коньӧрӧй, эз...
ПЕДӦР. Висьтав тэ... Со, мыйта свидетельыс да?.. Мыйла нӧ соссянныд? (Йӧз костын гӧлӧсъяс: «Дерт, соссьӧны».)
АННА. Ен мед видзас сэтшӧм грекысь!..
МАРЬЯ. Коді нӧ сэтшӧм лӧжсӧ висьталіс?.. «Кага вины»... Эг на вайлы да!.. Кӧть и вайи да, ассьым кагаӧс ӧд ог жӧ ви?..
ПЕДӦР. Но, нинӧмла тані весьшӧрӧ миянлы пӧрасӧ коллявны!..
ЁГОР. Вернӧ!.. (Марьялы.) Вай висьтав, Марья, бурӧн: кытчӧ воштін кага шойтӧ? Бурӧн кӧ висьталан — кокньыдджыка мыждасны...
МАРЬЯ. Мый нӧ ті, збыльысь, лоинныд? Некутшӧм кага, мися, менам эз на чужлы да...
АННА. Эз, эз, бур йӧз!.. О, господьӧй, мыйла нӧ ті сідзи шуанныд?
ПЕДӦР (Марьялы, скӧрысьджык). Сідзкӧ, Марья, он кӧсйы бурӧн индыны чурка шойтӧ?
МАРЬЯ. Бурӧн кӧть лёкӧн, абутӧмсӧ ӧд он инды. Онӧ ӧмӧй веритӧй абусӧ?..
ЁГОР. Огӧ тіянлысь веритӧ. Сійӧн татчӧ ми и локтім — асьтӧ кӧсъям видлавны
МАРЬЯ. Менӧ видлавны?!.. Ті нӧ мыйкӧ гӧгӧрвоанныд али онӧ асьныд?.. Кыдзи нӧ ті верманныд видлавны? Ті ӧд абу бабкаяс либӧ докторъяс...
НАТАЛЬ. Тэ, люба, том на да, ачыд нинӧм он тӧд, а ме дас кыкӧс нин вайлі, тӧда мыйкӧ мында кага йывсьыд рушкуын али абу, сэтчӧ оз ков некутшӧм бабка ни, доктор...
ПЕДӦР Заводитам инӧ, оз жӧ тай кӧсйы ачыс висьтавны-а...
МАРЬЯ. Нинӧм онӧ веритӧй да?.. А мырдӧн видлавны ог сетчы! (Чепӧсйӧ ӧдзӧслань, кӧсйӧ пышйыны; сійӧс кутӧны нёльӧн кымын: Петыр, Ёгор, Педӧр, Наталь.)
ПЕДӦР. Пышйыны кӧсъян? Он, любаӧй, пышйы ӧні некытчӧ! Пӧрччысь вай!
МАРЬЯ. Ог, мися!.. Ойя, мый нӧ ті вӧчны кӧсъяд?.. Мамӧ!..
АННА (бӧрдӧм сорӧн, кӧсйӧ мездыны Марьяӧс). Лэдзӧй, бур йӧз, коньӧрӧс, лэдзӧй!.. Дойдаланныд ӧд сійӧс?.. (Бӧрдӧ, ноксьӧ.)
ВАНЬӦ (лимзалӧмӧн). Мыйла нӧ менсьым чойсӧ нӧйтанныд?..
ПЕДӦР (Милиционерлы). Милиционер! вай мамсӧ вӧтлы посводзас — мед оз мешайтчы тані! (милиционер вӧтлӧ Аннаӧс. Марья бӧрдӧ. Ваньӧ лӧвтӧ.)
ЁГОР (индӧ Ваньӧ вылӧ). Дай воксӧ тшӧтш вӧтлы!
Милиционер кыскӧ посводзӧ Ваньӧӧс. Сы кості ӧдзӧсыс воссьылӧ, Анна кӧсйӧ пырны да сійӧс бӧр тойыштӧны ортсӧ. Посводзын вочасӧн пыр кылӧ Анналӧн гӧлӧс: «Лэдзӧй менӧ, энӧ вӧрӧдӧй менсьым нылӧс», сэсся сылӧн да Ваньӧлӧн бӧрдӧм шы).
9-ӧд петкӧдчӧм.
ПЕДӦР (йӧзлы). Вайӧ, кодкӧ пӧрччӧдӧй! Нинӧм та вылӧ видзӧдны!.. (Милиционерлы.) Тэ, милиционер, кут ӧдзӧссӧ, эн лэдз мамсӧ!..
СТЕПАН (матыстчӧ Марья дінӧ, заводитӧ пӧрччӧдны). Часлы жӧ ме, дядь морт, пӧрччӧда... Эн, Марьюшка, сэтшӧма прӧтивляйтчы; кывзы дядьыдлысь, вай пӧрччысь бурӧн...
МАРЬЯ (пессьӧ). Мый нӧ ті лоинныд?.. Вешйӧй ме дінысь, энӧ вӧрӧдӧй менӧ!..
ЁГОР. Но! Вайӧ пӧрччӧдамӧй ӧдйӧнджык, нинӧмла кевмысьныс (тшӧтш пӧрччӧдӧ.)
МАРЬЯ. Тадзи ӧмӧй, Ёгор, коммунистъясыд уджавлӧны?
ЁГОР. Ми асьным тӧдам партийнӧй дисциплинатӧ, тэныд миянӧс оз ков велӧдны!..
ПЕДӦР (лӧсьӧдӧ пызан вылӧ гумага). Ме сэсся заводита акт гижны та йылысь. (Пуксьӧ, гижӧ.)
МАРЬЯ. Тэ тай, Ёгор, вунӧдӧмыд нин мый неважӧн висьтавліс карсянь волысь нывбабаыд собранньӧ вылад... Тэ ӧд сэні жӧ вӧлін...
ЁГОР. Сідз нӧ висьтавліс — чуркаясӧс пӧ колӧ виавны, а?.. Эн, мися, тэ велӧд миянӧс!.. (Мукӧдыслы.) Соссӧ кыскӧй, соссӧ!..
МАРЬЯ. Ті асьныд онӧ гӧгӧрвоӧ, мый вӧчанныд... Ойя жӧ нин!.. (Пӧрччӧны пасьсӧ.)
ПЕДӦР. Но, пӧрччӧдінныд?.. Ӧні сэсся Ӧнисся да Наталь тьӧтка мед видлаласны сійӧс гӧгӧр...
НАТАЛЬ. Лок, Марьюшка, пыралам эстчӧ занавес саяс... Огӧ ӧд нинӧм вӧчӧй. (Босьтӧ сойбордӧдыс.)
МАРЬЯ. Ог, мися, лэдз видлавны, ог мун ни! (Пыксьӧ.) Ме тай нӧ думайта вӧлі: сӧвет власьтыд, мися, дорйӧ нывбабаястӧ, оз лэдз найӧс ӧбӧдитны, а вӧлӧма кӧ — мӧдарӧ... Збыль ӧмӧй сідзи?
ПЕДӦР. Сӧвет власьт тэ кодьястӧ оз зэв дорйы!.. Ме, кыдзи сӧвет власьтлӧн служак, быдтор вӧча по законам РСФСР! (Нывбабаяслы.) Но, нинӧм сыкӧд сэсся жельксьыны, вайӧ ӧдйӧджык видлалӧй! Ӧнисся, Наталь тьӧт, нуӧдӧй!
ӦНИССЯ (босьтӧ Марьяӧс мӧд сойӧдыс). Эн, Марья, пыксьы тадзи, мыйла нӧ петитчан? Кагаыд кӧ кынӧмад, мыйысь сэсся повныс тэныд?.. Ми ӧд небыдика малалыштам кынӧмтӧ дай бӧр лэдзам... Лок ветлам, Марья, лок! (Кыскӧны, мукӧд отсалӧм сорӧн, занавес сайӧ.)
МАРЬЯ (пессьӧ ). Ог мун!..
ПЕДӦР. Мунан! (Петӧ пызан сайысь да тшӧтш нуӧдӧ. Марья, Ӧнисся да Наталь саялӧны занавес сайӧ. Педӧр бӧр пуксьӧ пызан сайӧ.) Аттӧ, кутшӧм асныра ныв! (Гижӧ.)
10-ӧд петкӧдчӧм.
Кодсюрӧ нывбабаяс костысь видзӧдӧны занавес сайӧ. Сэні кылӧ ноксьӧм-вермасьӧм.
ӦНИССЯ (занавес сайын). Мый нӧ тэ, Марья, йӧйталан?.. Во-од джоджас!..
МАРЬЯ (сэсянь жӧ). Дугдӧй!.. Дойданныд!.. Ой-ой да!.. Ог жӧ ӧд сетчы-а!..
ПЕКЛА. Кытысь и выныс Марьяыдлӧн сы мындаыс?.. Ӧд ӧд, кутшӧма водзсасьӧ!
НАТАЛЬ (сайын). Эн грекӧ вӧйт, прӧсти господи!.. Но-но, мыйла нӧ ӧвтчан кияснад?.. Нинӧм, буракӧ, оз ло бурӧн... Часлы жӧ... (Мыччысьӧ занавес сайсянь.) Ми кыкӧн нинӧм огӧ вермӧ сыкӧд вӧчны, некыдз оз сетсьы... Вай, Педӧр, кык-куим мужикӧс татчӧ!
