НЭМЪЯС КЫВЗӦНЫ ЭТАТШӦМ ХОРСӦ...

Вӧрын тӧдчымӧн дзескыдджык лоис — 
Гожся паськӧмсӧ кышаліс вӧр.
Шуньгӧ ю — вӧрлӧн нэмчӧжся чойыс — 
Сэтшӧм рам, быттьӧ ньӧти оз вӧр.

Бара ю дорыс сё пӧлӧс шыа — 
Миян лэбачьяс дзользьӧны сідз.
Тшӧтш и сизьӧс тай ышӧдӧ кыа:
Матын асъядор тотшкӧдчӧ сизь.

Дзик быд лэбачлӧн — ас пӧлӧс нота.
Дзик быд лэбачлӧн — ас пӧлӧс гор.
Сизьыс быдӧнлы юӧртӧ со тай
Телеграммаӧн моз асъядор:

«Вӧрын олӧмыс мунӧ, кыдз колӧ.
Лэбач сьылӧмлы оз волы пом.
Кытчӧдз му вылын сьыланкыв олӧ,
Сэтчӧдз Му шарыс бергалӧ, том.

Ыркыд тӧвру пу йывъясын ворсӧ.
Кыпыд дзользьӧмыс кытчӧ оз письт!
Нэмъяс кывзӧны этатшӧм хорсӧ,
Хорсӧ, кӧні быд сьылысь — солист.

Оз и важмывлы репертуарыс,
А вот кывзан — и мудзыс оз вен.
...Сизь нин мӧд пуӧ сатшкысис яра.
Нотнӧй знак быттьӧ тыдалӧ сэн.