СИН ВОДЗЫН ӦНӦДЗ...
Лӧз Эжва дорын ачым, татӧн, А мӧвпӧй тӧвзьӧдлӧ Карпатӧ, Веж ягӧн вевттьӧм гӧра бокӧ, Кӧн менӧ лыддьӧны жӧ вокӧн, Кӧн мен тшӧтш тӧдса Верховина Йӧз лышкыдлунсьыс сэтшӧм вына, Кӧн тэрыб Ужыс, визув юыс Важ шогӧс ылӧ-ылӧ нуис, Кӧн меным мусмӧм перевалын Выль гожӧм дзоридзалӧ талун, Кӧн дружба вӧсна лэптӧм тостысь И нӧшта дженьдаммис туй костыс. Дерт, медся муса мен ас парма — Сэк весиг, медся руа арнас, Дерт, татӧн меным медся шоныд, Дерт, пармалӧн оз усьлы доныс, Но ыджыд Рӧдиналӧн мичыс Мен парма шӧрсянь воссис-вичмис. Быд пом, быд дор мен ас да матыс, И сійӧн дона тшӧтш Карпатыс Ме кольӧм арын сэтчӧ волі, А быттьӧ нэмӧс сэн тшӧтш олі. Сэн чужан мулӧн — рытыв дорыш. А пельын сэтчӧс сьылӧм горыс, Син водзын ӧнӧдз сэтчӧс ёртъяс — И кыдз нӧ та бӧрын он бордъясь?
Гижӧд
Син водзын ӧнӧдз...
Жанр: 

lkejrlkelkrgner klrjnelknfrkl ekjnrjkenfrej