Марья кыскӧ Ӧниссяӧс, петӧны занавес сайысь; пӧсялӧмаӧсь, кашкӧны.
11-ӧд петкӧдчӧм.
МАРЬЯ. Кӧть виӧй менӧ, ог сетчы видлавны!..
ПЕДӦР. Нолтӧ, мужикъяс, босьтӧй да кутӧй сійӧс киясӧдыс да кокъясӧдыс, мед колӧкӧ оз пессьы сідзи!..
Кутӧны: Степан, Петыр, Васька да Пекла. Бӧр пыртӧны занавес сайӧ.
12-ӧд петкӧдчӧм.
СТЕПАН (занавес сайын). Мыйла нӧ тэ, Марья, прӧтивляйтчан сэтшӧма? Водыштлы вай... Но, но... Киӧдыс ті кутӧй!.. вот, вот... Но-о, эн сэтшӧма нӧйтчы!.. (Кылӧ джоджӧ уськӧдӧны.) Ӧні сэсся вай видлалӧй, ӧні оз кут пессьыны!..
МАРЬЯ. (Лӧвтӧм сорӧн) Ой, дойданныд!.. Кыдзи нӧ тіянлы абу яндзим тадзи смекайтчыныс ме вылын?.. Ойя!.. Мыйла нӧ дӧрӧмӧс косялінныд!.. Ой!.. (Горзӧ. Посводзсянь Анналӧн гӧлӧс.) «Ойя, мый нӧ вӧчанныд!» (Кинас грымӧдӧ ӧдзӧсӧ.) «Лэдзӧй менӧ, сё криста ради!» (Марья ымзалӧ да корсюрӧ ойкнитыштлӧ.)
НАТАЛЬ (сайсянь). Чурки-буди, кутшӧм на топыд вир-яя!.. Первойысь на челядясин да, дерт, эз усь вир-яйыд... Менам тай, небось, дас кык бӧрад быри, лыыс да кучикыс сӧмын коли...
ПЕТЫР (сэсянь жӧ). Ке-ке-ке!.. Этатшӧм мича ныв вылад ӧд, дерт, быдӧнлӧн вежыд петас!..
ЁГОР (сулалӧ занавес водзын, кывзысьӧ, корсюрӧ занавессӧ восьтыштлӧ да видзӧдлӧ саяс). Но, мый сэні? Тӧдчӧ оз?.. (Педӧр гижыштас да кывзыштас жӧ пыр сёрнисӧ.)
ӦНИССЯ (сайын). Нинӧм тай меным ки улӧ оз сюр-а... Тэныд нӧ, Наталь тьӧт?.. (Марья ойгӧ.)
НАТАЛЬ. Оз тӧдчы, Ӧнисся, нинӧм и меным... Кынӧмыс тай эськӧ ыджыдджык жӧ да, сійӧ овлывлӧ...
ПЕКЛА (сэсянь жӧ). Овлӧ... Сэсся ӧд, кӧнкӧ, пажнайтіс на неважӧн дай...
ӦНИССЯ. А ме талун ӧбедтӧм на, люба... Нолтӧ, Наталь, нёньяссӧ сэсся видлам, кынӧмыс тӧдчӧ нин — куш, некутшӧм кага сэні абу... (Марья ойгӧ.)
НАТАЛЬ. Ӧд, енсыкӧд, нёньясыс кутшӧмӧсь — быттьӧ кык здобнӧй булки!.. Менам тай, дас кык бӧрад, косьмисны небось, куш гадь моз летъялӧны сӧмын... (Друг.) Со тай, со!.. Аддзанныд, кыдзи йӧлыс рудзтӧ?.. То-то, видзӧдӧй, видзӧдӧй!.. (Марья ойгӧ.)
СТАВНЫС. Пӧдлиннӧ тай?.. Петӧ ӧд и эм!..
ӦНИССЯ. Некодӧс тай нёньӧдныыс-а... Весьшӧрӧ лоӧ косьтыны йӧвсӧ... Кыдзкӧ тай кыптӧма жӧ талӧн киыс аслас дитя вылӧ!..
НАТАЛЬ. Но, сэсся, дитя, чеччы!.. Со ӧд и ставыс, а тэ вӧлі мыйкӧ полан да он сетсьы... Чеччы, чеччы, Марьюш!..
МАРЬЯ (ойгӧ ). Ой, ой... Гӧгӧр ӧд доймӧ!.. Ой-ой!.. Мый, бара, ті вӧчинныд-а?..
ӦНИССЯ. Нинӧм он ло, мӧдӧс вайигкежлӧ справитчан на... (Йӧз серӧктӧны)
ПЕКЛА (серӧктӧ). Дерт жӧ, стрӧкыс ӧд бура кузь...
Заводиталӧны занавес сайысь петавны. Марья ойгӧ, кынӧмас кияснас кутчысьӧма, лёзь юра. Марьяӧс кутӧны Наталь да Ӧнисся.
13-ӧд петкӧдчӧм.
ЁГОР. Эштіс?
НАТАЛЬ. Эштіс, слабог... (Марьялы.) Вай, пуксьы татчӧ лабичас (Марья пуксьӧ, ымзӧ, чукрасьӧ.)
ПЕДӦР. Но, мый нӧ аддзинныд, Наталь тьӧтка? (Наталь Ӧниссякӧд матыстчӧны.)
НАТАЛЬ. Мый нӧ, зӧлӧтӧйӧй, аддзан? Прӧстӧй ноксьӧм лои — некутшӧм кага нин абу кынӧмас...
МАРЬЯ (сьӧкыда). Ойя жӧ нин!.. Мыйла нӧ сідзи шуанныд, эг на, мися, челядясь да?.. Ой, гӧгӧр ӧд дойдалінныд менӧ!.. (Анна ӧдзӧсӧ зыркӧдӧ: «Восьтӧй, лэдзӧй менӧ!»)
ПЕДӦР (милиционерлы). Но, вай, милиционер, лэдз сэсся ӧні мамсӧ. (Гижӧ.)
ӦНИССЯ (Педӧрлы). Бура эськӧ шамралім рушкусӧ да, некутшӧм кага оз тӧдчы... А нёньяссьыс йӧлыс ёна рудзтӧ...
14-ӧд петкӧдчӧм.
Пырӧны Анна да Ваньӧ. Ваньӧ зэв лёкысь видзӧдлӧ йӧз вылӧ да кайӧ паччӧрӧ.
АННА (сьӧлӧмысь). Ті — абу мортъяс! Дасӧн уськӧдчинныд, кырнышъяс моз, коньӧр вылӧ!.. Зверъяс ті!.. Виччысьлӧй, ен грек ӧд тіянӧс талялас жӧ таысь!.. О, господьӧй мый вӧчисны нылыдкӧд! (Марья дінӧ локтӧ.)
ЁГОР (Анналы). Мый нӧ тэ грӧзитчан? Кутшӧм ен грек миянлы тунъялан? (Педӧрлы.) Тэ, Педӧр Петрӧвич, тшӧтш мамыс вылӧ ещӧ гиж протокол...
АННА. Гижӧй, мый окота — сідзи и вӧчӧй, ті ӧд тані ыджыдъясыс — верманныд быдтор!.. Толькӧ, повнитлӧй — менам дӧва синваӧй имитас ен водзын, суас тіянӧс ы-ыджыд причча тайӧ лёксьыныд!.. (Марьялы.) Кӧнкӧ, дитяӧй, ёна жӧ и дойдалісны тэнӧ? (Пуксьӧ орччӧн.)
МАРЬЯ. Ок, мамӧ, гӧгӧр ӧд зэв ёна висьӧ!.. Кынӧмӧс ёна чабралісны да, мед, эськӧ, эз жӧ дойдны...
ЁГОР. Ичӧтикатӧ кӧть и доймыштіс — нинӧм, бурдас. Мед колӧкӧ эз прӧтивляйтчы... Колӧ вӧлі водзвыв тӧдны, кагасӧ виигас.
АННА (чеччӧ, бергӧдчӧ ен джаджлань да пернапасасьӧ). Со, енмыс мед ёрас менӧ, збыль кӧ ме сосся! Марья эз на кагасӧ вай...
ЁГОР. Мыйкӧ тон висьтавныд колӧ... Но, сэні аддзасны сэсся!
АННА. Кӧні?
ЁГОР. Суд вылын. Кыкнаннытӧ ӧні тіянӧс судӧ сетам.
АННА. Судӧ? Мыйысь, кутшӧм мыжысь?
