* * *

Машина уджалӧ, кыдз колӧ,
Кыдз колӧ, кывтӧ пароход.
И бара ворсӧ радиола:
Оз прӧста кыпыдлуныс сод.

Ас сикас мичсӧ бара восьтӧ
То школьнӧй, то салдатскӧй вальс,
И ныв-зон вальслӧн гыяс костын
Со бергалӧны коймӧд час.

Тэ том йӧз гажас верман пӧдны,
Но гажсӧ некыдз тась он ну.
Борт сайын — вой, роч нойысь сьӧд на,
Борт сайын — ва да арся му.

И ю выв бакенъяслӧн бияс
Дзик войбыд мигайтчӧны сэн,
Ӧд найӧс ӧзтіс мортлӧн киыс,
Мед туйсӧ весиг вой эз вен.

А вальслӧн гыяс костын — серам,
И шуткаяслы абу пом.
Тан лоны букышӧн он вермы,
Тан весиг пӧрысь лолӧ том.

А Ыджыд Кӧш *, кӧть нэмъяс ӧзйӧ,
Ныв-зонлы вежӧктӧ зэв дыр.
Кыдз быттьӧ сійӧ татысь кӧсйӧ
Том шудсӧ гумовтны кӧш тыр.

* Ыджыд Кӧш — Большая Медведица созвездие.