ПЕДӦР. Незаконнорожденнӧй ребёнокӧс виӧмысь да шойсӧ дзебӧмысь... Судитасны чорыда по законам РСФСР!.. (Босьтӧ киас гумага.) Нолтӧ, кывзӧй ставныд! (Лыддьӧ.) «Акт. 1923. года декабря 16 дня. Мы нижеподписавшиеся член-секретарь Кунвадорского сельсовета Федор Петрович Мырныров и секретарь Кунвадорской ячейки Ре-Ке-Пе Егор Микайлович Щалаков и понятые присутствовавших лиц села Кунвадора, Автономной Коми-зырянской области, составили настоящий акт том, что одна дочь села Кунвадора Марья Матвеевна Намырова оказывалась беременная незаконнорожденным ребенком, поэтому из этой резолюции осмотрели девку Марью Намырову и оказалась собою животе нету незаконнорожденного ребенка, а ясно доказывает грудь, что из титьки идет бабское молоко и предлагаем подлежащим советским органам поступать с таковой девкой Марьей Намыровой по всем строгостям закона уголовного кодекса Ре-Се-Фе-Се-Ер по сему акту, почему и составили настоящий акт. Заявители беременности: Анисья Кузьмовна Туп'юрова, Екатерина Спиридоновна Туп'юрова, Наталья Закаровна Кынкокова, Пекла Кирилловна Кикарова да Степанида Ивановна Кузьнырова. Она показывала раньше титьки и поэтому вышеуказанные заявители сделали таковые дела, то есть осмотр живота и груди и постановили немедленно арестовать обвиняемую Марью Намырову и посадить арестное помещение сельсовета»... (Йӧзлы.) Гӧгӧрвоинныд?
КОДСЮРӦ. Гӧгӧрвоим... Ладнӧ!..
ПЕДӦР (кырымалӧ гумагасӧ. Ёгорлы). Вай, Ёгор Микайлӧвич, кырымась. (Ёгор гижсьӧ.) Понятӧйяс, локтӧй, гижсялӧй, коді грамотнӧй. Неграмотнӧйяс пыдди батьӧ кырымасяс. (Степан да Васька кырымасьӧны. Сы кості Педӧр шуӧ милиционерлы.) Милиционер, вай пасьтӧдӧй Марьясӧ да нуӧй сельсӧветӧ! (Милиционер кодсюрӧкӧд пасьтӧдӧны Марьяӧс.)
ИВАН. Ме неграмотнӧй. (Сы пыдди гижсьӧ Петыр.)
АННА. Ещӧ на тіянлы окота мучитны менсьым нылӧс?.. Ок, понъяс ті — сэсся нинӧм!.. Ме тшӧтш сыкӧд муна... (Пасьтасьӧ.) Ойя да, ойя!.. Он ӧмӧй аддзӧ, мый выйӧдз ті сійӧс, коньӧрӧс, воштӧмныд?..
ПЕДӦР (чукӧртӧ гумагаяссӧ). Нинӧм оз ло!.. Мед колӧкӧ ачыс сідзи эз уджав!.. Но, ӧдйӧджык вӧрӧй!.. Лок, Ёгор Микайлӧвич, мунам ми водзвылас.
Кӧсйӧны петны.
МАРЬЯ (небыдика). Гортад, мамӧ, кольччы... Ӧтнам нин ме муна...
АННА (чышъянасьӧ). Ог жӧ эновт тэнӧ?.. Он ӧд тэ, дитяӧй, вермы и мунныд, сэтшӧмӧдз певъялӧмаӧсь тэнӧ...
ВАНЬӦ (лэччӧ паччӧрысь, пасьтасьӧ ӧдйӧ). Ме, мамӧ, тшӧтш Марьяӧс колльӧдышта... Кытчӧ нӧ сійӧс нуӧны?..
ПЕДӦР (ӧдзӧс восьтӧ). Но, локтӧй мунамӧй!
Петӧны сы бӧрся Ёгор, Петыр; Марьяӧс кутӧ ӧтар сойӧдыс милиционер, мӧдарӧдыс мамыс; на бӧрся петӧны мукӧдъясыс.
Занавес.
КОЙМӦД ВӦЧӦМ.
Вӧчсьӧ Кунвадорса сельсӧветын жӧ, кӧні вӧлі медводдза вӧчӧмыс. Шӧрас, кык ӧшинь костас, пызан. Шуйгавылас ичӧтик пызан, сэсся скамьяяс радӧн-радӧн сулалӧны. Веськыдвылас — мӧд ичӧтик пызан, таланьынджык сулалӧ ичӧтик скамья (позьӧ табуреткаяс). Гожся лун.
1-я петкӧдчӧм.
Пызан сайын пукалӧны: шӧрас — судын юралысь, ӧтар-мӧдар бокас — кык заседатель, пызан помас — судын секретар. Шуйгавылас, ичӧтик пызан сайын улӧс вылын пукалӧ Панасова (мыждысь). Веськыдвылас, мӧд ичӧтик пызан саяс некод абу, скамья вылын пукалӧны Мырныров да Тшалаков, найӧ мыш сайын сулалӧ милиционер. Шуйгавылын скамьяясын пукалӧны да джоджас сулалӧны бура уна йӧз, мукӧдыс вочасӧн, суд дырйиыс, пырӧны и петӧны.
ЮРАЛЫСЬ (ӧтар-мӧдар бокас заседательяслань бергӧдчылӧ, сэсся тільгунӧн звӧнитӧ). Судлысь заседанньӧ лыддя воссьӧмӧн. Коми обласьтувса судсянь ветлӧдлан сессия ӧні босьтсьӧ видлавны уголовнӧй делӧ Кунвадорса кык гражданинӧс — Педӧр Петрӧвич Мырныровӧс да Ёгор Микайлӧвич Тшалаковӧс — Уголовнӧй Кодекс 106-ӧд статтяса 2-ӧд юкӧн серти мыждӧм йылысь, — либӧ, мӧд ногӧн кӧ шуны — мыйта налы вӧлі сетӧма власьтсӧ, сыысь вылӧджык пуксьӧмысь да мырдӧналӧмӧн незаконнӧйторъяс вӧчӧмысь. (Секретарлы.) Кодъясӧс вӧлі суд вылӧ корӧма, ставныс эмӧсь?
СЕКРЕТАР. Ставныс.
ЮРАЛЫСЬ (Панасовалы). Тэнад, мыждысь ёрт, мыйкӧ эм абу юавны судлысь?
ПАНАСОВА (чеччылӧ). Абу, позьӧ нуӧдны водзӧ. (Бӧр пуксьӧ.)
ЮРАЛЫСЬ. Сідз кӧ, водзӧ... Суд кутас мунны кык народнӧй заседатель дырйи; мыждысь — Панасова; дорйысьӧс мыжаланъясыс эз индыны ни, судлы эз тшӧктыны пуктыны ни, — насянь эм гижӧдтор, кӧні шуӧмаӧсь: ми пӧ бокысь асьнымӧс дорйысьӧс огӧ корӧ, суд вылас пӧ лоас дорйысьыс. (Панасовалы.) Мый кӧ тэ, мыждысь ёрт, воча шуан он та вылӧ? Ӧнӧдз на найӧ эз индыны дорйысьсӧ.
ПАНАСОВА (сувтыштлӧ). Нинӧм ог шу. (Пуксьӧ.)
ЮРАЛЫСЬ (секретарлы). Кор, вай, свидетельяссӧ татчӧ.
СЕКРЕТАР (сувтӧ, йӧзлань). Свидетельяс, локтӧй татчӧ!
Йӧз пӧвстысь петӧны, матыстчӧны пызанлань: Марья, Ваньӧ, Анна, Петыр, Ӧнисся, Катя, Степа, Наталь, Пекла, Ӧксинь, Иван, Степан, Васька.
ЮРАЛЫСЬ (свидетельяслы). Тіянсянь, свидетельяс, суд виччысьӧ со мый: висьталӧй веськыда, асланыд сӧвесьтсянь, нинӧм энӧ соссьӧй, мый тӧданныд, нинӧм энӧ ассяньныд содталӧй, мый онӧ тӧдӧ. Лӧжӧс висьталӧмысь асьныд чорыда мыжманныд. (Секретарлы.) Вай, секретар ёрт, гижсьӧд найӧс.
СЕКРЕТАР (свидетельяслы мыччӧ кабала — «подписка»). Вайӧ кырымасьӧй тайӧ гумага вылас.
Кырымасьӧны сӧмын витӧн: Марья, Петыр, Ваньӧ, Степан да Васька.
СЕКРЕТАР (мукӧдыслы). Ті нӧ мый онӧ кырымасьӧй?
КОДСЮРӦ. Ми неграмотнӧйӧсь.
СЕКРЕТАР (босьтӧ ручка да юасьӧ). Висьтавлӧй, кодъяс — ним-овнытӧ ассьыныд!
АННА. Анна Намыров, мам Марьяыдлӧн...
ПЕКЛА. Пекла Кикаров. (Секретар гижалӧ быдӧнӧс.)
ИВАН. Иван Папушников.
КАТЯ. Катерина Тупъюрова.
НАТАЛЬ. Наталля Кынкоков, Закаровна.
ӦНИССЯ. Ӧнисся Тупъюров.
СЕКРЕТАР. Ещӧ коді?
ӦКСИНЬ. Гашкӧ ме нин сэсся да?... Уп!.. Вай нӧ гиж менӧ: Ӧксинь...
СЕКРЕТАР. Овыд кыдзи?
ӦКСИНЬ Кыдзи овлі?.. Сизимдас кӧкъямыс вонад ме быдсямасӧ аддзылі...
СЕКРЕТАР (гораджыка). Овтӧ ме тэнсьыд юала, памилльӧтӧ...
ӦКСИНЬ. Овӧс?.. Ӧні, дитя, менам овӧй Нярганов... Войдӧр вӧвлі Тупъюров жӧ, да верӧс сайӧ мунӧм бӧрын вежсьыліс...
СЕКРЕТАР. Ещӧ кодкӧ эм абу?
СТЕПА. Менӧ эн на гиж... Степанида Кузьныров.
СЕКРЕТАР. Сэсся коді? (Некод оз шыась.)
КОДСЮРӦ. Ставнымӧс нин, буракӧ, пасйин.
ЮРАЛЫСЬ (Секретарлы). Нуӧд свидетельяссӧ торъя комлатаӧ.
СЕКРЕТАР (свидетельяслы). Локтӧй, свидетельяс, ме бӧрся. (Петӧны веськыдвыв ӧдзӧсӧд.)
2-ӧд петкӧдчӧм.
ӦТИ МОРТ ЙӦЗ КОСТЫСЬ. Ставнысӧ кытчӧкӧ нуисны. Тшӧтш, тыдалӧ, найӧс кутасны судитны...
ЮРАЛЫСЬ (звӧнитӧ, йӧзлы). Тіянӧс, граждана, татчӧ лэдзисны сӧмын судсӧ видзӧдны-кывзыны, шумитны оз позь. Видзӧй асьнытӧ лючки, шы ни тӧв олӧй.
3-ӧд петкӧдчӧм.
Пырӧ секретар, пуксьӧ аслас местаӧ.
ЮРАЛЫСЬ (босьтӧ пызан вылысь «делӧ», листыштӧ кымынкӧ лист, сэсся шуӧ). Тайӧ делӧыс, следствие вӧчӧм бӧрын да став гумагаяссӧ тӧдмалӧм серти, со кыдзи вӧлӧма. (Лыддьӧ.) «Декабр 16-ӧд лунӧ 1923-ӧд воын Кунвадорса сельсӧветын секретаралысь Педӧр Петрӧвич Мырныров да Кунвадорса коммунист ячейкаса секретар Ёгор Микайлӧвич Тшалаков кывлӧмаӧсь прӧстӧй йӧз сёрни (слукъяс): быттьӧ кӧ сэтчӧс гражданка Марья Матьвейӧвна Намырова войдӧр вӧвлі сьӧкыд, а бӧръя лунъяснас сэсся друг воши сьӧктӧмыс. Татшӧм прӧстӧй сёрни кузяыс Мырныров Тшалаковкӧд чукӧртӧмаӧсь ас сиктса йӧзӧс, дас кык мортӧс, да мунӧмаӧсь Марья Намыроваӧс видлавны, шобны сылысь кынӧмсӧ. Кор Марья Намырова да сылӧн мамыс — Анна Максимовна Намырова — кутасны налы висьтавны: эз на пӧ чуж кагаыс, да пондасны петитчыны видлалӧмысь, — найӧ оз веритны. Медым мамыс да ичӧтик вокыс Марья Намыровалӧн эз мешайтны видлалігас — вӧтласны посводзӧ да сувтӧдасны ӧдзӧссӧ кутны милиционерӧс. Кор Марья Намырова кутӧма пыксьыны да бурӧн абу сетсьӧма видлавныс — Мырныров да Тшалаков тшӧктӧмаӧсь мырдӧн видлавны, Тшалаковыс весиг ачыс отсалӧма Намыроваӧс пӧрччӧдны, а Мырныров тшӧтш тойлалӧма сійӧс занавес сайӧ, кӧні видлалӧмаӧсь. Намыроваӧс видлалігӧн, сійӧс киясӧдыс и кокъясӧдыс кутӧмаӧсь мужикъяс — Степан Тупъюров, Василий Кынъюров да Петыр Мырныров. Видлалӧмаӧсь кык нывбаба — Ӧнисся Тупъюрова Наталья Кынкоковакӧд, видлалӧмсӧ ещӧ видзӧдӧма Пекла Кикарова. Видлалӧмаӧсь со кыдзи: Марья Намыроваӧс джоджӧ водтӧдӧмаӧсь да чабралӧмаӧсь сылысь кынӧмсӧ да нёньяссӧ. Видлалӧм бӧрас Мырныров да Тшалаков акт вӧчӧмаӧсь: быттьӧ кӧ Марья Намырова вӧлі сьӧкыд, а ӧні кынӧмас кагаыс абу, дай йӧлыс нёньяссьыс петӧ. Сы бӧрын, сэки жӧ Намыроваӧс арестуйтасны, пуксьӧдасны сельсӧветса «чижовкаӧ». Марья Намырова сэкисянь жӧ кутас норасьны кынӧм топӧдӧм вылӧ да мӧд луннас, дыр кевмысьӧм мысти, Мырныров лэдзлас сійӧс милиционеркӧд ветлыны деревняса бабитчысь дінӧ — Ӧксиння Нярганова дінӧ; сійӧ видлалас Намыроваӧс да висьталас: кагаыс пӧ кынӧмас на. Кык сутки чӧж мучитчӧм мысти Марья Намыровалӧн пӧратӧг водз чужӧ пи, — став тушаыс и юрыс кагаыслӧн лӧз печатӧсь вӧлӧма. Кагаыс куим лун мысти сэсся и кулӧма. Тайӧ уджсьыс Мырныровӧс да Тшалаковӧс Коми обласьтувса суд шуис мыждыны 106 статтяса 2-ӧд юкӧн серти; судсӧ вӧчны Кунвадор сиктын». (Мыжаланъяслы.) Ті, мыжаланъяс, пӧлучитінныд мыждана гумагаяснытӧ?
ПЕДӦР }
ЁГОР } (тшӧтш). Пӧлучитім.
ЮРАЛЫСЬ (Педӧрлысь юалӧ). Мырныров, тэ асьтӧ лыддян он мыжаӧн тайӧ делӧ пондаыс?
ПЕДӦР. Ме, суддя тӧварышъяс, таысь ог лыддьы ачымӧс мыжаӧн. Кор став Кунвадорса йӧзыс кутісны шуны: Намырова Марья пӧ челядясьӧма дай виӧма ассьыс кагасӧ, а власьтъяс пӧ сы вылӧ оз и видзӧдлыны, ме — кыдзи сэки вӧлі Кунвадорын ӧтнам сӧвет власьтлӧн представительыс — этакӧд (индӧ Ёгор вылӧ), ячейкаса секретаркӧд — Тшалаков ёрткӧд — и решитім Марьятӧ видлавны... Нинӧм торъя мырдӧналӧм эськӧ эз и вӧв, бурӧн кӧ сійӧ сетсис сэки видлавныс... Ог повнит прамӧя, ачым ме тшӧтш тойлалі али эг Марьясӧ занавес саяс сэки. Гашкӧ и лои да: ме ӧд чорыда пыр вӧлі сулала Сӧвет власьт дор, мед эз вӧв некутшӧм омӧльтор, мед эськӧ ставыс муніс по законам РСФСР. А миян Кунвадорсаясыд зэв на пемыдӧсь, унатор на оз гӧгӧрвоны... Ме чайта, став ӧшыбкаыс сэки со мыйла лои: вывті ёна Марьяыс видлалігас пессис да сэки видлалысьясыдлы эз сюр ки уланыс кагаыс, сійӧн жӧ вермис и кагаыс доймавны да лӧз инъясӧн чужны... Сэсся нинӧм, буракӧ, висьтавныс.
ЮРАЛЫСЬ. А мыйла ті арестуйтінныд сэки Намыровасӧ?
ПЕДӦР. Кыдзи нӧ вӧлі позьӧ вӧля вылӧ кольны сы ыджда мыж вӧчысьӧс?.. Ми ӧд збыль чайтлім — мися Марьяыд кагасӧ виӧма.
ЮРАЛЫСЬ (кыкнан заседательыслы). Тіян эм абу мыйкӧ юавны?
ЗАСЕДАТЕЛЬЯС. Абу.
ЮРАЛЫСЬ (мыждысьлы). Мыждысь ёрт, тэ мыйкӧ юалан он?
ПАНАСОВА. Юала... (Педӧрлы.) Висьтав вай, Мырныров: тэ пӧшти куим во секретаралӧмыд сельсӧветын, тэнад ки пыр муніс уна распораженньӧяс да законъяс Сӧвет власьтлӧн; сэсся тэ велӧдчӧм морт — лыддьывлін газетъяс, нигаяс, — бура унатор нин тэныд колӧ тӧдны. Вай висьтав: мыйла тэ протоколад и, актад и, быдлаын гижан кагасӧ Намыровалысь «незаконнорожденнӧйӧн»? Али эн на кывлы — Сӧвет власьт ӧд бырӧдіс «чурка» нимтӧ?..
ПЕДӦР. «Чурка» сійӧ аслыс ним, «незаконнорожденнӧй» — бара жӧ аслыс, оз позь ӧтлаавны кыкнансӧ... «Чурка» — дзик коми ним, кор кутшӧмкӧ ныв кӧ пиалас да нылыс ачыс оз тӧд сылысь прамӧй батьсӧ, — шуны кӧ, кор унакӧд нылыд кыскасяс. (Суддяяс шваньялӧны.) А «незаконнорожденнӧй» — роч ним, кор кутшӧмкӧ ныв пиалас верӧс сайӧ мунтӧдз, исполкомын кӧ эз на гижсьыны, важӧн вӧлі венчайтчытӧдз кӧ кага ваяс... Дженьыдджыка кӧ висьтавны — кага вайӧм не по законам РСФСР.
ПАНАСОВА. Ещӧ ӧтитор. Кор Марья Намырова кагасӧ рӧдитіс, ті нӧ сы бӧрын мыйкӧ вӧчны тайӧ делӧ йывсьыс босьтчылінныд али энӧ?
ПЕДӦР. Нинӧм. Казялім нин сэки — ставнымлӧн ӧшыбитчысьӧма.
ПАНАСОВА (суддяяслы). Ме эськӧ кора лыддьыны мыжаланъяслысь заявленньӧнысӧ Куръявомса волісполком ним вылӧ. (Видзӧдлӧ аслас гумага вылӧ.) Делӧас 13-ӧд лист бок.
ЮРАЛЫСЬ (листалӧ да сэсся лыддьӧ). «Курьявомскому ВИК'у. Члена-секретаря Кунвадорского Сельсовета Мырнырова и Члена-секретаря Кунвадорской ячейки Ер-Ка-Пе (бе) Щалакова — заявление. Настоящим заявляем том, что дочь гражданки Анны Максимовны — Марья Матвеевна, которую актовали о небеременности ребенком, а теперь оказывается что родила 18 декабря вечером сына и доказывает, что голова была сухая, тело суховатое, только будто маслянистое, была во время родов бабка Ксения Нярганова, и ребенок был около четверти аршина и плачет сильно. Почему заявляет вам известность и прекращение переписки по сему делу, как нашего протокола и акта 16-го декабря, потому что ясно доказывает это, что вышло все ошибка. 1923 года 19-го декабря. Член-секретарь сельсовета Мырныров. Член ячейки РКП(б.) Щалаков». Тайӧ заявленньӧ вылас эм ещӧ кык содтӧд гижӧд. Ӧтикыс. (Лыддьӧ.) «Акт рождения зарегистрирован Курьявом. ВИК-е 21-го декабря 1923 года в рождении № 64. Отцом выявился Филипп Димитриевич Изтабов, гражданин села Кунвадорского, женившийся 16-го июля 1923 года на гражданке Парасковье Тупьуровой. Марья Намырова заявила, что она добровольно отказывается от взыскания с Филиппа Изтабова средств на воспитание своего ребенка. Член-секретарь ВИК‘-а Жырников». Мӧдыс Куръядорса волмилиционерлы. (Лыддьӧ.) «Дополнение к матерьялу, при чем сообщается, что голова после мытья ведь возможно сухо бывает и плачет после рождения этого тоже возможно. 23 декабря 1923 года № 927. Предволисполкома Шабалов. Член-секретарь Жырников»... Ставыс.
ПАНАСОВА. Меным сэсся нинӧм оз ков ӧні. (Пуксьӧ.)
ЮРАЛЫСЬ. (Педӧрлы). Пуксьы, Мырныров. (Ёгорлы.) Тэ, гражданин Тшалаков, мыжаӧн асьтӧ лыддян он тайӧ делӧ йывсьыс?
ЁГОР (сувтӧ). Ог лыддьы мыжаӧн. Тӧварыш Мырныров тай висьталіс нин ставсӧ. Меным сэтчӧ содтыны пӧшти нинӧм... Ме, кыдзи коммунист, мӧд ногӧн эг вермы сэки вӧчны. Кор став йӧзыс нин тӧдӧны вӧлі: Марья пӧ ассьыс кагасӧ кытчӧкӧ меститӧма, меным быть лои сюйсьыны сійӧ делӧас, раз миян «диктатура пролетариата» мунӧ... Ме некутшӧма эг мырдӧнав Марьяӧс видлалігӧн, видлалісны нывбабаясӧс... Мыждыны менӧ нинӧмысь — ме толькӧ честнӧя сулалі за Сӧветскӧй власьт да партийнӧй дисциплина вӧсна... Сэсся висьтавны нинӧм ог тӧд... Да, пӧдлиннӧ, ещӧ ме вӧлі чайта: мися, менӧ сійӧ уджсьыс уком ошкыштас на-а...
ЮРАЛЫСЬ (заседательяслысь юалӧ). Ті мыйкӧ юаланныд онӧ?
1-я ЗАСЕД. Ме ог-а.
2-ӧд ЗАСЕД. Ме юала... (Ёгорлы.) Висьтав. Тшалаков, важӧн-ӧ тэ партияас шленын?
ЁГОР. 1920-ӧд восянь, Краснӧй Армияын служитігӧн пыралі...
2-ӧд ЗАСЕД. Сэсся нинӧм.
ЮРАЛЫСЬ (Панасовалы). Тэ, мыждысь ёрт, юалан он мыйкӧ?
ПАНАСОВА. Юала. (Ёгорлы.) Висьтав, Тшалаков: тэ — коммунист, сэки нёльӧд во нин вӧлӧмыд шленын, ещӧ ячейкаса секретар, служитлӧмыд Краснӧй Армияын; тэ мукӧд дорысь вежӧраджык нин, — мыйла нӧ тэ сэтшӧм лёк уджас тшӧтш сюйсин, да ещӧ нырщикалӧмыд?
ЁГОР. Висьталі нин тай. Мися, коммунистъяс нуӧдӧны «диктатура пролетариата», либӧ веськӧдлӧны став политикасӧ...
ПАНАСОВА. Ещӧ ичӧтиктор. Тэ ӧд тӧдан нин: «чурка» ним ни, «незаконнорожденнӧй» ним ни ӧні абу. Мыйла нӧ тэ протоколад и актад кырымалӧмыд «незаконнорожденнӧй» кывсӧ?
ЁГОР. Вернӧ, сійӧ менам и вунлі... Ме эськӧ шулі сэки Педӧр Петрӧвичлы: мися, «незаконнорожденнӧй» кывсӧ колӧ вежны «внебрачнӧйӧн» да, кыдзкӧ тай сідзи и коли сэки... (Суддяяс шваньмунӧны бара.)
ПАНАСОВА. Сэсся ме нинӧм ог юав.
ЮРАЛЫСЬ (Ёгорлы). Он-ӧ куж тэ, Тшалаков, индыны, коді медвойдӧр лэдзӧма вӧлі сёрнисӧ Намырова челядясьӧм йывсьыс?
ЁГОР. Ог тӧд, тӧварыш суддя... Став Кунвадорыс нин вӧлі ызгӧ сы йылысь да, кодӧс кужан шуны медводдзанас...
ЮРАЛЫСЬ. Но, пуксьы сэсся... Ӧні сэсся суд кутас юасьны свидетельяслысь. (Ёгорлы да Педӧрлы.) Ті мыжаланъяс, верманныд свидетельяслысь тшӧтш юасьны, мыйкӧ кӧ онӧ гӧгӧрвоӧ ли, мый ли... (Секретарлы.) Вай, секретар ёрт, сэсся ӧтикӧн-ӧтикӧн корав татчӧ свидетельясӧс.
СЕКРЕТАР (босьтӧ гумага, мунӧ ӧдзӧслань да горӧдӧ). Марья Намырова, лок! (Бӧр пуксьӧ.)
4-ӧд петкӧдчӧм.
Пырӧ Марья, вуджӧ шуйгавылӧ, сувтӧ пызан дорӧ.
ЮРАЛЫСЬ. Вай висьтав, Намырова, мый тэ тӧдан тайӧ делӧ йылысь, кыдзи тэнӧ видлалісны декабр 16-ӧд лунӧ 1923-ӧд воын?
МАРЬЯ. Висьтавны, суддя ёртъяс, оз ковмы зэв уна. Сылы пӧшти кык во нин лоӧ. Кыдзкӧ, вӧскресенньӧ вӧлі луныс, ми муртса удитім пажнайтны, локтісны миянӧ ас сиктса йӧз, морт дас кымын, буракӧ. Накӧд тшӧтш вӧліны тайӧяс. (Индӧ мыжаланъяс вылӧ.) Менсьым друг кутісны корны: инды пӧ вай ассьыд кага шойтӧ... Ми мамӧкӧд веськыда чуймим: кутшӧм кага нӧ, шуам налы, тіянлы колӧ? Ассьыд пӧ, шуӧны: тэ пӧ челядясьлӧмыд нин дай виӧмыд кагатӧ. Ме вӧлі нӧбася медбӧръя тӧлысь нин, челядясьныс вӧлі виччыся рӧштво гӧгӧр. Висьталі эськӧ налы: мися, эг на вай кагасӧ, да кӧть и вайи — ог ви ассьым дитяӧс, — да эз веритны. Мырдӧн пӧрччӧдісны менӧ, мамӧс да Ваньӧ вокӧс ыстісны посводзӧ, ачымӧс нуисны кӧтшасӧ да сэні и видлалісны кык нывбаба — Наталля да Ӧнисся... Кымынкӧ мужик кутісны сэки менӧ киясӧд да кокъясӧд... Ме эг сетчы бурӧн ачымӧс видлавны да зэв ёна песси, сэки буракӧ кынӧмӧй менам и доймалӧма... Мыйлакӧ нывбабаяслы абу вӧлі сэки тӧдчӧма кынӧмысь кагаӧй... Сы бӧрын менӧ пуксьӧдлісны «чижовкаӧ»... Менам зэв ёна кутіс кынӧмӧй доймыны да, милиционеркӧд ветлі Ӧксиння ордӧ — пӧрысь бабитчысь ордӧ. Сійӧ видлаліс да шуис: кагаыд пӧ кынӧмад на. Кык лун мысти, Микӧла вечерняӧ рытнас и рӧдитчис пи, ёна вӧлі тӧдчӧ лӧз инъяс сылӧн яяс да куим сутки мысти и кулі... Педӧрыд да Ёгорыд сэки ёна вӧлі повзьӧмаӧсь, сэсся корлісны менӧ сельсӧветӧ да быд ногыс ме водзын кевмысисны, мед эськӧ ме некодлы эг норась сы йылысь... Ме некодлы эг и кӧсйыв норасьныс. Сӧмын тайӧ жӧ, мый ӧні тані висьтала, висьтавлі кыкысь Куръявомса милиционерлы да ӧтчыд, таво нин следовательлы... Сы бӧрын, неуна бурдышті да, ме муні карӧ, велӧдчи сэні воӧн-джынйӧн кымын — ӧні ме кандидатка коммунист партияӧ, уджала нывбабаяс костын, мый верма югдӧда найӧс, велӧда бурджыка овны. Таво, неважӧн на, ме волі гортӧ да и кылі: Педӧрӧс пӧ да Ёгорӧс Обласьтувса суд кутас судитны тані, Кунвадорас, тшӧтш и меным сетісны пӧвестка... Со и ставыс...
ЮРАЛЫСЬ (заседательяслы). Мыйкӧ эм абу тіян юавныныд?
1-я ЗАСЕДАТЕЛЬ. Менам эм. (Марьялы.) Тэ нӧ ачыд, Марья, кытчӧкӧ норасьлін эн тэнӧ ӧбӧдитӧмсьыс?
МАРЬЯ. Висьталі тай — эг мися... Пӧвестка сетігӧн сельсӧветын самӧй вӧліны тайӧяс кыкнанныс да кутісны меным шуавны: эн пӧ тай нӧ кӧсйыв, Марья, некытчӧ норасьны-а, миянӧс судӧ сетӧмаӧсь? Ме налы и шуа сэки воча: ме мися збыль эг норасьлы некодлы, ог тӧд мися, кыдзи сідзсӧ лоӧма. Тайӧяс некутшӧма оз веритны. Ме сэсся налы и шуа: онӧ кӧ мися веритӧй ті, ме со мый вӧча: мыжаланъяслы сетсьӧ суд вылын дорйысь. Ті мися бокысь дорйысьӧс энӧ корсьысьӧй — ме тіянӧс кыдзи верма да сямма ачым сэні доръя... (Кыскӧ питшӧгсьыс гумага да сетӧ юралысьлы.) Со месянь гумага; ме кора судсянь: вӧчны мый сэтчӧ гижӧма.
ЮРАЛЫСЬ (разьӧ да лыддьӧ). «Коми Обласьтувса судсянь ветлӧдлан сессиялы. Кунвадорса гражданкасянь Марья Намыровасянь шыӧдчӧм. Юль 2-ӧд лунын таво Кунвадор сиктын лоӧ суд Педӧр Петрӧвич Мырныровлы да Ёгор Микайлӧвич Тшалаковлы — найӧс мыждӧны Уголовнӧй Кодекса 106-ӧд стаття серти (превышенньӧ власти). Кора суд вылас менӧ лэдзны найӧс дорйысьӧ. Гражданка Марья Намырова». (Панасовалы.) Тэ, мыждысь ёрт, мыйкӧ шуан он?
ПАНАСОВА. Нинӧм ог шу.
ЮРАЛЫСЬ (регыдик заседательяскӧд ас костын сёрнитыштӧм мысти). Суд шуис лэдзны Марья Намыроваӧс мыжаланъясӧс дорйысь пыдди. (Марьялы.) Пуксьы, Намырова, эсійӧ пызан саяс.
МАРЬЯ (пуксьӧ). Меным позьӧ кыв-мӧд шуны?
ЮРАЛЫСЬ. Позьӧ.
МАРЬЯ. Медым прӧста судыс кузя оз нюжав, ме эськӧ кора судсӧ юавны мыжаланъяслысь: збыль али эг ме висьтав. Найӧ, ме чайта, веськыда висьталасны, сознайтчасны асланыс ӧшыбкаысь... Сэки свидетельяссӧ позяс не юавны...
ЮРАЛЫСЬ (мыжаланъяслы). Кывзӧй ті, Мырныров да Тшалаков, збыль сідзи вӧлі делӧыс, кыдзи Намырова висьталіс, али эз?
ПЕДӦР }
ЁГОР } (тшӧтш) Збыль, збыль сідзи; толькӧ ми абу мыжаӧсь... (Марья на вылӧ букышӧн видзӧдлӧ.)
ЮРАЛЫСЬ (Панасовалы). Тэ, мыждысь, мыйкӧ шуан он та вылӧ?
ПАНАСОВА Нинӧм воча ог шу.
ЮРАЛЫСЬ (бара заседательяскӧд ас костаныс ичӧтика вашкӧдчӧм бӧрын шуӧ). Суд шуис: мукӧд свидетельяслысь сэсся тайӧ делӧ йылысь не юасьны. (Секретарлы.) Кор, секретар ёрт, татчӧ ставнысӧ.
СЕКРЕТАР (мунӧ да ӧдзӧсӧд горӧдӧ). Локтӧй, свидетельяс, татчӧ, ставныд локтӧй! (Бӧр пуксьӧ.)
5-ӧд петкӧдчӧм.
Пырӧны ставныс. Сувтӧны ӧдзӧс дорас.
ЮРАЛЫСЬ (свидетельяслы). Но, свидетельяс, тіянлысь эз ковмы нинӧм юасьны. Пуксялӧй эстчӧ (Индӧ йӧзлань.) йӧзыскӧд тшӧтш. (Свидетельяс вуджӧны шуйгавылӧ — кодыс пуксялӧны скамьяяс вылӧ, мукӧдыс сулалӧны.) Ӧні сэсся воссьӧ вензьӧм мыждыся-дорйыся костын. Войдӧр сетсьӧ кыв мыждысьысьлы — Панасовалы.
ПАНАСОВА (сувтӧ). Суддя ёртъяс, дай ті, коми войтыр! Ставным ми тӧдам: зэв на пемыдӧсь коми йӧз, торъя пемыдӧсь деревняса коми аньяс, нывбабаяс. Войдӧр найӧ эз тӧдлыны морт ногса олӧмсӧ, эз вермывны кокниджыка лолыштны, — гӧгӧр найӧс увтыртлісны да нартитлісны. Коммунист партия да Сӧвет власьт революция первой лунсяньыс ӧткодялісны нывбабаяслысь праванысӧ мужикъяскӧд, быд ногыс тӧждысьӧны найӧс югдӧдны, вежӧртӧдны, сетны налы унджык кокньӧдъяс. Мый нӧ ми сы пыдди тані аддзам, ёртъяс? Кунвадор сиктын кык «чина-власьта» морт: — ӧтикыс сельсӧветса секретар, шуны кӧ Сӧвет власьтлӧн представитель, мӧдыс — коммунист ячейкаса секретар — партиялӧн представитель, прӧстӧй йӧз больгӧм вылӧ видзӧдӧмӧн ӧбӧдитӧмаӧсь ӧтик нылӧс: мырдӧн тшӧктӧмаӧсь медбӧръя кадъяссӧ нӧбасигӧн видлавны (шобны) сылысь кынӧмсӧ. Вӧлі налӧн сы вылӧ власьтыс? Эз! Кӧть и челядясьӧма нин вӧлі нылыс — налӧн эз вӧв праваыс сідзи вӧчны. Гашкӧ найӧ ас тӧдтӧмлуннысла сідзи вӧчисны? Эз жӧ! Сельсӧветса секретар Мырныров — грамотнӧй морт, пӧшти куим во служитӧма секретарын, сійӧ тӧдӧ нин вӧлі Сӧвет власьтлысь удж вӧчӧмсӧ да нывбабаяс дор тӧждысьӧмсӧ; сэсся оз ков вунӧдны: сійӧ вӧлі 1923-ӧд воын, октябрся революциясянь сизимӧд во вылын нин. Гашкӧ нӧ мӧд тӧварышыс сылӧн — Тшалаковыс гӧгӧрвотӧмысла жӧ вӧчис да? Весиг оз позь сідзи мӧвпыштны. Морт служитӧма Краснӧй Армияын, 1920-ӧд восянь нин коммунист партияын шленын. Сылы Мырныров дорысь на бурджыка колӧ тӧдныс вӧлі. Найӧ нӧ мый висьталісны тані? Найӧ весиг асланыс мыж вӧчӧмсьыныс эз сознайтчыны. Найӧ, нинӧм гӧгӧрвотӧм улӧ лэччысьӧмӧн, кӧсйӧны мездысьны мыжсьыныс. Найӧ быттьӧ оз тӧдны: «чурка» ним ӧні бырӧма, быттьӧ оз тӧдны — «незаконнорожденнӧй» кӧть, «внебрачнӧй» кӧть, «чурка» кӧть — ставыс ӧткодь, ставыс увтыртӧ, унижайтӧ нывбабаӧс. Мый сэсся найӧ водзӧ вӧчисны? Арестуйтісны дойдалӧм нылӧс, мучитісны кык сутки чӧж. Нывлӧн чужлӧма пи, ставыс лӧз печатӧсь — яйыс и юрыс. Дерт, эз вӧв сійӧ му вылын дыр олысь — куим сутки мысти и кулӧма. Кодъяс сыысь мыжаӧсь? Гашкӧ, шуанныд, сійӧ пемыд нывбабаясыс, кодъяс чабралісны кагаыслысь мамсӧ? Абу найӧ, мыжаӧсь этійӧяс. (Индӧ мыжаланъяс вылӧ.) Найӧ мырдӧн тшӧктісны видлавны нывсӧ, найӧ воштісны сы выйӧдзыс, на понда кулі дзоля кагаыс!.. Сэсся водзӧ. Кор нывлӧн кагаыс чужӧма, найӧ гижӧны волисполкомӧ гумага, шуӧны: ставыс пӧ ӧшыбка лоӧма да колӧ пӧ делӧсӧ тупкыны (прекратитны), корӧмаӧсь сэсся нывтӧ сельсӧветӧ да тшӧктӧны сылы некытчӧ не норасьны та понда. Мыйла нӧ сэки казялісны ассьыныс мыжсӧ, мыйла водзвыв эз думыштны найӧ?.. Ёртъяс, тіян водзын пукалӧны бура тӧдысь мортъяс, грамотнӧйяс, сӧмын вывті наянӧсь-мудерӧсь. Коми пельӧсъясысь уна на сюрасны татшӧм Мырныровъясыд да Тшалаковъясыд, ёна на найӧ вывті вылӧ пуксьӧны, ёна на на вӧсна страдайтӧны пемыд коми войтырыд, медся ёна полысь сьӧлӧма коми аньяс. Колӧ татшӧмъясыдкӧд чорыда вермасьны, весавны коми мусӧ татшӧм вывті вылӧ пуксьысь «уна власьта» йӧзсьыс: найӧ торкӧны выль ногӧн овмӧдчӧмсӧ, найӧ няйтӧсьтӧны да йирӧны Сӧвет власьтлысь да Коммунист партиялысь йӧз понда уджалӧмсӧ... Ме кора судсянь: Педӧр Мырныровӧс да Ёгор Тшалаковӧс чорыдджыка судитны — мыждыны не пӧштӧ 106-ӧд стаття серти, колӧ найӧс мыждыны ещӧ 109-ӧд стаття серти (власьтӧс порочитӧмысь) да 112-ӧд стаття серти (незаконнӧй арест вӧчӧмысь) — ӧтвылысь ставсьыс 5 во кежлӧ тюрмаӧ пуксьӧдны... Ме помалі. (Пуксьӧ.)
Йӧз костын вӧрӧны, вашкӧдчӧны, юрнаныс качайтӧны.
ЮРАЛ. Ӧні кыв сетсьӧ дорйысьлы. Намырова, висьтав сэсся тэ.
МАРЬЯ (сувтӧ). Веськыда кӧ висьтавны, ёртъяс, тайӧ делӧыс медъёнасӧ меным инмис. Коді мыжа тані? Ёртъяс, оз позь мыждыны толькӧ кык мортӧс, кодъяс тані пукалӧны, кыдзи шуӧ мыждысь — Панасова ёрт. Мыжаыс тані — важ, сар дырся олӧмлӧн колясыс... Энӧ думайтӧй ті сідзи: быттьӧ этійӧяс (Индӧ мыжаланъяс вылӧ.) секретар «чинӧдз» воӧмаӧсь да, зэв нин унатор тӧдӧны. Кор нӧ налы пӧраыс вӧлі бурасӧ велӧдчыныс? Найӧ ӧд асьныс сэтшӧм жӧ уджалысь крестьянаяс, кутшӧм Иван дядь, либӧ Степан сват да мукӧд со эстӧн (Индӧ йӧз вылӧ.) кывзысьяс. Коді деревнятӧ, пемыд коми сиктъястӧ тӧдӧ, да аслас синводзын тыдалӧ сэтчӧс олӧмыс, сійӧ пыр веськыда и шуас: став лёкыс мунӧ пемыдлун вӧсна, велӧдчытӧм понда. Каръясад эськӧ неуна мӧд ногсаджык нин олӧмыд — сэні йӧзыд ёнджыка велӧдчӧмаӧсь да, сэні нӧ оз овлывлы некутшӧм лёк вӧчӧмъясыс? Уна овлывлӧ. Мый нин нӧ сэсся миян Кунвадор кодь пемыд сиктъястӧ и казьтывныс — тані быдторйыс вермас лоны... Ме тӧда, Педӧр Мырныров Куръявомысь ылӧджык эз на ветлы нэмнас. Лун-лун удж вылын, рытъяснас да праздникъясӧ сельсӧветын гижӧ — уджыс уна, отсасьысь сылӧн эз вӧв, — кор сэсся сылы вӧлі лыддьысьныс да велӧдчыныс?.. Мӧдыс — Ёгор Тшалаков — эськӧ служитліс Краснӧй Армияын да, мый нӧ коми мортыд роч пӧвстад гӧгӧрвоас? Но, шуам, сійӧ — коммунист. Ті чайтанныд, гашкӧ: коммунист кӧ, быдтор нин колӧ вӧчны бура. Сідз эськӧ колӧ да, колӧ йӧзыслы бур примеръяссӧ сылы петкӧдлыны да, Тшалаков эз на сы выйӧдзыс во, оз на став уставсӧ коммунистъяслысь тӧд — велӧдныс некодлы вӧлі, весиг ӧд сійӧ гижныс оз куж, ӧдва ассыс ним-овсӧ пасйыны сяммӧ... Ёртъяс, найӧ думсьыныс, эськӧ, бур вӧчисны Сӧвет власьтлы да партиялы, артмис сӧмын лёк-а... Суддя ёртъяс, ме кора дзикӧдз найӧс мыжсьыс мездыны, найӧ эз наросьнӧ сійӧс вӧчны... Войдӧр колӧ бура велӧдны татшӧмъяссӧ, югдӧдны вежӧрнысӧ, а сы бӧрын кӧ вӧчасны лёксӧ — сэки вӧлисти и судитны, чорыда судитны!.. Сэки и ме ог кутчысь сэтшӧмъястӧ дорйыны... Сэсся ме нинӧм ог шу. Кора мися ӧтитор: мездыны дзикӧдз тайӧясӧс, найӧ бура ёна нин и асьныс, ме чайта, страдайтісны тайӧ судсӧ виччысигӧн... (Пуксьӧ.)
Йӧз костын нимкодя вӧрӧшитчӧны, шензьӧны.
ЮРАЛЫСЬ (Панасовалы). Мыйкӧ, гашкӧ, ещӧ тэнад, мыждысь ёрт, эм шуныд?
ПАНАСОВА. Нинӧм абу.
ЮРАЛЫСЬ. Ӧні сэсся мыжаланъяслы сэтчӧ медбӧръя кыв. Мырныров, мый тэ верман висьтавны ещӧ судлы?
ПЕДӦР (сувтӧ). Ставсӧ вернӧ висьталіс Марья Намыроваыд... Ми эгӧ наросьнӧ лёк вылӧ вӧчӧ делӧсӧ, ми абу мыжаӧсь, корам небыдджыка судитны, либӧ — дзикӧдз прӧститны, позьӧ кӧ по законам РСФСР...
ЮРАЛЫСЬ. Пуксьы, Мырныров. (Сійӧ пуксьӧ.)
ЮРАЛЫСЬ (Ёгорлы). Тэ, Тшалаков, мыйкӧ ещӧ висьталан он?
ЁГОР. Нинӧм нин содтыныс; Педӧр Петрӧвич мый висьталіс — сідзи-й ме шуа: ми ставсӧ вӧчим бур вылӧ. Ме пронтъяс вылын пыр косясьлі медводдза радъясас «диктатура пролетариата» вӧсна, дай водзӧ кута уджавны за сӧветскӧй власьт да «пролетарий» сек стран понда... (Пуксьӧ. )
ЮРАЛЫСЬ. Пуксьы, Тшалаков! (Сійӧ пуксьӧ.) Суд петӧ пригӧвӧр лӧсьӧдны. (Петӧ веськыдвылӧ, сы бӧрся петӧны кыкнан заседательыс.)
6-ӧд петкӧдчӧм.
Йӧз костын ёнджыка (смелджыка) вӧрӧм; унаӧн ӧтпырйӧ кызӧны; сёрнитӧны ньӧжйӧник — артмӧ ичӧтик мургӧм, сэсся вочасӧн пыр содӧ; коркӧ кывны кутас торъя кывъяс: «оз ёна», «аттӧ, Марьюшкаыд бура жӧ висьталіс!».
НАТАЛЬ (Петырлы). Ме чайта, Петыр сват, Педьӧтӧ ӧні дзикӧдз мездасны.
ПЕТЫР. Но, кыдзи нӧ! Мездасны дерт.
НАТАЛЬ. Марьяыд жӧ, сват, мездіс кыкнаннысӧ-а, эськӧ судитісны чорыда. (Гусьӧн пеляс мыйкӧ вашкӧдӧ да чуньнас индӧ Панасова вылӧ.)
ПЕТЫР. Кӧнешнӧ сідзи эськӧ лои...
ӦНИССЯ (матыстчӧ на дінӧ). Ӧні ставыс бура помасяс... Аттӧ, бур сьӧлӧма жӧ вӧлӧма Марьяыд!.. Видзӧдтӧ, кыкнаннысӧ кутшӧма дорйис?
НАТАЛЬ. Ӧні он и гӧгӧрво, кыдзи мый вӧчсьӧ? Ставным первойсӧ чайтлім: мися Марьяӧс судитны кутасны-а, лои мӧдарӧ, — он жӧ тӧд, кыдзи господьыд вермас бергӧдны.
ГАБӦ (тшӧтш сэтчӧ локтӧ). Педӧр Петрӧвичыд кӧ эськӧ менсьым кывзіс да ручка помнас кутіс гижны, — сэки эськӧ и судӧдзыс гашкӧ эз ков волыныс... Оз тай вот кывзыны ӧнія томуловыд миян кодьясыдлысь.
СЕКРЕТАР (йӧзлы). Ньӧжйӧнджык, граждана, сёрнитӧй, энӧ шумитӧй!
Йӧз ланьтыштлӧны; сэсся бара вочасӧн заводитӧны воддза моз гӧлӧсъяс лэптыны.
ВАНЬӦ. Мунам нин сэсся, мамӧ, гортӧ, кынӧмӧй сюмалӧ...
АННА. Ланьт, эн сёрнит сэтшӧм гораа, суддяыд эсійӧ видчас...
ВАНЬӦ. Мыйла нӧ, мамӧ, Марьятӧ сэтчӧ пуксьӧдӧмаӧсь?
АННА. Эн мися увгы, сулав шы ни тӧв!..
7-ӧд петкӧдчӧм.
Ӧдзӧсӧд пырӧны: Юралысь да кык заседатель. Пырӧны пызан сайӧ.
СЕКРЕТАР (ӧдйӧ чеччӧ, йӧзлы). Суд локтӧ, тшӧкта сувтны ставныдлы! (Ставныс сувтӧны.)
ЮРАЛЫСЬ (лыддьӧ). «Россияса Социал Ӧтувъя Сӧвет Республика нимӧн. 1925-ӧд во юль 2-ӧд лун. Коми автономия обласьтувса судлӧн ветлӧдлан сессия видлаліс уголовнӧй делӧ Кунвадорса гражданаӧс Педӧр Петрӧвич Мырныровӧс да Ёгор Микайлӧвич Тшалаковӧс мыждӧм йылысь Уголовнӧй Кодексса 106-ӧд стаття серти, да аддзис: мыжыс налӧн следствие дырйи дай суд вылын ставнас тыдовтчис: 1923-ӧд воын, декабр 16-ӧд лунӧ Мырныров да Тшалаков кывлӧмаӧсь йӧзсянь сёрнияс: быттьӧкӧ ӧти ныв — гражданка Марья Намырова — вӧлі нӧбасьӧ, сэсся быттьӧ челядясьӧма да кагасӧ ассьыс виӧма. Татшӧм сёрнияс кузяыс найӧ чукӧртӧмаӧсь Кунвадорысь морт дасӧс кымын дай мунӧмаӧсь Марья Намыроваӧс видлавны. Кор сійӧ мамыскӧд кутӧма пыксьыны — мамсӧ да ичӧтик воксӧ вӧтлӧмаӧсь посводзӧ, а асьсӧ Марья Намыровасӧ тшӧктӧмаӧсь мырдӧн видлавны. Уськӧдӧмаӧсь сійӧс джоджӧ, мужикъяс кутӧмаӧсь киясӧдыс да кокъясӧдыс, а кык нывбаба чабралӧмаӧсь сылысь кынӧмсӧ да морӧссӧ (нёньяссӧ). Сы бӧрын Мырныров Тшалаковкӧд гижӧмаӧсь акт да Намыроваӧс арестуйтӧмаӧсь. Чабралігас дойдалӧмаӧсь кынӧмсьыс кагасӧ, сы вӧсна Марья Намырова челядясьӧма кад вотӧдз, водзджык. Кагаыс чужӧма уна лӧз печатӧсь да куим сутки мысти и кулӧма сэсся. Тайӧ мыжсьыс некоднаныс эз сознайтчыны суд вылын. Ставсӧ арталӧм бӧрын суд шуис: 1) Педӧр Петрӧвич Мырныровӧс, Кунвадорса гражданинӧс, Куръявом вӧлӧсьтысь, Коми обласьтысь, 20 арӧса, беспартийнӧй, 106-ӧд статтяса 2-ӧд юкӧн серти пуксьӧдны тюрмаӧ 3 во кежлӧ да 109-ӧд стаття серти — 2 во кежлӧ, ӧтпырйӧ ставыс — куим во кежлӧ да став правасӧ сылысь босьтлыны сы бӧрын ещӧ кык во чӧж кежлӧ. 2) Сійӧ сиктса гражданинӧс жӧ, Ёгор Микайлӧвич Тшалаковӧс, 25 арӧса, 1920-ӧд восянь коммунист партияын шлен, сэтшӧм статтяяс серти жӧ — тюрмаын пукӧдны куим во чӧж да став правасӧ сылысь босьтлыны кык во чӧж кежлӧ. (Кост. Сы кості йӧз пӧвстын кылӧ гӧлӧс: «аттӧ кутшӧм чорыда!») Суд вывса рӧскодсӧ сюйны мыжалӧмъясыслы шӧриӧн. Мырныровӧс да Тшалаковӧс пуксьӧдны ӧнісянь жӧ. Тайӧ приговор вылас вермасны сетны Верховнӧй Судӧ кассационнӧй жалӧба, 72 часӧн стрӧк тыртӧдз». (Юрсӧ лэптӧ, мыжаланъяслы.) Гӧгӧрвоинныд?.. Час нӧ кывйӧн ещӧ висьтала. Тіянӧс кыкнаннытӧ суд шуис тюрмаын пукӧдны морт куим воӧн; сы бӧрын, кор пукаланныд сійӧ стрӧксӧ, ещӧ кык во чӧж ті онӧ вермӧ служитны бӧрйӧм общественнӧй службаясын дай асьныд онӧ вермӧ бӧрйыны некодӧс — праваныд тіян кык во чӧж кежлӧ лоӧ босьтлӧма. Сэсся тайӧ приговорсӧ верманныд обжалуйтны, неладнӧ кӧ мыйкӧ чайтанныд вӧчӧма, либӧ чинтыны ли, дзикӧдз мездыны ли, Верховнӧй Судӧ, Мӧскуаӧ. Жалӧбасӧ колӧ сетны обласьтувса суд пыр. Сы вылӧ тіянлы сетсьӧ стрӧк 72 час, — стрӧкыс лыддьыссьӧ тайӧ приговорыслысь копиясӧ тіянлы кианыд сетӧмсянь... Судлӧн заседанньӧ помасис. (Пуксьӧ, чукӧртӧ гумагаяс, секретаркӧд тшӧтш.)
ПЕДӦР. Мыйла нӧ татшӧм чорыда судитісны? Эз кӧ найӧ ӧшыбитчыны?
ЁГОР. Эз! Мыжным асланым вывті ыджыд, Педӧр Петрӧвич! Мӧд ног оз позь вӧлі вӧчны.
НАТАЛЬ (Петырлы). Ме, сватӧ, нинӧм эг кут гӧгӧрвоны... Куим во кежлӧ тюрмаӧ пуксьӧдны али мый нӧ шуисны?
ПЕТЫР. Сідз тай, буракӧ, нёйкнитісны!
МАРЬЯ (Ёгорлы да Педӧрлы). Энӧ на вывті ті шогсьӧй — ми жалӧба сетам Верховнӧй Судӧ.
ЁГОР. Нинӧмла, Марья, — асьным ӧд мыжсӧ вӧчим. Пролетарскӧй судсянь тайӧс заслужитім... Ми, Марья, тэнӧ вӧлі кӧсъям вит во кежлӧ тюрмаад сюйны-а, асьным буретш веськалім сэтчӧ... Прӧстит, Марья! (Кисӧ нюжӧдӧ.)
ПЕДӦР. Эн лӧгав, Марья, и ме вылӧ тшӧтш. (Сетӧ кисӧ.)
МАРЬЯ. Ме ог лӧгав тіян вылӧ да... Водзӧ энӧ лёкасӧ уджалӧй-а.
Занавес.
